پارلامەنت پالاتالارىنىڭ بىرلەسكەن وتىرىسىنان كەيىن قورعانىس ءمينيسترى رۋسلان جاقسىلىقوۆ جۋرناليستەردىڭ سۇراعىنا جاۋاپ بەردى, دەپ جازادى Egemen.kz.
رۋسلان جاقسىلىقوۆتان جەتىسۋ وبلىسى جاركەنتتە ورنالاسقان اسكەري بازادا جەلتوقسان ايىندا وتان الدىنداعى بورىشىن وتەپ جۇرگەن ساربازدىڭ ءولىم سەبەبى سۇرالدى.
مينيستر سارباز ولىمىنە مينينگيت اۋرۋى سەبەپ بولعانىن ايتتى.
«بىرىنشىدەن, مارقۇمنىڭ وتباسىنا تاعى دا كوڭىل ايتقىم كەلەدى. بۇل اۋرۋ – مەنينگيتتىڭ جىلدام وتەتىن فورماسى. بىلەسىز بە, ادەتتە اۋرۋدىڭ مۇنداي فورماسى تاسىمالداۋشىلاردا كەزدەسەدى. وكىنىشكە قاراي ءبىز جاس جىگىتتەردى اسكەرگە شاقىرعان كەزدە مىندەتتى اناليزدەردىڭ تىزبەسىندە مەنينگيت تاسىمالداۋشىلاردى انىقتايتىن تالداۋ جوق», دەدى رۋسلان جاقسىلىقوۆ.
دەگەنمەن قۇزىرلى ورگان اسكەرگە شاقىرىلعان ازاماتتاردى مىندەتتى وسى تالداۋدان وتكىزۋ ماسەلەسى جوسپارعا قويىلىپ, ەندى بولاشاق ساربازدار مينينگيتكە قارسى تەكسەرىستەن وتەتىنىن ءمالىم ەتتى.
«وسى جاعدايدان كەيىن جاس جىگىتتەردى اسكەري بولىمگە كەلگەن ساتتە مەنينگوكوكك تاسىمالداۋشىلارعا قارسى 100 پايىز تەكسەرۋ جۇرگىزۋ تۋرالى شەشىم قابىلدادىم جانە اقشا ءبولىندى. ەگەر جىگىتتەردە وسى اۋرۋدىڭ بەلگىلەرى انىقتالسا, ءدارى-دارمەكتىڭ كومەگىمەن-اق 5-7 كۇننىڭ ىشىندە ەمدەلەدى. بولاشاقتا مۇنداي بولمايدى دەگەن ءسوز. بىراق پروبلەما بار. مەن ءوزىم دە اكەمىن. بۇل ونىڭ وتباسى ءۇشىن عانا ەمەس, ءبارىمىز ءۇشىن ۇلكەن قايعى. قايعىرىپ كوڭىل ايتامىن, قازاقشا كەلگەندە بۇل اجال», دەدى قورعانىس ءمينيسترى.