شىعىستا بىرنەشە اۋىل قار قۇرساۋىندا قالدى

جەرگىلىكتى بيلىك وكىلدەرىنەن العان اقپاراتقا سۇيەنسەك, قاروي, قاراشىلىك, توسقايىڭ, بۇعىمۇيىز جانە شاناعاتى اۋىلدارىنا كولىك قاتىناي المايدى. ءدال قازىر «وبلشىعىسجول» جشس قىزمەتكەرلەرى جەتى تەحنيكامەن جولدى اشىپ جاتىر. وبلىس ورتالىعىنان تاعى دا قوسىمشا تەحنيكا جولعا شىققان.

قار قۇرساۋى كولىك قوزعالىسىن شەكتەپ عانا قويماي, شالعاي اۋىلداعى ناۋقاسقا اسىققان مەديتسينا قىزمەتكەرلەرىنە دە قول بايلاۋ بولعانىن ايتۋىمىز كەرەك. وبلىستىق دەنساۋلىق ساقتاۋ باسقارماسىنىڭ مالىمەتىنە سۇيەنسەك, توسقايىڭ اۋىلىنىڭ 71 جاستاعى تۇرعىنى يشەميالىق ينسۋلت العان. كۇن رايى بۇزىلۋىنا بايلانىستى كولىك قوزعالىسى عانا شەكتەلگەن جوق, تىكۇشاقتىڭ ۇشۋىنا دا تىيىم سالىنعان-دى. سوندىقتان پاتسيەنتكە كومەك دەر كەزىندە كورسەتۋ مۇمكىن بولماعان.

دەگەنمەن, بۇگىن مارقاكول اۋدانى توسقايىڭ اۋىلىنداعى اۋىر ناۋقاسقا مەديتسينالىق كومەك كورسەتۋ ءۇشىن وبلىستىڭ باس رەانيماتولوگى, ساناۆياتسيانىڭ فەلدشەرى جولعا شىقتى. «كەشە ساناۆياتسيانىڭ باس رەانيماتولوگى, فەلدشەرى توتەنشە جاعدايلار دەپارتامەنتىنىڭ جول تالعامايتىن كولىگىمەن, بارلىق قۇرال-جابدىقتارمەن جابدىقتالعان كەشەنمەن بىرگە جولعا شىققان-دى. ولار قازىر ۇرىنحاي اۋىلىنا جەتتى, ەندى ارى قاراي تاعى 65 شاقىرىم جولدى ەڭسەرىپ, پاتسيەنتتىڭ اۋىلىنا بارۋعا ءتيىس. ناۋقاسقا بارلىق كومەك سول جەردە كورسەتىلەدى. ارى قاراي ەمىن قالاي الاتىنى دارىگەرلەر شەشىمىمەن انىقتالىپ, اۋدانارىق اۋرۋحاناعا نە وبلىس ورتالىعىنا جەتكىزىلەدى», دەپ مالىمدەدى سالالىق باسقارمادا.

قاتارداعى كولىكتەردى ايتپاعاندا تجد-ءنىڭ جول تالعامايتىن كولىكتەرى دە قالىڭ قاردان جۇرە الماي كىدىرىپ قالعان. سوعان قاراماستان جاۋاپتى ورىندار تابيعاتتىڭ توسىن مىنەزىمەن كۇرەسىپ, جولدى قاردان ارشۋ جۇمىستارى ۇزدىكسىز جۇرگىزىلىپ جاتىر. وسى ورايدا تۇرعىندار دا جاعدايعا تۇسىنىستىكپەن قاراپ, قار قۇرساۋىندا قامالىپ قالماۋ ءۇشىن جولعا شىقپاعانى ابزال.