قارجى ءمينيسترى ەرۇلان جاماۋباەۆ قارجى سەكتورىنداعى سوڭعى وزگەرىستەردى ءتۇسىندىرىپ, قوعامدا ەڭ كوپ تالقىلانىپ جاتقان ساۋالدارعا جاۋاپ بەردى, دەپ جازادى Egemen.kz.
سونىڭ ىشىندە مينيستر ءبىر تاۋارعا قولما-قول اقشا مەن ءموبيلدى اۋدارىم (كارتا, QR) كەزىندە ەكى ءتۇرلى باعا ۇسىناتىن كاسىپكەرلەردىڭ ءىسىن زاڭسىزدىق دەپ اتادى.
مينيستر مۇندايدا ءبىرىنشى كەزەكتە تۇتىنۋشىنىڭ قۇقىعى بۇزىلاتىنىن العا تارتتى. ول ساتىپ الۋشى وزىنە ىڭعايلى تاسىلمەن تولەم جاساپ, ءموبيلدى تولەم كەزىندە ارتىق اقشا سۇراتقان كاسىپكەردىڭ ۇستىنەن شاعىمدانۋعا قۇقىلى ەكەنىن ايتتى.
«قازاقستان رەسپۋبليكاسىندا تولەمدەر مەن تولەم جۇيەسى تۋرالى ارنايى زاڭ بار. ول جەردە تولەمدەردىڭ تۇرلەرى قولما-قول نەمەسە قولما-قولسىز اقشامەن دەپ كورسەتىلگەن. قولما-قولسىز اقشا بانكتىك كارتالار مەن QR ارقىلى تولەنەدى. ەگەر كاسىپكەرلەر تەك قانا قولما-قول اقشا تالاپ ەتسە, بۇل جەردە تۇتىنۋشىلاردىڭ قۇقىقتارى بۇزىلادى. سوندىقتان مۇنداي تالاپتار زاڭسىز دەپ ەسەپتەلەدى. قولما-قولسىز تولەم جاساعان كەزدە باعاعا ۇستىنە قوسىپ ساتۋ فاكتىلەرى تىركەلگەنى انىقتالىپ جاتىر. بۇل دا زاڭسىز. سەبەبى تاۋاردىڭ باعاسى قولما-قول اقشامەن, قولما-قول ەمەس تە ءبىر باعا بولۋ كەرەك. مۇنداي جاعدايلار بولسا ارنايى CALL ورتالىق 1414 نومەرىنە حابارلاسۋعا بولادى نەمەسە جەرگىلىكتى كىرىستەر كوميتەتىنىڭ ورگاندارىنا شاعىمدانسا ءبىز ونداي فاكتىلەردى تەكسەرىپ, ءتيىستى شارالار قابىلدايمىز», دەدى ەرۇلان جاماۋباەۆ.