ەلىمىزدە ۇزدىكسىز ينكليۋزيۆتى ءبىلىم بەرۋدىڭ ۇلتتىق ورتالىعى قۇرىلادى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
وقۋ-اعارتۋ ءمينيسترى عاني بەيسەمباەۆ الماتى قالاسىندا ارنايى جانە ينكليۋزيۆتى ءبىلىم بەرۋ ماسەلەلەرى بويىنشا عىلىمي قوعامداستىق پەن ۇكىمەتتىك ەمەس ۇيىمداردىڭ وكىلدەرىمەن كەزدەستى. 2024 جىلعا ارنالعان جۇمىس جوسپارى تۋرالى وقۋ-اعارتۋ مينيسترلىگى ارنايى جانە ينكليۋزيۆتى ءبىلىم دەپارتامەنتىنىڭ ديرەكتورى لاۋرا بۇتاباەۆا باياندادى.
«ەرەكشە ءبىلىم بەرۋ قاجەتتىلىكتەرى بار بالالارعا ەرتە كومەك كورسەتۋ ماقساتىندا بۇگىنگى تاڭدا پسيحولوگيالىق-پەداگوگيكالىق تۇزەتۋ كابينەتتەرىنىڭ سانىن ارتتىرۋ بويىنشا جۇمىس جۇرگىزىلۋدە. قازىر ەلىمىزدە 215 پپتك جۇمىس ىستەيدى, 2024 جىلى قوسىمشا 9 تۇزەتۋ كابينەتىن اشۋ جوسپارلانعان. قازىرگى كۇنى مەكتەپتەردە 700-دەن استام ينكليۋزيانى قولداۋ كابينەتى جۇمىس ىستەيدى, 2024 جىلى ولاردىڭ سانى تاعى 57 بىرلىككە ۇلعايادى. سونىمەن قاتار بيىل 14 پمپك اشىلادى. دوڭگەلەك ۇستەلدە ءسوز سويلەگەن وقۋ-اعارتۋ ءمينيسترى عاني بەيسەمباەۆ ينكليۋزيۆتى ءبىلىم بەرۋ جۇيەسىن دامىتۋ مەملەكەتتىك ساياساتتىڭ باسىم باعىتتارىنىڭ ءبىرى ەكەنىن اتاپ ءوتتى. بۇل باعىتتى دامىتۋدىڭ ماڭىزدىلىعىن تۇسىنە وتىرىپ 2023 جىلدىڭ جەلتوقسانىندا مينيسترلىك قۇرىلىمىندا ارنايى جانە ينكليۋزيۆتى ءبىلىم دەپارتامەنتى اشىلعانى» جازىلعان اقپاراتتا.
«ارنايى ءبىلىم ءار بالامەن جەكە جۇمىس ىستەۋدى, ءار بالاعا نازار اۋدارۋدى قاجەت ەتەدى. وسى ماقساتتا ۇلتتىق ۇزدىكسىز ينكليۋزيۆتى ءبىلىم بەرۋ ورتالىعىن ىسكە قوسۋ جوسپارلانىپ وتىر. سونىمەن قاتار ءبىز كادرلاردى دايارلاۋ جانە قايتا دايارلاۋ ماسەلەسىن قاراستىرامىز. سوندىقتان پەداگوگتەر وقىتاتىن جوعارى وقۋ ورىندارىنىڭ باعدارلامالارىنا «ينكليۋزيۆتى ءبىلىم بەرۋ» ء مودۋلىن قوسۋ جوسپارلانىپ, پەداگوگتەر ءۇشىن بىلىكتىلىكتى ارتتىرۋدىڭ جاڭا كۋرستارى ازىرلەنۋدە», دەدى عاني بەيسەمباەۆ.
جيىنعا قاتىسۋشىلار ۇلتتىق ورتالىق بالالارعا ءبىلىم بەرۋدى نىعايتاتىنىن ايتىپ, يگى باستامانى قولدادى.