تاراز قالالىق پوليتسيا باسقارماسى قوعامدىق كولىكتىڭ قاتىسۋىمەن بولعان جول اپاتىنا بايلانىستى پىكىر ءبىلدىردى, دەپ جازادى Egemen.kz.
4 قاڭتار كۇنى تاڭەرتەڭ ساعات 10:45 شاماسىندا تارازدا №56 باعىتتاعى اۆتوبۋستىڭ 33 جاستاعى جۇرگىزۋشىسى ءرولدى باسقارا الماي قالعان. ىلە-شالا قارسى بەتكە شىعىپ كەتىپ, توقتاپ تۇرعان 10 كولىككە سوقتىعىسقان.
اۆتوبۋس ىشىندە 10 جولاۋشى بولعان. وقىس وقيعا سالدارىنان 56 جاستاعى ايەل جاراقات الىپ, اۋرۋحاناعا جەتكىزىلدى.
ايماقتاعى پوليتسيا باسقارماسى وكىلىنىڭ سوزىنشە جول اپاتىنا اۆتوبۋس جۇرگىزۋشىسىنىڭ رولدە ۇيىقتاپ كەتكەنى سەبەپ بولعان.
«دەنى ساۋ, سالماقتى جۇرگىزۋشى ەكەن. ءبىر ساتكە كوزى ءىلىنىپ كەتكەن. كوزىن اشقاندا عانا جول اپاتى بولعانىن تۇسىنگەن», دەدى تاراز قالالىق ءىىب پاترۋلدىك پوليتسيا باتالونىنىڭ كومانديرى رۋسلان ورازباقوۆ.
ول قوعامدىق كولىك پەن جول قوزعالىسىنا قاتىسى بار مامانداردىڭ بارلىعى, سونىڭ ىشىندە پوليتسيا قىزمەتكەرلەرى دە تاڭەرتەڭ جۇمىسقا شىعار الدىندا دارىگەرلىك تەكسەرىستەن وتەتىنىن دە تىلگە تيەك ەتتى. رۋسلان ورازباقوۆ جۇرگىزۋشىلەردىڭ رولدە سەرگەك بولۋىنا تەك وزدەرى جاۋاپتى ەكەنىن ەسكەرتتى.
اتالعان فاكتى بويىنشا اۆتوبۋس جۇرگىزۋشىسىنە قاتىستى قر قىلمىستىق كودەكستىڭ 345-بابى بويىنشا سوتقا دەيىنگى تەرگەۋ امالدارى باستالدى. قاجەتتى ساراپتامالار تاعايىندالدى.