بۇگىن قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىندا «جاس مەملەكەتتىك قىزمەتشى مەكتەبى» جوباسى اياسىندا وقىتۋ باستالدى. وعان ەلوردالىق جوعارى وقۋ ورىندارىنىڭ 3 جانە 4 كۋرس ستۋدەنتتەرى قاتىسىپ جاتىر, دەپ حابارلايدى Egemen.kz.
اكادەميا رەكتورى ەرلان ءابىلدىڭ ايتۋىنشا, جوبا مەملەكەتتىك قىزمەتكە جاڭا لەپ اكەلەتىن تالانتتى جاستاردى تارتۋ ماقساتىندا قولعا الىنعان.
«مەملەكەتتىك قىزمەتكە جاڭا بۋىن قاجەت. بىزگە يدەياسى بار, كرەاتيۆتى, تالانتتى, مەملەكەتتىك قىزمەتتە ىستەيمىن دەگەن نيەتى بار جاستار قاجەت. قازاقستاننىڭ ءوسىپ-وركەندەۋى سىزدەردىڭ بىلىمدەرىڭىزگە, پوتەنتسيالدارىڭىزعا, ەرىك-جىگەرلەرىڭىزگە بايلانىستى. جاس مەملەكەتتىك قىزمەتشى مەكتەبىندە وقۋ بارىسىندا قاتارلاستارىڭىزبەن توپتاسىپ, پىكىر الماسىپ, داعدىلارىڭىزدى ارتتىرا الاسىزدار», دەدى رەكتور جيىننىڭ اشىلۋ سالتاناتىندا.
2023 جىلى قازاقستان رەسپۋبليكاسى مەملەكەتتىك قىزمەت ىستەرى اگەنتتىگىمەن بىرلەسىپ ءبىر اپتالىق وقىتۋ باعدارلاماسى ازىرلەندى. وقىتۋ اياسىندا جاس تالانتتار جوبالىق باسقارۋدىڭ نەگىزدەرى جانە جوبانى ازىرلەۋ, ونى قورعاۋ, ءتيىمدى كوممۋنيكاتسيالار, پراكتيكالىق اناليتيكا, ستراتەگيالىق مەنەدجمەنت جانە كوشباسشىلىق جانە ت.ب. داعدىلاردى مەڭگەرەدى. مەملەكەتتىك باسقارۋ جۇيەسى, ادەپ كودەكسى بويىنشا پراكتيكالىق ساباقتار ءوتىپ, مەملەكەتتىك قىزمەت سالاسىنداعى كەيستەردى تالدايدى. وقىتۋ كۋرستارىن اكادەميانىڭ پروفەسسور-وقىتۋشىلار قۇرامى, پراكتيك ماماندار جۇرگىزەدى.
جوباعا ەكىنشى رەت قاتىسىپ وتىرعان ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 3-كۋرس ستۋدەنتى اياجان مەركىباي بولاشاقتا مەملەكەتتىك قىزمەتشى بولۋدى جوسپارلايتىنىن ايتتى.
«جاس مەملەكەتتىك قىزمەتشىلەر مەكتەبىندە وقۋعا بيىل ەكىنشى جىل قاتارىنان قاتىسىپ جاتىرمىن. ماقساتىم – الدىڭعى جىلى العان ءبىلىمىمدى بيىل جەتىلدىرۋ, داعدىلارىمدى ارتتىرۋ. قازىرگى تاڭدا اكادەميادا دارىستەرمەن قاتار, پراكتيكالىق ترەنينگتەر دە جۇرگىزىلىپ جاتىر. بۇگىن العاشقى ءدارىستى كوممۋنيكاتسيا تاقىرىبىنان باستادىق. سەبەبى قوعامدا ادامدار اراسىندا كوممۋنيكاتسيانىڭ جەتىسپەۋى كوپ بايقالادى. بولاشاقتا مەملەكەتكە قىزمەت ەتىپ, ەلىمىزدىڭ گۇلدەنۋى ءۇشىن بارىمىزدى سالامىز», دەدى مەملەكەتتىك جەرگىلىكتى باسقارۋ ماماندىعىنىڭ ستۋدەنتى.
اكادەميادا باعدارلامانى ءساتتى اياقتاعاننان كەيىن قاتىسۋشىلار مەملەكەتتىك ورگانداردا وندىرىستىك پراكتيكادان وتەدى.