باتىس قازاقستان وبلىسىندا ءىرى جول اپاتى ورىن الىپ, ءۇش ادام قايتىس بولدى, دەپ حابارلايدى Egemen.kz.
بقو پوليتسيا دەپارتامەنتىنىڭ ءباسپاسوز قىزمەتى جازعانداي, وقيعا 7 قاڭتار كۇنى بايتەرەك اۋدانى يانايكين اۋىلى تۇسىندا بولدى.
«ورال-اتىراۋ جولىنىڭ 62-شاقىرىمىندا ساعات 13.30-دا «شەۆرولە نەكسيا» اۆتوكولىگىنىڭ جۇرگىزۋشىسى رۋلگە يە بولا الماي, قارسى بەتكە شىعىپ كەتكەن. سالدارىنان «تويوتا يپسۋم» اۆتوكولىگىمەن بەتپە-بەت سوقتىعىسۋعا جول بەرگەن. جول اپاتى سالدارىنان قوس اۆتوكولىكتىڭ جۇرگىزۋشىسى مەن «شەۆرولە نەكسيادا» وتىرعان جولاۋشى وقيعا ورنىندا قازا تاپتى. مايىتتەر سوت-مەديتسينالىق ساراپتاماعا جىبەرىلدى. وعان قوسا زارداپ شەككەندەر وبلىستىق كوپبەيىندى اۋرۋحاناعا جەتكىزىلدى. اتالعان دەرەك بويىنشا قر قك 345-بابى 4-بولىگىنە سايكەس سوتقا دەيىنگى تەرگەۋ امالدارى باستالدى», دەپ حابارلادى ۆەدومستۆودان.