كەيىنگى جىلدارى اتىراۋ وبلىستىق بالالار اۋرۋحاناسىندا كۇردەلى وپەراتسيالار ءجيى جاسالىپ ءجۇر. اۋرۋحانا ديرەكتورى نۇرعابىل ايتمۇحانبەتوۆتىڭ دەرەگىنە سۇيەنسەك, بىلتىر 11 ايدا – 3 480, ونىڭ ىشىندە 1 933 (55%) وپەراتسيا شۇعىل تۇردە جاسالعان.
وتكەن جىلى مۇندا «شۇعىل بالالار حيرۋرگياسى» جوباسى ىسكە قوسىلدى. جاقىندا اتالعان جوبا اياسىندا اكادەميك س.دولەتسكي اتىنداعى رەسەي مەديتسينالىق ۇزدىكسىز كاسىپتىك ءبىلىم بەرۋ اكادەمياسىنىڭ كافەدرا مەڭگەرۋشىسى, مەديتسينا عىلىمدارىنىڭ دوكتورى يۋري سوكولوۆ ناۋقاس بالالارعا كۇردەلى بەس وپەراتسيا جاسادى. رەسەيلىك حيرۋرگ بۇعان دەيىن الماتى, اقتاۋ, سەمەي قالالارىندا شەبەرلىك ساعاتىن وتكىزگەن ەكەن. ال اتىراۋعا العاش رەت كەلۋى.
«شەبەرلىك ساعاتى كۇردەلى وپەراتسيالاردى زاماناۋي تەحنولوگيانىڭ كومەگىمەن جاساۋ, جەرگىلىكتى مامانداردىڭ بىلىكتىلىگىن ارتتىرۋ ماقساتىندا وتكىزىلدى. مۇندا زاماناۋي مەديتسينالىق جابدىقتار بار. بەس وپەراتسيا جاسادىم. اتىراۋلىق دارىگەرلەرگە ءار وپەراتسيانىڭ كۇردەلىلىگى, ماڭىزى جونىندە تاجىريبەممەن ءبولىسىپ, تولىق اقپارات بەردىم. جالپى, مەديتسينا سالاسى جاڭاشىلدىقتى تالاپ ەتەدى. الداعى ۋاقىتتا اۋرۋحانالار جاڭا تەحنولوگيالارمەن تولىقتىرىلىپ, دارىگەرلەر ءبىلىمىن ۇدايى جەتىلدىرگەنى ءجون», دەيدى يۋ.سوكولوۆ.
وبلىستىق بالالار اۋرۋحاناسىنىڭ ديرەكتورى ن.ايتمۇحانبەتوۆتىڭ ايتۋىنا قاراعاندا, رەسەيلىك بالالار حيرۋرگى ەمدەۋ تاسىلدەرىن جەرگىلىكتى دارىگەرلەرگە ۇيرەتكەن. وپەراتسيانىڭ ءبارى ءساتتى بولعان. قازىر وپەراتسيا جاسالعان بالالاردىڭ جاعدايى قالىپتى, دارىگەرلەردىڭ ءجىتى باقىلاۋىنا الىنعان.
«كۇردەلى وپەراتسيا 3-15 جاستاعى بالالاردىڭ اسقازان-ىشەك جولدارى دياگنوزىمەن جاسالدى. ءبىر بالانىڭ گەموليتيكالىق انەمياسى بار. وپەراتسيا كەزىندە كوكباۋىر كيستاسى الىنىپ تاستالدى. تاعى ءبىر بالاعا ءوت جولدارىنىڭ اقاۋى دياگنوزى قويىلعان. بالالاردىڭ ءبارى وپەراتسيادان كەيىنگى وڭالتۋ كەزەڭىنەن ءوتىپ جاتىر», دەيدى بالالار اۋرۋحاناسى حيرۋرگيا ءبولىمىنىڭ مەڭگەرۋشىسى گۇلميرا مەرعازيەۆا.
ال «قازاقستان رەسپۋبليكاسى پرەزيدەنتى ءىس باسقارماسىنىڭ مەديتسينالىق ورتالىعى» اۋرۋحاناسىنىڭ دارىگەرلەرى, كارديوحيرۋرگ الىبەك تويباەۆ, كارديوانەستەزيولوگ اقەركە بەكسەيىتوۆا جانە پەرفۋزيولوگ جانىبەك ءاشىروۆ شەبەرلىك ءدارىسىن وتكىزدى. ەلوردالىق دارىگەرلەر MIDCAB ادىسىمەن بەس وپەراتسيا جاسادى.
«مIDCAB – جۇرەكتىڭ الدىڭعى قابىرعاسىندا ورنالاسقان ۇلكەن كورونارلىق تامىردىڭ بىتەلۋىنە بايلانىستى قولدانىلاتىن ءادىس. بۇل وپەراتسيا كەۋدەنى تۇگەل اشپاي, جۇرەك تۇسىنان تەسۋ ارقىلى جاسالادى. كورونارلىق تامىردىڭ بىتەلۋى – جۇرەك تالماسىنا ۇشىراتاتىن نەگىزگى سەبەپتىڭ ءبىرى. ال مIDCAB ادىسىمەن وپەراتسيا جاسالعان ناۋقاس بىرنەشە كۇننەن سوڭ تەز قالپىنا كەلەدى», دەيدى ءا.تويباەۆ.
ونىڭ ايتۋىنشا, مIDCAB ءادىسى كۇندەلىكتى تاجىريبەدە قولدانۋعا جەڭىل ءارى ناۋقاستاردىڭ ستاتسيوناردا ەم الۋ ۋاقىتىن قىسقارتادى. سونداي-اق كۇردەلى كارديولوگيالىق وپەراتسيالاردان ساقتانۋعا مۇمكىندىك بەرەدى.
اتىراۋ وبلىسى