جارىلىستان ءۇش ادام قازا تاپتى

4 قاڭتارعا قاراعان ءتۇنى 02:07 ساعات شاماسىندا ورال قالاسى, سىرىم دات ۇلى كوشەسىندە ور­نالاسقان ءدامحانادا گاز جا­رىلعانى تۋرالى حابارلاندى.

وقيعا ورنىنا قۇتقارۋ قىز­مەتى جەدەل جەتىپ, زارداپ شەك­كەندەرگە كومەككە ۇمتىل­دى. باتىس قازاقستان وبلىسى تو­تەن­شە جاعدايلار دەپارتا­مەنتى, پوليتسيا, جەرگىلىكتى ات­قا­­رۋشى ورگاندار مەن جەدەل مەديتسينالىق جاردەم كۇشتەرى, بارلىعى 190 ادام جانە 50 تەحنيكا جۇمىلدى. ساعات 02:40-تا ءورت ءسوندىرىلدى. وبلىس اكىمى ناريمان تورەعاليەۆ ارنايى كەلىپ, وقيعانىڭ بارىسىمەن تانىستى. قازىرگى ۋاقىتتا جەر­گىلىكتى اتقارۋشى ورگاندار مەن توتەنشەلىكتەر ءىستىڭ ءمان-جايىن انىقتاپ جاتىر.

ايتا كەتەيىك, جارىلىس بول­­عان «Rizyq» ءدامحاناسى ەكى قاباتتى, جوعارعى قاباتى تە­­مىربەتون كونسترۋكتسيادان جا­سالعان. «جارىلىس بولعاندا كافەنىڭ وڭتۇستىك قابىرعاسى مەن توبەسى قۇلاپ ءتۇستى. 25 شار­شى مەتر اۋماقتا ءورت بولعان, قۇت­قا­­رۋشىلار وسى جەردەن ەكى ادام­نىڭ وتقا كۇيگەن ءمايىتىن تاۋىپ شىعاردى. 6 ادام «جەدەل جاردەم» قىزمەتىنە تاپسىرىلىپ, ونىڭ بەسەۋى اۋرۋحاناعا جاتقىزىلدى. وقيعا ورنىنان 50 ليترلىك گاز بالونىن ءبىزدىڭ قىزمەتكەرلەر قاۋىپسىز جەرگە شىعاردى», دەپ حابارلادى بقو تج دەپارتامەنتىنىڭ باستىعى ەرنۇر وتەگەنوۆ.

وقيعا بولعان ءدامحانانىڭ ءدال ىرگەسىندەگى 5 قاباتتى تۇر­عىن ءۇيدىڭ تەرەزە اينەكتەرى سىنعان. «قازترانسگاز ايماق» اق قوعاممەن بايلانىس دەپار­تامەنتى «جارىلىسقا گاز باللونى سەبەپ بولۋى مۇمكىن» دەگەن الدىن الا بولجام ايتىپ وتىر.

قازىر جارىلىس سالدارىنان زارداپ شەككەندەرگە ءتيىستى مەديتسينالىق كومەك كورسەتىلىپ جاتىر. جاراقات العان 5 ادام ورالداعى كوپبەيىندى قالالىق اۋرۋحاناعا جاتقىزىلعان. «2 ەر ادام جانە 2 ايەل ادام جانساقتاۋ بولىمىندە. ءبىر ەر ادام تراۆماتولوگيا بولىمىندە», دەپ حابارلادى وبلىس اكىمدىگىنىڭ ءباسپاسوز قىزمەتى.

وبلىستىق دەنساۋلىق ساقتاۋ باسقارماسىنىڭ باسشىسى ەر­لان توقسانوۆتىڭ ايتۋىنشا, جان­ساقتاۋ بولىمىندە جاتقان ەكى ەر ادام – وزبەكستان ازاماتى, ەكى قىز بالا – ءوز ەلىمىزدەن. ولار جابىق باس-مي جاراقاتىن جانە 15-52 پايىز كۇيىك جاراقاتىن العان. «ولاردىڭ جاعدايى وتە اۋىر», دەدى ەرلان ۆيلەن ۇلى. ءبىر ادام بەتى مەن مويىن تۇسى كۇيىپ, اۋرۋحانانىڭ جاراقات بولىمىنە جاتقىزىلعان. تاعى ءبىر ازامات دارىگەردىڭ تەكسەرۋىنەن كەيىن امبۋلاتوريالىق ەم الۋ ءۇشىن ۇيىنە جىبەرىلدى.

تۇستەن كەيىن قۇتقارۋشىلار جارىلىس بولعان عيماراتتىڭ ورنىن تازالاۋ كەزىندە ءۇيىندى استىنان تاعى ءبىر ادامنىڭ دەنەسىن الىپ شىقتى. مارقۇمداردىڭ كىم ەكەندىگىن انىقتاۋ ءۇشىن مايىتتەر سوت-مەديتسينالىق سا­راپ­تاۋ ورتالىعىنا جىبەرىلدى. اپاتتىق-قۇتقارۋ جۇمىسى سو­ڭىنا دەيىن جۇرگىزىلەدى. وقيعا ورنىنا ءيىسشىل يتتەر دە اكەلىن­گەن. قازا تاپقاندار مەن زارداپ شەككەندەردىڭ تۋىستارىنا دارىگەرلىك, پسيحولوگيالىق كومەك كورسەتىلىپ جاتىر.

باتىس قازاقستان وبلىسىنىڭ اكىمى ماسەلەنى باقىلاۋدا ۇستاپ وتىر. وبلىستىق توتەنشە جاع­داي دەپارتامەنتىنە جانە دەن­ساۋلىق ساقتاۋ باسقارماسىنا ءتيىستى تاپسىرما بەرىلگەن.

باتىس قازاقستان وبلىسى