اقمولا وبلىسى ارشالى اۋدانىنىڭ ج.تاشەنوۆ اتىنداعى ورتا مەكتەبىنىڭ وقۋشىلارى ءوز قولىمەن جاساعان قولونەر بۇيىمدارىن ساتىپ, تابىس تاۋىپ وتىر. ولاردى مۇنداي پايدالى ەڭبەككە اتالعان مەكتەپتە كوركەم ەڭبەك پانىنەن ساباق بەرەتىن الماگۇل بەيسەنباەۆا باۋلىپ كەلەدى.
– ءبىزدىڭ باستى مىندەتىمىز – جاڭا زامان عىلىمىنىڭ مول جەتىستىكتەرىمەن قارۋلانعان, مادەني دۇنيەتانىمى, كوزقاراسى قالىپتاسقان باسەكەگە قابىلەتتى جاستاردى تاربيەلەۋ. ساپالى ءبىلىم بەرۋمەن قاتار ەڭبەككە باۋلۋ, ۇيرەتۋ اسا ماڭىزدى. ەكونوميكا قارقىندى دامىعان قازىرگى قوعامعا ەڭبەككە تەز بەيىمدەلىپ, وزىندىك ءبىلىم الا الاتىن, ءوزىن-ءوزى تاربيەلەپ, دامىتۋعا بەيىم بەلسەندى, شىعارماشىل جاس بۋىندى قالىپتاستىرۋ كەرەك. عىلىم مەن ءبىلىمنىڭ, اقپاراتتىق تەحنولوگيالار مەن تەحنيكانىڭ قازىرگى دامۋ داۋىرىندە كوركەم قولونەردىڭ قۇندىلىعىن دامىتۋ, بولاشاق جاستاردىڭ ساناسىنا ءسىڭىرۋ ماڭىزدى دەپ سانايمىن. ال جەكە تۇلعا قالىپتاستىرۋدا وقۋشى بويىنا ىزگى قاسيەتتەردى ءسىڭىرۋدى كوزدەيتىن قولونەر جوباسىنىڭ ءرولى زور, – دەيدى ا.بەيسەنباەۆا.
مۇعالىم بالالاردى «Online Shop» جوباسىمەن اينالىسۋعا بەيىمدەپ ءجۇر. بۇل جوبا ەڭبەككە, ماماندىق تاڭداۋعا پسيحولوگيالىق جانە پراكتيكالىق دايىندىق جاساۋ ماقساتىندا قولعا الىنعان. اتالعان جوبا بويىنشا جاسالعان وقۋشىلاردىڭ قولونەر بۇيىمدارى @koloner_arshaly ينستاگرام پاراقشاسىندا جاريالاپ, ساتىلىمعا قويىلادى. ساتىلعان بۇيىمنىڭ 50 پايىزى وقۋشىلارعا, 1 پايىزى قايىرىمدىلىققا, قالعانى قاجەتتى زاتتار الۋعا جۇمسالادى. بۇل جوبا وقۋشىلارعا كاسىبي تۇرعىدان ءوزى-وزىنە قولايلى ءبىلىم بەرۋ كەڭىستىگىن جاساۋعا سەپتىگىن تيگىزىپ جاتىر. ونى وقۋشىلاردىڭ كۇن ساناپ ارتقان قىزىعۋشىلىعىنان, جوباعا قاتىسۋشىلار سانىنىڭ كوبەيۋىنەن بايقاۋعا بولادى. ءتىپتى كەيبىرى ءوزىنىڭ شاعىن كاسىبىن باستاپ تا ۇلگەرگەن. بۇل سوزىمىزگە 7-سىنىپ وقۋشىسى اسەل مۇحامادياروۆانىڭ شەبەرلىگىن شىڭداپ, مونشاقتان ءتۇرلى ءساندى سومكەلەر جاساپ, ونى ءوزى اشقان ينستاگرامداعى جەكە ونلاين دۇكەنىندە ساتىپ جاتقانى دالەل بولا الادى.
جۇمىسىنا بەيجاي قارامايتىن ا.بەيسەنباەۆا ءوزىنىڭ ءبىلىمدى دە بىلىكتى, شىعارماشىل, شەبەر شاكىرتتەرىمەن بىرگە اۋداندىق, وبلىستىق, رەسپۋبليكالىق كورمە-سەمينارلارعا قاتىسىپ, تاجىريبەسىمەن ءبولىسىپ ءجۇر. جاقىندا پەداگوگ ەلوردادا ۇيىمداستىرىلعان «بۇلاق كورسەڭ كوزىن اش» اشىق ەسىك كۇنىندە مونشاقتاردان بۇيىمدار توقۋ بويىنشا شەبەرلىك ساباعىن وتكىزدى. ءارى تاجىريبەسىنىڭ جاڭالىعى مەن شىعارماشىلىق ىزدەنىسى ءۇشىن «ۇزدىك كاسىبي باعدارشى» اتالىمىن جەڭىپ العان.