بەلگىلى جۋرناليست ۆلاديمير رەريح ومىردەن وزدى. بۇل تۋرالى جۋرناليست دانا نۇرجىگىت ينستاگرام جەلىسىنە جازدى.
ء«الىمنىڭ اكەسىمەن سوڭعى كەزدەسۋى ەكەن... ۆولوديا, ۆلاديمير, ۆلاديمير احماديانوۆيچ رەريح بۇگىن بەرليندە دۇنيەدەن وزدى… 1996 جىلى 11 ناۋرىزدا تانىسقان وزىڭمەن 2000 جىلدان 15 جىل وتاستىق. ۇلدى بولدىق. تۇسىنىسپەگەن جەردەن مەن قازاقستاندا قالىپ, سەن گەرمانياعا كەتتىڭ. بىراق, سەن مەنىڭ تۇلعا بولىپ قالىپتاسۋىما, مامان بولىپ وسۋىمە, انا بولىپ بالا تاربيەسىندە نەگە ءمان بەرۋ كەرەكتىگىمە زور ىقپال ەتتىڭ, اقىلشىم, ساپالىلىق, دانالىق, ار, كاسىبيلىكتىڭ بيلىك ولشەمى بولدىڭ. پاراساتىڭ, ءبىلىمىڭ, شەشەندىك ونەرىڭ, زيالىلىعىڭ ەرەكشە ەدى. جەلتوقساندا بارامىز دەپ بەرلينگە بيلەت العانىم جوسپارلى ساپار بولعان جوق, قازان ايىندا وزىمنەن ءوزىم بالانى ساعان اپارعىم كەلدى. سوڭعى كەزدەسۋ بولارىن كىم بىلگەن, ۆولوديا! اناڭ ەمما الەكساندروۆنا, مەنىڭ اياۋلى ەنەمنىڭ قاسىنا كەتتىڭ… بالاڭ ءوزىڭدى كورىپ, بيىلعى تۋعان كۇنىڭمەن ءبىرىنشى بولىپ قۇتتىقتاعانى سوڭعى رەت ەكەن عوي… مىنا دۇنيەدەن تىنىشتىق تاپپاعان, تۇسىنىستىك تاپپاعان جانىڭ ءجانناتتان راحات تاپسىن!» دەپ جازدى د.نۇرجىگىت. ۆلاديمير رەريح 1958 جىلى ومىرگە كەلدى. رەسپۋبليكالىق بۇقارالىق اقپارات قۇرالدارىندا باسشىلىق قىزمەت اتقاردى.