كۇللى الەم كوز تىككەن V دۇنيەجۇزىلىك كوشپەندىلەر ويىندارى قىركۇيەك ايىنىڭ 8-14 كۇندەرى ارالىعىندا استانادا وتەدى. 100-دەن استام ەلدەن 4000-عا جۋىق سپورتشى قاتىسىپ, استاناعا 100 مىڭنان استام تۋريست كەلەدى. ات سپورتى, ۇلتتىق كۇرەس تۇرلەرى, ساداق اتۋ, جامبى اتۋ, ءداستۇرلى ينتەللەكتۋالدى ويىندار, ساياتشىلىق ونەر, ارقان تارتۋ سەكىلدى ويىننىڭ 20 تۇرىنەن جارىس جانە ۇلتتىق ونەردىڭ 10 تۇرىنەن ارنايى كورسەتىلىم سايىسى وتەدى, دەپ حابارلايدى Egemen.kz تۋريزم جانە سپورت مينيسترلىگىنىڭ Telegram پاراقشاسىنا سىلتەمە جاساپ.
V دۇنيەجۇزىلىك كوشپەندىلەر ويىندارىنىڭ اشىلۋ سالتاناتى «استانا-ارەنا» ستاديونىندا, جابىلۋى 10 مىڭ ادامدىق «قازانات» يپپودرومىندا وتەتىنى جوسپارلانعان. «قازانات» يپپودرومى اۋماعىندا «كوشپەندىلەر الەمى» ەتنواۋىلى قۇرىلادى.
ءبىر كۇندە 30 مىڭ كەلۋشىنى قابىلدايتىن ەتنواۋىلدا قازاقستان مەن الەم ەلدەرىنىڭ ۇزدىك قولونەر شەبەرلەرىنىڭ كورمە-جارمەڭكەسى, شەبەرلىك ساباقتارى, اقىندار ايتىسى مەن ءتول مادەنيەتىمىزدى پاش ەتەتىن قوسىمشا ءىس-شارالار ۇيىمداستىرىلادى.
V دۇنيەجۇزىلىك كوشپەندىلەر ويىندارىنىڭ ۇرانى – « ۇلى دالا ءدۇبىرى».