مەملەكەتتىك كەڭەسشى ەرلان قارين ىشكى ساياسات سالاسى بويىنشا مەملەكەتتىك ورگانداردىڭ ءوزارا ءىس-قيمىل ماسەلەلەرى جونىندە كەڭەس وتكىزدى.
جيىنعا پرەزيدەنت اكىمشىلىگىنىڭ جاۋاپتى قىزمەتكەرلەرى جانە قۇرىلىمدىق بولىمشەلەرىنىڭ جەتەكشىلەرى, مادەنيەت جانە اقپارات, عىلىم جانە جوعارى ءبىلىم, وقۋ-اعارتۋ, تۋريزم جانە سپورت مينيسترلىكتەرىنىڭ, قازاقستان حالقى اسسامبلەياسىنىڭ, ورتالىق كوممۋنيكاتسيالار قىزمەتىنىڭ جانە قازاقستاننىڭ ستراتەگيالىق زەرتتەۋلەر ينستيتۋتىنىڭ باسشىلارى قاتىستى.
كەڭەس بارىسىندا ە.قارين مەملەكەت باسشىسىنىڭ «Egemen Qazaqstan» گازەتىندە جارىق كورگەن سۇحباتىندا ايتىلعان باسىم باعىتتارعا سايكەس ىشكى ساياسات سالاسىندا قىزمەت ەتەتىن قۇرىلىمداردىڭ نەگىزگى مىندەتتەرىن ايقىندادى.
مەملەكەتتىك كەڭەسشى ۇلتتىق قۇرىلتايدىڭ كەزەكتى وتىرىسىن ۇيىمداستىرۋ جانە ونى مازمۇن تۇرعىسىنان تولىقتىرۋ, ناۋرىز مەيرامىن جاڭا سيپاتتا مەرەكەلەۋ, قازاقستان تاريحىنىڭ جاڭا اكادەميالىق جيناعىن ازىرلەۋ جۇمىستارىن اياقتاۋ, دۇنيەجۇزىلىك كوشپەلىلەر وينىن وتكىزۋ, باسقا دا ايتۋلى ءىس-شارالاردىڭ جاي-جاپسارىن پىسىقتاۋ ماسەلەلەرىنە بولەك توقتالدى.
جيىن سوڭىندا ە.قارين قۇزىرلى مەملەكەتتىك ورگاندارعا ىشكى ساياسات باعىتىنداعى جۇمىستاردى جەتىلدىرۋگە, قوعامدىق كەلىسىمدى نىعايتۋعا قاتىستى ناقتى تاپسىرمالار بەردى.