تۇرعىن ءۇي قۇرىلىس كومپانيالارىنا قاراجات سالعان 540 اقتوبەلىك ۇلەسكەر بىرنەشە جىلدان بەرى پاتەرلەرىنە قول جەتكىزە الماي كەلەدى. بۇل ىستە جۇرتتىڭ 3,5 ملرد تەڭگەسىن يەلەنگەن 11 كومپانيانىڭ كىناسى بار.
الدانعان ۇلەسكەرلەر اراسىندا كەڭ دە جايلى پاتەرگە تەزىرەك قول جەتكىزۋ ءۇشىن جالعىز باسپاناسىن, كولىگىن ساتىپ, سودان بەرى پاتەر جالداپ جۇرگەندەر دە بار. قولىنداعى قارجىسى جەتپەگەن سوڭ قۇرىلىس كومپانيالارىنىڭ جارناماسىنا سەنىپ, بانكتەردەن پايىزدىق مولشەرلەمەسى جوعارى نەسيە الىپ قارجى قوسقاندار دا بار.
وڭىردەگى الەۋمەتتىك جانجالعا اكەلە جاتقان كۇردەلى ماسەلەنى جەرگىلىكتى بيلىك بيۋدجەت جانە ينۆەستورلار قاراجاتىن تارتۋ ارقىلى شەشۋدى جوسپارلاۋعا كىرىستى. ەڭ الدىمەن, جەرگىلىكتى اتقارۋشى بيلىك پەن قۇقىق قورعاۋ ورگاندارى وكىلدەرىنەن قۇرالعان ۆەدومستۆوارالىق توپ قۇرىلىپ, جوسىقسىز قۇرىلىس كومپانيالارى ىسىمەن قۇقىق قورعاۋ ورگاندارى اينالىسا باستادى. قازىرگى كەزدە جۇرتتىڭ قارجىسىن جوق قىلعان بەس سەرىكتەستىك باسشىلارىنىڭ ۇستىنەن قىلمىستىق ءىس قوزعالسا, التى تۇرعىن ءۇي قۇرىلىسىنا بايلانىستى ءىس سوتقا جولداندى.
ء«ارتۇرلى سەبەپپەن قۇرىلىستى كەشىكتىرگەن 11 جوسىقسىز كومپانيانىڭ ۇستىنەن قۇقىق قورعاۋ ورگاندارى اكىمشىلىك جانە قىلمىستىق ءىس قوزعادى. بىزگە بەلگىلى بولعانى, التى تۇرعىن ءۇي كەشەنىنە سالىنعان ۇلەسكەرلەر قارجىسىن قۇرىلىسقا ەمەس, باسقا ماقساتتارعا جۇمساعان. جوسىقسىز مەردىگەرلەر اراسىندا ءبىر ادامعا تيەسىلى پاتەردى بىرنەشە ادامعا قايتا ساتقان قۇرىلىس يەلەرى دە بار. ۇلەسكەرلەر قالايدا باسپانالارىن الۋعا ءتيىس. وسى ماقساتتا التى تۇرعىن ءۇي كەشەنى قۇرىلىسىنا ينۆەستور ىزدەپ وتىرمىز», دەيدى ۇلەسكەرلىك قۇرىلىستاردى رەتتەۋ ءۇشىن قۇرىلعان «اقتوبە قۇرىلىس كومپانياسى» جشس باسشىسى ناعىمجان الدياروۆ.
«ۇلەسكەرلىك قۇرىلىس بويىنشا سوتقا جولدانعان اكىمشىلىك جانە قىلمىستىق ىستەردىڭ شەشىمى شىققان سوڭ اياقتالماعان, سالىنباعان, جارتىلاي اياقتالعان تۇرعىن ءۇي نىساندارىنا ساراپتاما جۇرگىزىلىپ, سودان كەيىن قۇرىلىستاردىڭ جوبالىق-سمەتالىق قۇجاتتارى جاسالادى. جاسىراتىنى جوق, وسى كۇنى داۋلى قۇرىلىستارعا ينۆەستور تابۋ وڭاي ەمەس. ولار قوسىمشا پايدا تاپپايتىن بولسا, بۇل جاققا اتتاپ باسپايدى. ۇلەسكەرلىك قۇرىلىستى اياقتايتىنداردىڭ قىزىعۋشىلىعىن تۋعىزۋ ءۇشىن قوسىمشا جەر تەلىمدەرىن بەرۋدى جوسپارلادىق. تاعى ءبىر جولى – بۇرىن بەس قاباتتى ەتىپ جوسپارلانعان كوپپاتەرلى قۇرىلىستى توعىز قاباتتى ەتىپ قايتا جوبالايمىز. ونىڭ قۇرىلىسى اياقتالعان سوڭ بەس قاباتىنداعى پاتەرلەر ۇلەسكەرلەرگە بەرىلسە, قالعانىن كومپانيا ساتىلىمعا شىعارىپ, شىعىندارىن جابا الادى», دەيدى اقتوبە قالاسىنىڭ اكىمى ازامات بەكەت.
ۇلەسكەرلىك قۇرىلىستى اياقتايتىن «اقتوبە قۇرىلىس كومپانياسى» سەرىكتەستىگى استاناداعى «ەلوردا قۇرىلىس كومپانياسى» جشس تاجىريبەسىمەن قۇرىلعان. ازىرشە اقتوبەدەگى 540 ۇلەسكەردىڭ باسپاناسىن اياقتاۋعا جەرگىلىكتى بيۋدجەتتەن قانشا قارجى بولىنگەنى بەلگىسىز.
اقتوبە وبلىسى