بۇگىنگىدەي وزىق تەحنولوگيانىڭ زامانىندا قاي سالادا دا ىلكىمدى جاڭالىقتار ىلگەرىلەپ كەلەدى. ونەردە دە شەكتەۋ, شەكارا جوق. ماسەلەن, جۋىردا الەۋمەتتىك جەلىدەن انيمە (جاپون مۋلتيپليكاتسياسى) ستيلىندە سالىنعان ءاليحان بوكەيحاندى كورىپ قالدىم. ەلەڭ ەتىپ, اۆتوردىڭ پاراقشاسىنا كىرسەم, باسقا دا تۇلعالار مەن اقىندار وبرازدارى جاڭا فورمادا بەينەلەنىپتى. قارالىمى دا جاقسى. دەمەك الاش قايراتكەرلەرىنىڭ تىڭ سيپاتتاعى بەينەلەرى حالىقتىڭ كوڭىلىنەن شىققانى انىق.
جاس سۋرەتشى ارۋجان ۇناربەكوۆا الەۋمەتتىك جەلىدە انيمە ستيلىندەگى ەرەكشە تۋىندىلارىمەن تانىمال. اسىرەسە يلليۋستراتوردىڭ ەل پرەزيدەنتى قاسىم-جومارت توقاەۆ بەينەلەنگەن ستيكەرلەرى ەلدىڭ ەسىندە بولار. ءيا, بالا-قيالدىڭ اسپانى شەكسىز. ارۋجاننىڭ قىلقالامعا دەگەن قىزىعۋشىلىعىن جاپون كوميكستەرى وياتقان. قازىرگى ۋاقىتتىڭ, اسىرەسە شىعارماشىل جاندارعا يگىلىگى كوپ. اشىق الاڭدا كەز كەلگەن شەبەر ءوز تۋىندىسىن ۇسىنا الادى. جاس تالانتتىڭ اتىن شىعارىپ, اتاعىن الىس-جاقىن شەتەلگە جەتكىزگەن دە وسى الەۋمەتتىك جەلى ەكەن.
– بىردە TikTok-قا قىزىقتى ۆيدەو سالايىن دەپ, سۋرەتتەرىمنىڭ ءبىرىن جاريالادىم. اۋديتوريا ۇناتتى. ارتىنان تاعى ءبىر ۆيدەو شىعاردىم, ول دا كوپتىڭ كوڭىلىنەن شىقتى. تاپسىرىستار ءتۇسىپ, تابىس تابا باستادىم. بىردە مەملەكەت باسشىسىنىڭ سۋرەتىن سالدىم. حالىق جاقسى قابىلدادى, 2 ميلليونعا جۋىق قارالىم جينادى. تاڭعالىپ, باعا بەرگەندەر دە كوپ بولدى», – دەيدى ارۋجان ءبىر سۇحباتىندا.
جاس سۋرەتشىنىڭ ەرەكشەلىگى – تاريحي تۇلعالاردىڭ وبرازى زاماناۋي ستيلدە سالىنعان. قوعامعا دا جاتتاندى بەينەلەر اسەر ەتە قويمايتىنى شىن. سوندىقتان ارۋجان قاسىم-جومارت توقاەۆتى مەملەكەت باسشىسى رەتىندە ەمەس, قاراپايىم ادام رەتىندە, جاستاردىڭ تالعامىنا ساي ۇسىنادى.
پرەزيدەنتتىڭ سۋرەتىمەن ستيكەرلەر جاساپ شىعارۋ يدەياسى دا حالىققا ەرەكشە ۇنادى. ستيكەردەگى مەملەكەت باسشىسىنىڭ تسيتاتالارىن ارۋجان ينتەرنەتتەن ءوزى ىزدەپ تاۋىپ, تاڭداپ پايدالانعان. دايىن جۇمىستى حالىققا كورسەتۋگە پرەزيدەنتتىڭ تەلەراديوكەشەنى كومەكتەسكەن.
كەيىنگى ۋاقىتتا الاش قايراتكەرلەرىنىڭ زاماناۋي بەينەسى الەۋمەتتىك جەلىلەردە ءجيى تارالىپ ءجۇر. تاۋ-تۇلعالار وبرازى ارۋجاننىڭ شىعارماشىلىعىندا دا ەرەكشە مانگە يە. سۋرەتشى ابىلاي حاننىڭ, ءاليحان بوكەيحاننىڭ, ءىلياس جانسۇگىروۆتىڭ, دىنمۇحامەد قوناەۆتىڭ وبرازدارىن انيمە ستيلىندە سالدى.
«ماقساتىم – باتىرلارىمىزدى ەلدىڭ ەسىنە سالۋ ەدى. جاس بۋىن ولاردى ۇمىتپاسا ەكەن دەيمىن. بارلىق ءۇيدىڭ قابىرعاسىندا ءاليحان بوكەيحان بەينەلەنسە عوي دەگەن وي بولدى. تاريحي تۇلعالاردىڭ وبرازىن قاتتى وزگەرتكەن جوقپىن. جۇمىسىم ۇنادى, قىزىعۋشىلىق تانىتقاندار بولدى», دەيدى سۋرەتشى.
ايتا كەتەيىك, ارۋجان ۇناربەكوۆا «تاسقىن» انيماتسيالىق ستۋدياسىندا ەڭبەك ەتتى. جاس دارىن كۇيشى قۇرمانعازى تۋرالى ءمۋلتفيلمدى جاساۋعا اتسالىسقان. كەيىپكەرلەردىڭ سۋرەتىن سالىپ, كاسىبي سۋرەتشىلەردەن ساباق الىپ, تاجىريبە جيناعان. ونىڭ پىكىرىنشە, ەلىمىزدە قازاق انيماتسياسى قارقىندى دامىپ كەلەدى.
سۋرەت ونەرىندە ءتۇرلى ەكسپەريمەنتتەرگە بارىپ, ءوز ءستيلىن قالىپتاستىرعان جاس تالانتتىڭ تۋىندىلارى ەلىمىزدە عانا ەمەس, شەتەلدەردە دە سۇرانىسقا يە. بالا كەزىنەن ءۇيىر بولعان سۇيىكتى ىسىنەن بۇگىندە تابىس تا تاۋىپ ءجۇر. اسىرەسە اقش-تان تاپسىرىس بەرۋشىلەر كوپ ەكەن. اراب جازۋشىسى ارۋجانعا كىتابىنا كوميكس سالۋدى ۇسىنعان. شىعارماشىلىقتا ءوز جولىن تاپقان جاس سۋرەتشىنىڭ قىلقالامى ۇلتتىق بوياۋدان ارىلماق ەمەس. الداعى ۋاقىتتا دا قازاقتىڭ دىڭگەگىنە اينالعان زيالىلاردى زاماناۋي سيپاتتا بەينەلەۋدى جوسپارلاپ وتىر. اۆتوردىڭ شەبەرلىگى ۋاقىتپەن بىرگە شىڭدالا ءتۇسىپ, ونەردەگى تاقىرىبى دا, تىنىسى دا كەڭەيەتىنى ءسوزسىز.