بەت قاراتپايتىن ۇسكىرىك ايازى كوپ, قىسى قىتىمىر ولكەدە جىلۋ بەرۋ ماۋسىمىنا مۇقيات دايىندالۋ وتە ماڭىزدى. كەيىنگى جىلدارى شاعىن قالالاردىڭ شىرايى كەلمەي تۇرعانى بەلگىلى.
بيىلعى قىس بىردەن قىلىشىن سۇيرەتە, ادامداردىڭ اپشىسىن قۋىرا كەلدى. العاشقى كۇنى-اق وڭىردە 35-40 گرادۋس اياز اپتالاپ تۇرىپ الدى. جان بالاسىن اياۋدى بىلمەيتىن الاپات سۋىق جاز بويى جان جادىراتار جىلى سوزبەن قىمتالعان كەمشىلىكتىڭ بەتىن اشىپ, ايماڭداي كورسەتىپ بەردى دەسەك تە بولار. بۇل تاراپتا بيلىككە وكپەلەۋدىڭ ءجونى جوق. مەملەكەت باسشىسى قاسىم-جومارت توقاەۆتىڭ تاپسىرماسى بويىنشا كوكشەتاۋ جانە ستەپنوگور قالالارىنىڭ جىلۋمەن جابدىقتاۋ نىساندارىن جاڭعىرتۋ تۋرالى شەشىم قابىلدانعان ەدى. ستەپنوگور جىلۋ ەلەكتر ورتالىعىندا 4 قازاندىق, 5 تۋربيناعا اعىمداعى جوندەۋ جانە 2 قازاندىققا كۇردەلى جوندەۋ جۇرگىزىلدى. №2 جانە №5 تۋربينالاردىڭ قازاندىق اگرەگاتىن اعىمداعى جوندەۋ, №7 قازاندىق اگرەگاتىن كۇردەلى جوندەۋ جۇمىستارى قولعا الىندى. بۇعان قوسا جالپى ۇزىندىعى 3,1 شاقىرىم ماگيسترالدىق جەلىلەر جوندەلدى. «ستەپنوگورسك تەپلوترانزيت» سەرىكتەستىگىنىڭ ءوز قاراجاتى ەسەبىنەن 4 850 مەتردى قۇرايتىن جەلىلەر كۇردەلى جوندەۋدەن وتكىزىلدى. 540 مەتر جەلىنى اعىمداعى جوندەۋ, 45 مەتر جەلىدەگى جىلۋدى قالپىنا كەلتىرۋ جانە 1 سورعىنى اۋىستىرۋ جۇمىستارى ىسكە اسىرىلدى. ۇكىمەت رەزەرۆىنەن بولىنگەن 2 ملرد تەڭگەنىڭ ەسەبىنەن 3,1 شاقىرىم ماگيسترالدىق جەلىلەرگە جوندەۋ جۇرگىزىلدى. جاسالعان ۇنەم قوسىمشا 800 مەتر جەلىلەردى جوندەۋگە مۇمكىندىك بەردى.
بۇعان قوسا «ستەپنوگورسكايا تەتس» جانە «ستەپنوگورسك تەپلوترانزيت» سەرىكتەستىكتەرىنىڭ جەكە قارجىسى ەسەبىنەن جىلۋ-ەلەكتر ورتالىعىنىڭ جانە جىلۋمەن جابدىقتاۋ جەلىلەرىنىڭ قۇرال-جابدىقتارىنا 5,3 ملرد تەڭگەگە جوسپارلى جوندەۋ جۇرگىزىلدى.
بىلتىر جەلتوقساننىڭ 7-سىندە ستەپنوگور قالاسىنىڭ جىلۋ جەلىسىندە ءىرى اپات ورىن الىپ, قالانىڭ بىرنەشە شاعىن اۋدانى جىلۋسىز قالدى. «ستەپنوگورسك تەپلوترانزيت» سەرىكتەستىگىنىڭ جىلۋ تورابىنىڭ جارىلۋى سالدارىنان 3, 6, 7, 8 شاعىن اۋداندارى جىلۋ جەلىسىنەن تولىقتاي اجىراتىلدى. وسى اپاتتىڭ سالدارىنان 9 مىڭنان اسا ادام 30-35 گرادۋس ايازدا جىلۋسىز ءارى جارىقسىز قالدى. ءوڭىر باسشىسى مارات احمەتجانوۆتىڭ تىكەلەي تاپسىرماسىمەن جىلۋ جەلىسىن قالپىنا كەلتىرۋ جۇمىستارىن اتقارۋعا ءتيىستى جەدەل شتاب قۇرىلدى. شتاب قۇرامىنا اكىمدىك, توتەنشە جاعداي, دەنساۋلىق ساقتاۋ سالاسىنىڭ قىزمەتكەرلەرى مەن ەلدىڭ جايىن ويلاعان ەرىكتىلەر كىردى. از عانا ۋاقىتتىڭ ىشىندە اپات ورىن العان جىلۋ جۇيەسى جوندەلىپ, كوپقاباتتى ۇيلەرگە جىلۋ بەرىلە باستادى. ءۇش ەنەرگەتيكالىق, ءبىر ىستىق سۋ قازاندىعى قالپىنا كەلتىرىلدى. كوممۋنالدىق قىزمەت تاۋلىك بويى جۇمىس ىستەدى. جاۋاپتى مەكەمە قىزمەتكەرلەرى ءۇي ىشىندەگى جىلۋ جۇيەسىندەگى كەمشىلىكتى انىقتاۋ ءۇشىن مۇقيات جۇمىس جۇرگىزدى. پاتەردەگى جىلۋ جۇيەسىندە اقاۋ بولاتىن بولسا, پاتەر يەلەرى كووپەراتيۆتەرىنە جەدەل حابار بەرۋ تاپسىرىلدى.
قاراشا ايىندا ستەپنوگور قالاسىنىڭ اكىمى الپىسباي قايىرجانوۆ قالانىڭ جىلۋ جۇيەسىنە 5 ملرد تەڭگەگە جۋىق قارجى جۇمسالىپ, جىلۋ جۇيەلەرى مۇقيات جوندەۋدەن وتكىزىلگەنى تۋرالى حابارلاعان ەدى. ءبىر ايتا كەتەرلىگى, شاعىن قالانىڭ جىلۋ جەلىسى مۇلدە توزىپ تۇرعان. مامانداردىڭ ەسەپتەۋىنە قاراعاندا, شامامەن 80 پايىزى ابدەن ەسكىرگەن. ۇكىمەت رەزەرۆىنەن بولىنگەن قارجىعا 7,8 مىڭ شاقىرىمدىق ىشكى جىلۋ ماگيسترالى مەن وسى كولەمدەگى جىلۋ جۇيەسى كاسىپورىننىڭ ءوز ەسەبىنەن جوندەلگەنى تۋرالى دا ايتىلعان. ايتسە دە, ميللياردتاعان قارجى جۇمسالعان جىلۋ جەلىسى ارادا اي وتپەي اپاتقا ۇشىراۋى تۇسىنىكسىز. ستەپنوگور قالاسىنىڭ ىرگەسىندەگى زاۆودسكوي كەنتىنىڭ بىرنەشە شاعىن اۋدانىندا جىلۋ جۇيەسى جارىلىپ, حالىقتىڭ تۇرمىستىق تەحنيكاسى مەن قىرۋار دۇنيە-مۇلكى ءب ۇلىندى. تۇرعىن ۇيلەردىڭ قابىرعالارىنا سۋ ءسىڭىپ, ىلعال پايدا بولدى. كەيبىر ءۇي ىشىندە قاتىپ قالعان قۇبىرلاردى تۇرعىندار امالسىز ءوز قارجىلارىنا جوندەدى. ءدال وسى كەزدە حالىق «توتەنشە جاعداي» جاريالاۋ كەرەك, «ەكىباستۇزداعى جاعداي قايتالاندى», دەپ وكپە-نازىن ايتا باستادى.
قازىرگى كۇنى شاعىن قالانىڭ جىلۋ جۇيەسى قالپىنا كەلتىرىلگەن. ايتسە دە, قىرۋار قارجى بولىنگەن جۇمىستىڭ نەگە تىڭعىلىقتى اتقارىلماعانى سۇراق تۋعىزادى.
اقمولا وبلىسى,
ستەپنوگور قالاسى