شىمكەنتتە جاڭا گۇلزار اشىلدى. كەزىندە شاعىن ساياباق بولعان اۋماق 90-جىلدارى جەكەنىڭ قولىنا ءوتىپ كەتىپ, ول جەرگە ساۋدا ورىندارى جايعاسقان بولاتىن. بۇل دۇڭگىرشەكتەر مەن ساۋدا, ءتىپتى بىرنەشە قاباتتى ساۋدا عيماراتى جانىندا تۇرعان كوپقاباتتى ءۇي تۇرعىندارىنا تەگى قولايسىزدىق تۋدىراتىن. قالانىڭ ءال-فارابي اۋدانى اكىمدىگىنە قاراستى وسى اۋماقتى قايتادان بۇرىنعى «سپۋتنيك» شاعىن ساياباعى ەتۋ جونىندە تۇرعىندار شاھار باسشىسى عابيت سىزدىقبەكوۆپەن بولعان ەسەپتى كەزدەسۋىندە وزەكتى ماسەلە رەتىندە كوتەرگەن ەدى.
وسىلايشا, پرەزيدەنت قاسىم-جومارت توقاەۆتىڭ باستاماسىمەن قولعا الىنعان «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ ماقساتىندا حالىقتىڭ تالاپ-تىلەگى ورىندالىپ, بىرنەشە ايدىڭ كولەمىندە كىشىگىرىم بازاردىڭ ورنىنا ءاپ-ادەمى, ەرەكشە ساۋلەتپەن سالىنعان گۇلزار پايدا بولىپ, كۇنى كەشە حالىق يگىلىگىنە بەرىلدى. شاعىن ساياباقتىڭ اشىلۋ سالتاناتىنا قالا اكىمى عابيت سىزدىقبەكوۆ تە قاتىستى. ول ساۋدا نىساندارى جايلاپ العان بۇرىنعى گۇلزاردىڭ ورنى قايتادان جاسىل جەلەككە اينالىپ, جايقالعان, قۇلپىرعان ساياباق بولعانىنا ەرەكشە قۋانىشتى ەكەنىن جەتكىزدى.
ال جەكەشەلەندىرۋ كەزىندە وسى جەردى يەلەنىپ كەتكەن كاسىپكەرگە قالا اكىمدىگى باسقا اۋماقتان جەر تەلىمىن قاراستىردى. سونىمەن بىرگە جەر يەسىنە قوسىمشا وتەماقىلار تولەندى. گۇلزاردىڭ اۋماعى جارتى گەكتار جەردى قۇرايدى. ول قالا اكىمدىگىنىڭ قولداۋىمەن ءارى دەمەۋشىلەر ەسەبىنەن سالىندى. قۇرىلىس مەرزىمى ءبىر اي ۋاقىتتى العان. شاعىن ساياباقتا 7 ءتۇرلى ساندىك تالدىڭ جۇزگە جۋىق كوشەتى ەگىلدى. كەلەشەكتە ساياباقتا قايىڭ, اكاتسيا, شىنار, ەمەن, تالشىن تالدارى جايقالىپ ءوسىپ, ادامدارعا ءوزىنىڭ سايالى كولەڭكەسىن سىيلايدى. قىسى-جازى جاسىل ءتۇسى وزگەرمەگەن قىلقان جاپىراقتى تالدار دا ساياباقتىڭ ءسانىن اشادى. سونىمەن بىرگە گۇلزاردا حاي-تەك ستيلىندەگى شامدار, كوپشىلىككە ارنالىپ سالىنعان باستىرمالار, اتكەنشەكتەر ورناتىلدى. بۇدان بولەك, ەكى مىڭ شارشى مەتر اياقجولعا ءمارمار تاستار, ءدال وسىنداي اۋماققا شىم توسەلدى. گۇلزار ماڭىنداعى كوپقاباتتى ءۇيدىڭ قاقپاسى پەتروگليفتەرمەن ارلەنگەن.
ەڭ باستىسى, قالانىڭ قاراپايىم تۇرعىندارى دەمالىس ايماعىنىڭ بوي كوتەرگەنىنە ءدان ريزا. كۇن سايىن كەشكى ۋاقىتتا قىدىراتىن, دەمالاتىن جەر كەرەك. اسىرەسە نەمەرەسىن جەتەكتەگەن اتا-اجەلەرگە ءۇيىنىڭ جانىنان ورىندىعى قاز-قاتار تىزىلگەن, تال-تەرەگى اينالاسىنا كولەڭكەسىن تۇسىرگەن سايالى ورىنداردىڭ بولعانى قاجەت-اق. كىشكەنتاي بالالار ءۇشىن دە الىسقا ۇزاماي اتا-اناسىنىڭ كوز الدىندا ويناپ جۇرگەنى جاقسى. بۇرىنعى ورنىنان قايتا اشىلعان «سپۋتنيك» گۇلزارى ەندى حالىقتىڭ سول سۇرانىسىن تولىق قاناعاتتاندىرادى.
الداعى ۋاقىتتا دا «حالىق قاتىساتىن بيۋدجەت» باعدارلاماسى بويىنشا شاھاردىڭ ساياباق قۇرىلىسىنا ىڭعايلى كەز كەلگەن اۋماعىنان تۇرعىنداردىڭ ءوتىنىشى بويىنشا گۇلزارلار اشىلاتىن بولادى. جاسىل جەلەك – قالانىڭ «وكپەسى», سوندىقتان ساياباقتىڭ كوبەيگەنى ميلليوننان استام حالقى بار مەگاپوليس ءۇشىن ەكولوگيالىق باستى قاجەتتىلىك بولىپ تابىلادى. جالپى, «شىمكەنت – جاسىل قالا» دەگەن ءسوز تىركەسى باياعىدان حالىق اۋزىندا جاتتالىپ قالعان. وسى ۇعىمدى شىن مانىندە جۇزەگە اسىرۋ بۇگىنگى قالا اكىمدىگىنىڭ باستى ستراتەگيالىق جوسپارىنا اينالىپ وتىر.
شىمكەنت