سەناتتا «QAZAQ OXFORD DICTIONARY» سوزدىگى تانىستىرىلدى. 60 مىڭ ءسوز قامتىلعان 1 300 بەتتەن تۇراتىن باسىلىمدى «قازاق ءتىلى» حالىقارالىق قوعامى قازاقستان پرەزيدەنتى قاسىم-جومارت توقاەۆتىڭ تاپسىرماسى بويىنشا ازىرلەگەن, دەپ حابارلايدى Egemen.kz جوعارعى پالاتانىڭ ءباسپاسوز قىزمەتىنە سىلتەمە جاساپ.
الەۋمەتتىك-مادەني دامۋ جانە عىلىم كوميتەتىنىڭ توراعاسى نۇرتورە ءجۇسىپ ءىس-شارا بارىسىندا قازاق ءتىلىنىڭ الەمدەگى ەڭ تانىمال جانە بەدەلدى Oxford سوزدىگىمەن ءوزارا ءىس-قيمىلى مەملەكەتتىك ءتىلدى الەمدىك لينگۆيستيكالىق كەڭىستىككە شىعارۋعا ىقپال ەتەتىن ماڭىزدى جۇمىس ەكەنىن اتاپ ءوتتى.
«بۇل سوزدىك ءتىلىمىزدىڭ حالىقارالىق قولدانىس اياسىن كەڭەيتىپ, ءتۇرلى سالالارداعى تەرميندىك تۇسىنىكتەردىڭ مەملەكەتتىك تىلدە قالىپتاسۋىنا ىقپال ەتەدى. وزدەرىڭىزگە بەلگىلى, اۋدارما بيۋروسى راۋان كەنجەحان ۇلىنىڭ جەتەكشىلىگىمەن «100 كىتاپ» جوباسى اياسىندا الەمدىك ۇلكەن ەڭبەكتەردى قازاق تىلىنە اۋداردى. ولار بۇگىنگى تاڭدا جوعارى وقۋ ورىندارىندا كەڭىنەن پايدالانىپ جاتىر. بۇل سوزدىك تە سونداي ماعىنالى ەڭبەكتىڭ ءبىرى بولادى دەپ پايىمدايمىن», دەپ اتاپ ءوتتى سەناتور نۇرتورە ءجۇسىپ.
ءىس-شاراعا قر پارلامەنتى سەناتىنىڭ دەپۋتاتتارى, «قازاق ءتىلى» حالىقارالىق قوعامى» قوعامدىق بىرلەستىگىنىڭ پرەزيدەنتى راۋان كەنجەحان ۇلى, عالىمدار مەن ەلىمىزدىڭ ساراپشىلار قاۋىمداستىعىنىڭ وكىلدەرى قاتىستى.