كەيىنگى جىلدارى ەلىمىزگە الىس-جاقىن شەتەلدەردەن ءتۇرلى انشىلەر ءجيى كەلە باستادى. ءبىر جاعىنان قۋانتارلىق جاڭالىق. ەندى شە, بۇرىنعىداي ەمەس شارتاراپتىڭ تۇكپىر-تۇكپىرىندەگى ونەر يەلەرى قازاق ەلىن تاني باستادى دەگەن ءسوز.
مىسالى, كەيىنگى جىلدارى توعىزىنشى تەرريتورياعا كەلىپ ءان شىرقاعان شەتەلدىكتەردىڭ ەسىمىنەن ات ۇركەدى. الىسقا بارماي-اق قويالىق. كۇنى كەشە ەلىمىزدە 2000-جىلدارى شارتاراپقا تانىلعان Akon, 50 Cent سەكىلدى رەپەرلەر كونتسەرت قويدى. ولاردى كورۋگە جينالعان حالىقتا ەسەپ جوق. بيلەت قۇنى دا ارزان ەمەس. ەندەشە, تانىمال جۇلدىزداردىڭ ەلىمىزگە ءجيى كەلۋى جالپى حالىقتىڭ ءال-اۋقاتىنىڭ جاقسارا باستاعانىن دا بىلدىرەدى. ايتپەسە, قوماقتى قاراجاتتى ەكىنىڭ ءبىرى ساناپ بەرە الماسى تۇسىنىكتى عوي.
شەتەلدەردەن انشىلەر شاقىرۋدى قولدامايتىندار دا بار. بىرىنشىدەن, ولاردىڭ «گونورارى» از ەمەس. اسىرەسە مۇحيتتىڭ ارعى بەتىنەن ات تەرلەتىپ كەلەتىندەر دوللاردى شىتىرلاتىپ ساناپ الاتىنى بەلگىلى. جەكە ادامدار وتباسىلىق تويلارىنا شاقىرىپ جاتسا مەيلى ەكەن. الايدا ەلىمىزدەگى كونتسەرتتى ۇيىمداستىرۋشىلاردىڭ تالعامسىز شاقىرۋى قانشالىقتى ورىندى دەگەن زاڭدى ساۋال تۋىندايدى.
ەكىنشىدەن, Akon نە 50 Cent سەكىلدى انشىلەر كەزىندە اتاعى شىعىپ, دۇرىلدەپ تۇرعانىمەن, بۇگىندە ساحناعا ءجيى شىعىپ, تىڭدارماندارىن قۋانتىپ جۇرگەن جوق. بىلايشا قارابايىر تىلمەن ايتقاندا, «زەينەتكە شىققان» ونەر جۇلدىزدارى. ەندەشە, كەزىندە تانىلعان, بىراق قازىر كوپشىلىك نازارىنان تاسا انشىلەردى شاقىرۋدىڭ قاجەتى قانشا؟
ۇشىنشىدەن, جوعارىدا اتى اتالعان ونەر جۇلدىزدارىن كۇمىس كومەي ءانشى, ونەر الەمىنىڭ ناعىز مايتالمانى دەپ ايتۋ قيىن. راس, ولاردى ستۋدەنتتىك شاعىمىزدا راديودان دا, ماگنيتوفوننان دا ءجيى تىڭدادىق. بالكىم, ولاردى ءوز كوزىمىزبەن كورۋ ءبىزدىڭ قۇرداستارىمىزدىڭ جاستىق شاعىن ساعىنا ەسكە الۋىنا مۇمكىندىك بەرەتىن شىعار...
ولار ديماش قۇدايبەرگەن, Sia سەكىلدى ەرەكشە داۋسىمەن, شاكيرا سەكىلدى مىڭ بۇرالعان بيىمەن تانىلعان ەمەس. اندرەا بوچچەلي سەكىلدى كلاسسيكالىق ءھام وپەرالىق مۋزىكانىڭ مايتالمانى ەمەس. بار-جوعى كەزىندە حيتكە اينالعان رەپ جانرىندا اتى شىققان ونەر جۇلدىزدارى. ءتىپتى Eminem نە Doctor Dre سەكىلدى رەپ جانرىنىڭ بەتكە ۇستارى دا سانالمايدى.
تورتىنشىدەن, Akon دا, 50 Cent تە ولەڭدەرىندە بەيادەپ سوزىمەن ەستە قالعان. مىسالى, سەنەگالدىق ءانشىنىڭ «Smack that» ءانىنىڭ ماعىناسى تىم تۇرپايى. «ەلۋ تيىن» دا بۇل تۇرعىدا ەشكىمنەن قالىسپايدى. ونىڭ «Candy shop», «P.I.M.P», «In da club» اندەرى دە تۇنىپ تۇرعان ەروتيكالىق سيپاتتا. ەندەشە, قىلمىستى, ادەپسىزدىكتى ناسيحاتتايتىن ونەر جۇلدىزدارىن ەلىمىزگە شاقىرۋدىڭ قانشالىقتى قاجەتى بار؟
ايتپاقشى, بۇل ماسەلە قوعام نازارىنان تىس قالعان جوق. ءماجىلىس دەپۋتاتى, بەلگىلى ايتىسكەر اقىن امانجول ءالتاي وسىعان بايلانىستى دەپۋتاتتىق ساۋال جولدادى. وندا ەلىمىزگە گاسترولمەن كەلەتىن شەتەلدىك انشىلەر مەن شوۋمەندەرگە, «اڭقاۋ ەلگە ارامزا مولدا» بولىپ جۇرگەن ارزانقول اقىل ساۋدالاعىش ءتۇرلى كوۋچتەرگە ەشقانداي تالعاۋسىز ەسىگىمىزدى ايقارا اشىپ قويعانىمىزعا قىنجىلىس ءبىلدىردى.
«كۇنى كەشە عانا استانادا وتكەن ەيكوننىڭ كونتسەرتىنە بايلانىستى بىرنەشە اسپەكتىلەرگە توقتالايىن. بىرىنشىدەن, كونتسەرت كەزىندە جانكۇيەر جاستار انشىگە ءىش كيىمىن لاقتىرىپ, تومەن مورالدىق مىنەز-ق ۇلىق كورسەتتى, ەلىمىزدىڭ بەدەلىنە نۇقسان كەلتىردى. بۇل – جاستار تاربيەسىنىڭ السىزدىگى. ەكىنشىدەن, ۇلتتىق وزەگى ءالسىز, وزگەنى ءپىر تۇتقىش جاستار اندەردىڭ كونتەكسىندە بايقالاتىن گەندەرلىك كەمسىتۋشىلىك ماسەلەسىن, قىزداردىڭ نامىسىن, ابىرويىن قورلايتىن تەرىس مازمۇنىن اڭعارماي ەسى كەتتى. ۇشىنشىدەن, «Smack that» ءانىنىڭ ماتىنىنەن ەروتيكالىق سيپاتتاعى ءناپسىنى قوزدىرۋعا يتەرمەلەيتىن, سانانى لايلاپ, تاربيەگە تەرىس اسەر ەتەتىن قاۋىپتى مازمۇندى اڭعارامىز. تورتىنشىدەن, ۇيىمداستىرۋشىلاردىڭ ءانشىنى ۇلتتىق كيىممەن قارسى الىپ, دومبىرا سىيلاعاندارى تىپتەن ورىنسىز دەپ سانايمىن», دەيدى ا.ءالتاي.
دەپۋتات سىنى ورىندى. Akon سەكىلدى رەپ انشىلەردىڭ جەزوكشەلىك پەن ايەلدەردى قورلاۋدى ناسيحاتتايتىنىن ولەڭ سوزدەرىنەن اڭعارۋ وڭاي. ءتىپتى 50 Cent كەزىندە تۇرمىستىق زورلىق-زومبىلىق جاسادى دەگەن كۇدىكپەن تۇتقىنعا الىنعان. ال Akon كوپ ايەل الۋدى جاقتاپ سۇحبات بەرگەنى دە ەسىمىزدە.
وسىندايدا ولارعا ۇلتتىق كيىم كيگىزىپ, دومبىرا سىيلاۋ قانشالىقتى ورىندى؟ قازاق قوناقجاي حالىق ەكەنى تۇسىنىكتى. بىراق قوناقجايلىقتىڭ دا شەگى بولۋى قاجەت ەمەس پە؟ ونىڭ ۇستىنە تۇرمىستىق زورلىق-زومبىلىق ءورشىپ تۇرعان ساتتە سونى ناسيحاتتايتىن ونەر جۇلدىزدارىن باسقا شىعارۋدىڭ نە قاجەتى بار؟ بالكىم, دەپۋتات امانجول ءالتاي ايتقانداي, شەتەل ارتىستەرىن تاڭداۋدا قاتاڭ تالاپ ەنگىزۋ قاجەت شىعار.