سەناتتىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى نۇرتورە ءجۇسىپ ەنەرگەتيكا مينيسترلىگىنە قاراستى يادرولىق فيزيكا ينستيتۋتىنىڭ باسشىلىعىمەن جانە عالىمدارىمەن كەزدەستى.
سەناتور وتكەن جىلى پارلامەنت قابىلداعان عىلىم سالاسى قىزمەتكەرلەرىنىڭ الەۋمەتتىك كەپىلدىكتەرىن نىعايتۋعا باعىتتالعان زاڭدار تۋرالى ايتىپ بەردى. دەپۋتات سونداي-اق ينستيتۋتتىڭ ماتەريالدىق-تەحنيكالىق بازاسىمەن, يادرو بولشەكتەرىن زەردەلەۋگە قاجەتتى قۇرالدار جانە جابدىقتارمەن, ونى ءىس جۇزىندە قولدانۋ بارىسىمەن تانىستى. دەپۋتات يادرولىق فيزيكا سالاسىنداعى كادرلاردى قايتا دايارلاۋ ماسەلەسىنە ەرەكشە نازار اۋداردى.
«يادرولىق فيزيكا ينستيتۋتى قۇرىلعاننان بەرگى تاريحى وتە باي جانە ينستيتۋت بازاسىندا جۇزەگە اسىپ جاتقان ستراتەگيالىق جوبالاردىڭ ماڭىزى زور. تيىسىنشە, ينستيتۋتتى ساپالى كادرلارمەن تولىقتىرۋ ماسەلەسى جانە ولاردى قايتا دايارلاۋ مەكەمەنىڭ باستى مىندەتى بولۋعا ءتيىس», دەدى سەناتور.
كەزدەسۋگە قاتىسۋشىلار بۇگىنگى تاڭدا ەلىمىزدىڭ حالقى اراسىندا كەڭىنەن تالقىلانىپ جاتقان اتوم ەلەكتر ستانساسىن سالۋ تاقىرىبىن دا قوزعادى. اتوم ەلەكتر ستانساسىن سالۋ, ونى قاۋىپسىز پايدالانۋ جانە ونىڭ ەلىمىزگە تيگىزەتىن پايداسى ماسەلەسىنە ەلىمىزدىڭ ازاماتتارى قاتتى الاڭدايتىنى اتاپ ءوتىلدى.
«مەملەكەت باسشىسى جاقىندا «ەgemen Qazaqstan» گازەتىندە جاريالانعان سۇحباتىندا اتاپ وتكەندەي, اتوم ەلەكتر ستانساسىن سالۋ – ءبىزدىڭ ەكونوميكامىزدىڭ بولاشاعى مەن ەنەرگەتيكالىق قاۋىپسىزدىگىمىز ءۇشىن ماڭىزدى ماسەلە. قۇرىلىس ماسەلەسى بويىنشا ءتيىستى قوعامدىق تىڭداۋلار وتكىزىلەتىن بولادى. ينستيتۋت بۇل ماسەلە بويىنشا ارقاشان الدىڭعى قاتاردا بولۋعا ءتيىس جانە بەتكە ۇستار مەكەمە رەتىندە ارەكەت ەتۋى كەرەك دەپ سانايمىن», دەدى نۇرتورە ءجۇسىپ.
كەزدەسۋ بارىسىندا ينستيتۋتتا اەس ءۇشىن ماماندار دايارلاۋعا ارنالعان بارلىق قاجەتتى ينفراقۇرىلىم, اتاپ ايتقاندا, ۆۆر-ك ستاتسيونارلىق زەرتتەۋ رەاكتورى, شۇعىل ارەكەت تاقتاسى, سان ءتۇرلى ۇدەتكىشتەر بار ەكەنى, سونداي-اق ءۇش وقۋ ورتالىعى جۇمىس ىستەيتىنى اتاپ ءوتىلدى.