تاشكەنتكە تابانى تيگەن قازاقتىڭ ءتاۋ ەتىپ, تاعزىم جاسار قاسيەتتى ەكى ورنى بار. ءبىرى – توبە ءبيىمىز تولە ءبيدىڭ كەسەنەسى, ەكىنشىسى – الەمگە ايگىلى سۋرەتشىمىز ورال تاڭسىقباەۆتىڭ مۋزەي-ءۇيى. ءبىز دە سول ادەتتەن جاڭىلماي, بي بابامىزدىڭ باسىنا قۇران باعىشتاپ, قىلقالام شەبەرىنىڭ قارا شاڭىراعىنا تابان تىرەدىك.
– قۇتتى قوناق ەكەنسىزدەر, – دەدى مۋزەي اۋلاسىندا قارسى جولىعىپ, قۇراق ۇشقان قىزمەتكەر قىز جىميىپ. «قازاقستاننان كەلگەنىمىزدى مەڭزەپ تۇر ما ەكەن؟» دەپ ويلاپ ۇلگەرگەنىمىزشە, تاعى دا ءۇن قاتتى. – كەشە مۇندا پرەزيدەنتتىڭ قىزى كەلگەن ەدى. سىزدەر مارتەبەلى مەيماننان كەيىن تابالدىرىعىمىزدى اتتاپ تۇرسىزدار. بۇل – جاقسىلىقتىڭ نىشانى, – دەدى ءيىلىپ-بۇگىلىپ ءىلتيپات كورسەتىپ جۇرگەن الگى جان. و.تاڭسىقباەۆتىڭ مۋزەي-ۇيىندەگى قادامىمىزدىڭ ءدال بۇلاي باستالعانىنا ءىشىمىز جىلىپ قالدى, البەتتە.
«پرەزيدەنتتىڭ قىزى» دەگەندە ەلەڭ ەتە قالعانىمىز راس. قاي پرەزيدەنتتىڭ قىزى؟ مەملەكەت باسشىلارىنىڭ قىزدارى مۇنداي مۋزەيلەرگە باس سۇعا قويمايدى عوي. ونەرگە ىنتىق, كونەگە قۇمار بۇل كىم بولدى ەكەن؟ سويتسەك, الدىمىزدى وراي كەلگەن مارتەبەلى مەيمان وزبەكستان پرەزيدەنتى شاۆكات ميرزيوەۆتىڭ ۇلكەن قىزى سايدا حانىم بولىپ شىقتى. ول مەملەكەت باسشىسىنىڭ سۇيىكتى پەرزەنتى عانا ەمەس, پرەزيدەنتتىڭ كومەكشىسى دەگەن رەسمي قىزمەتتىڭ يەسى. وسىدان ءبىراز ۋاقىت بۇرىن شاۆكات اكا «پرەزيدەنت اكىمشىلىگىنىڭ باسشىسى» دەگەن لاۋازىمدى جويىپ, ونىڭ اتقاراتىن قىزمەتتەرىن كومەكشىنىڭ مويىنا جۇكتەگەن-ءدى. ەكسكۋرسوۆود قىزدىڭ «مارتەبەلى مەيمان» دەپ ءمان بەرە سويلەۋى دە سوندىقتان. بىلە بىلسەڭىز, لاۋازىمدى شەنەۋنىكتىڭ رۋحانيات ورداسىنا ارنايى كەلۋىنىڭ ءوزى كوڭىلدى مارقايتاتىن قادام. ونىڭ ۇستىنە سايدا حانىم Facebook-تەگى رەسمي پاراقشاسىنا ء«بىزدىڭ ەلدەگى مۋزەي-ۇيلەردىڭ جۇمىسىن قايتا قاراستىراتىن ۋاقىت جەتتى. سونداي-اق ولاردى ساپالىق ءارى مازمۇن تۇرعىسىنان جاڭا دەڭگەيگە كوتەرۋگە ءتيىسپىز», دەگەن جازبا قالدىرىپتى. دەمەك, الدا وڭ وزگەرىستەردىڭ بولارى انىق.
حوش. ەكى قاباتتى ەسكىلەۋ ءۇيدىڭ الدىندا تۇرمىز. بۇل – كسرو حالىق سۋرەتشىسى, كسرو كوركەمسۋرەت اكادەمياسىنىڭ تولىق مۇشەسى, وزبەكستانداعى كەسكىندەمە ونەرىنىڭ نەگىزىن قالاۋشى, ۇلتىمىزدىڭ دارىندى پەرزەنتى ورال تاڭسىقباەۆقا جەتى جىل پانا بولعان ىستىق ۇيا, كيەلى شاڭىراق. قازىر الىس-جاقىننان كەلگەن تۋريستەر ايالداپ, ونەرسۇيەر قاۋىم ءجيى باس قوساتىن ورىنعا اينالعان. 1981 جىلدان بەرى قىلقالام شەبەرىنىڭ مۋزەي-ءۇيى رەتىندە جۇمىس ىستەپ تۇر. سۋرەتشىنىڭ تۇرعان ءۇيىن تۋريستەر تارتاتىن مادەني ورداعا اينالدىرۋدا ەليزاۆەتا ياكوۆلەۆنانىڭ سىڭىرگەن ەڭبەگى ەرەن. ول – ورال تاڭسىقباەۆتىڭ ۇزاق جىل وتاسقان زايىبى. مۋزەي-ءۇيدىڭ نەگىزىن قالاعان دا, العاشقى ديرەكتورى بولىپ, جۇمىسىن جۇيەلەگەن دە – ءوزى. بۇل كىسى اتاقتى سۋرەتشىنىڭ قىرىقتان اسقاندا قوسىلعان قوساعى ەكەن. وكىنىشتىسى, ۇرپاق وربىمەگەن. ليزا جەڭگەيدىڭ جار مۇراسىنا مۇقيات قاراپ, ادالدىق تانىتقانى ادامدىق, ارينە. ءۇيدىڭ ءىشى يەلەرى جوق دەمەسەڭىز, ءالى سول قالپى. ءبىر زات تا ورنىنان قوزعالماعان. ەسىكتەن ەنگەن بويدا-اق ەرەكشە كۇي كەشەسىز, ايرىقشا اتموسفەراعا بولەنەسىز. تاڭسىقباەۆتاي تاۋ تۇلعانىڭ قولى تيگەن دۇنيەلەردەن قۇددى ءبىر جىلىلىق ەسىپ تۇرعانداي.
– تالانتتى ادام قاي ىستە بولسىن تالانتتى عوي, – دەپ باستادى اڭگىمەسىن كامالا بورىباەۆا ەسىمدى ەكسكۋرسوۆود. – ورال اعامىز اتاقتى سۋرەتشى عانا ەمەس, مىقتى قولونەر شەبەرى دە بولعان. ۇيدەگى تۇرمىستىق زاتتاردىڭ ءبىرازىن ءوز قولىمەن جاساعان. ماسەلەن, كىرەبەرىستەگى كيىم ىلگىش پەن تريۋمو سول كىسىنىڭ قولىنان شىققان دۇنيەلەر. قانداي شەبەرلىكپەن جاسالعان دەسەڭىزشى! مايلى بوياۋلاردى ارالاستىرۋعا ارنالعان تاقتاي پاليترالاردى دا ءوز قالاۋىنشا جاساپ الىپ وتىرعان. كارتينالاردىڭ اعاش جاقتاۋلارىن دا الىستان ىزدەپ اۋرە بولماعان. ەتيۋد جازۋعا ارنالعان جينالمالى, جىلجىمالى ستەند-پاليترالاردى, ۇستەل, ورىندىق سەكىلدى قاراپايىم زاتتاردى دا ءوزى ىستەگەن.
ءيا, ول كەزەڭ قازىرگىدەي جۇرتتىڭ ءبارى سۋرەتشىلىكپەن جاپپاي اۋەستەنبەگەن ۋاقىت قوي. قاراپايىم قۇرال-جابدىقتاردىڭ دا قات كەزى. سوندىقتان اتاقتى سۋرەتشى بۇلاردى ءوزى جاساۋعا ءماجبۇر بولعان دا شىعار. ونىڭ ۇستىنە و.تاڭسىقباەۆتىڭ باي-باعلاندارداي بالقىپ-شالقىپ عۇمىر كەشپەگەنى دە ءمالىم. تۇرمىستىق جاعداي تيتىقتاتقاندا تۋىندىلارىن ساتىلىمعا شىعارعانى تۋرالى اڭگىمەلەر دە ءجيى ايتىلادى. قۇنى اقشامەن ولشەۋگە كەلمەيتىن قانشاما ەڭبەگى اركىمنىڭ قولىندا كەتتى دەسەڭشى. وسى ورايدا كامالا بىزگە مىناداي ءبىر وقيعانى بايانداپ بەردى. ءبىر تانىسى قازاقتىڭ ۇلى سۋرەتشىسىنەن ۇلكەن كەنەپكە سالىنعان كارتينانى 400 دوللارعا ساتىپ الىپتى. بۇل سول كەزەڭ ءۇشىن قوماقتى قارجى. ارادا بىرنەشە اي وتكەندە ورال اعامىز تانىسىنا بەرگەن الگى تۋىندىنىڭ گەرمانياداعى ءباس ساۋدادا 8 مىڭ دوللارعا ساتىلعانىن ەستيدى. «عاجاپ!», دەپتى تاڭسىقباەۆ تاڭدانا, ارتىنشا ءتۇسىن سۋىتىپ «بىراق, بۇل – حايۋاندىق!» دەگەن ەكەن.
– تاڭسىقباەۆتان قالعان مۇرا كوپ. ءبىزدىڭ مۋزەيدە 300-دەن استام تۋىندىسى ساقتالعان. بۇعان قوسا ايگىلى مۋزەيلەر مەن گالەرەيالاردان ورىن تەپكەنى قانشاما. جەكە قولعا ءوتىپ كەتكەندەردىڭ ەسەبىن دە ەشكىم بىلمەيدى, – دەدى ۇيگە كىرگەندەگى سول جاقتاعى بولمەگە – سۋرەتشىنىڭ شەبەرحاناسىنا باستاي جونەلگەن قىزمەتكەر.
قابىرعالارعا ءتۇرلى كارتينالار ىلىنگەن. دەنى تابيعات كورىنىستەرى. جالپى, ورال تاڭسىقباەۆ – پەيزاجدىڭ حاس شەبەرى. زامانداستارى ونى «تاۋ مەن دالا جىرشىسى» دەپ اتاعان. توردەگى جۇمىس ۇستەلى سول كۇيى تۇر. مولبەرتى دە مول سىردى ىشكە بۇككەندەي. بوساعادا جەكە كىتاپحاناسىنا ورىن بەرىلگەن. ورال تاڭسىقباەۆ تاڭداي قاقتىرار تۋىندىلارىنىڭ كوبىن اسقان ىجداھاتتىلىقپەن جاساقتالعان وسى ءبىر بولمەدە ومىرگە اكەلگەن. ايتپاقشى, سۋرەتشىنىڭ 20 جاسىندا, ياعني 1924 جىلى جازىلعان العاشقى ەتيۋدتەرىنىڭ ءبىرى («مەنىڭ العاشقى ەتيۋدىم» دەپ اتالادى) دە وسىندا ساقتالعان. ەلەۋسىز جەردە تۇرسا دا اۆتوردىڭ «اۆتوپورترەتى» (1959 جىل) ەرىكسىز مويىن بۇرعىزادى. جۇزدەن استام قىلقالامى, تىرىسىندە قولىنان تۇسپەگەن فرانتسۋز پاليتراسى, مەملەكەتتىك ناگرادالارى, جەكە قۇجاتتارى دا وسى جەردەگى قۇندى جادىگەرلەردىڭ قاتارىن تولىقتىرىپ تۇر.
شەبەرحانادان شىققان سوڭ قارسى بەتتەگى بولمەگە وتتىك. بۇل – قوناق بولمەسى. ءۇي يەلەرى مەيماندارىن وسى جەردە كۇتكەن. كىرگەن بويدا توردە ءىلۋلى تۇرعان «گۇلدەر» اتتى كارتيناعا تەسىلە قاراعانىمىزدى بايقاپ قالعان كامالا: «بۇل تۋىندىنى ايەلىنىڭ تۋعان كۇنىنە ارناپ بار-جوعى ەكى ساعاتتىڭ ىشىندە سالعان ەكەن», دەدى. عاجاپ! ەكى ساعاتتىڭ ىشىندە مىناداي شەدەۆردى دۇنيەگە اكەلگەن تالانت يەسى تاريحتا قالماعاندا قايتسىن! «جالپى, ەليزاۆەتا ياكوۆلەۆنا بانك سالاسىنىڭ قىزمەتكەرى بولعان. بىراق سۋرەتشىنىڭ الاڭسىز جۇمىس ىستەۋىنە جاعداي جاساۋ ءۇشىن ۇنەمى قاسىنان تابىلعان. قىلقالام شەبەرىنىڭ ايەلى عانا ەمەس, حاتشىسى ءارى كومەكشىسى دە بولا بىلگەن», دەدى اڭگىمەنى ءارى جالعاپ.
باسپالداقپەن ەكىنشى قاباتقا كوتەرىلدىك. مۇندا جاتىن بولمە بار. مارقۇمنىڭ كوزى تىرىسىندە قانداي بولسا, بۇگىن دە ءدال سولاي ساقتالعان. سۋرەتشىنىڭ اۋلاعا قاراعان شاعىن بولمەسى كىشىگىرىم ەتيۋدتەرمەن بەزەندىرىلگەن. ەكسكۋرسوۆودتىڭ ايتۋىنشا, قىلقالام شەبەرى بۇل جەردە بولاشاق تۋىندىلارىنىڭ نوبايىن سالىپ, ەتيۋدتەر جازعان. قابىرعالارعا ىلىنگەن ەسكى سۋرەتتەر دە مەنمۇندالاپ تۇر. جالپى, ءۇيدىڭ ءىشى اسا ۇقىپتىلىقپەن رەتتەلگەن. «بۇل ەليزاۆەتا ياكوۆلەۆنانىڭ قولتاڭباسى», دەدى كامالا.
– كۇندەلىكتى كۇيبەڭ تىرشىلىك مويىن بۇرعىزباسا دا, مۇندا ۋاقىت تاۋىپ كەلەتىندەر جەتەرلىك. ونىڭ ۇستىنە بۇرىنعىداي ەمەس, قازىر مۋزەيدەگى جالپى اتموسفەرا وزگەرگەن. ونەر ادامزاتقا ورتاق, ارينە. دەسە دە, سۋرەت ونەرىنىڭ سۇيەكتى وكىلىنە اينالعان ورال اتامىزدى جەرگىلىكتى قازاقتار ەرەكشە ماقتان تۇتادى. مۋزەي-ءۇيىن قاسيەتتى قارا شاڭىراق سانايدى. شۇكىر, بۇل جەر باۋىرلاس ۇلتتاردى رۋحاني تۇرعىدان بايلانىستىراتىن التىن كوپىرگە اينالىپ كەلەدى, – دەدى بىزگە جول باستاپ جۇرگەن جەرگىلىكتى جۋرناليست, وزبەكستاندا قازاقشا شىعاتىن رەسپۋبليكالىق «نۇرلى جول» گازەتىنىڭ ءتىلشىسى ايگۇل ەركىنبايقىزى.
سىرتقا شىقتىق. مۋزەي قىزمەتكەرى ءۇيدىڭ ارتقى جاعىنا قاراي ءوتۋىمىزدى سۇرادى. بۇل جەردە سۋرەتشىنىڭ باۋ-باقشاسى بولعان ەكەن. ورال اعامىز ءتۇرلى جەمىس-جيدەك وسىرۋگە قۇمار بولىپتى. «جازدا قاۋلاپ ءجۇزىم دە وسەدى», دەدى قىزمەتكەر. ءسويتتى دە ەكى قاباتتى ەڭسەلى عيماراتقا قاراي باستاپ ءجۇردى. بۇل – 1994 جىلى و.تاڭسىقباەۆتىڭ 90 جىلدىعىنا وراي سالىنعان كورمە زالى. مۇندا دا ايگىلى سۋرەتشىنىڭ تاماشا تۋىندىلارى مەنمۇندالاپ تۇر. ۇلكەن بولمەسىندە جەرگىلىكتى جانە شەتەلدىك سۋرەتشىلەردىڭ كورمەلەرى, تاقىرىپتىق ءىس-شارالار ۇيىمداستىرىلادى. ەكسكۋرسوۆود «كوركەمسۋرەت باعىتىندا وقيتىن جەرگىلىكتى ستۋدەنتتەر مۋزەيگە ءجيى كەلەدى», دەپ ايتىپ ۇلگەرگەنشە, ءبىر توپ قىز-جىگىت كورمە زالىنا ساۋ ەتە قالدى. «مىنە, وزدەرىڭىز دە كورىپ وتىرسىزدار. ءبىر كۇنىمىز دە بوسقا وتپەيدى», دەپ ازىلدەدى.
كورمە زالىنىڭ ءبىرىنشى قاباتىندا ورال تاڭسىقباەۆتىڭ ۇلكەن سۋرەتىنە كوزىمىز ءتۇستى. سۋرەتشىنىڭ تۇلعاسىن ايگىلەگەن ادەمى تۋىندى ەكەن. مۋزەي قىزمەتكەرى بىزگە جاقىنداپ: «بۇل قىلقالام شەبەرىنىڭ قايتىس بولارىنان ءتورت كۇن بۇرىن تۇسكەن سۋرەتى. 1974 جىلى 70 جىلدىق مەرەيتويىن اتاپ وتۋگە دايىندالىپ جۇرگەندە جاسالعان ءراسىم. ول تاشكەنتتە تۋىپ-وسكەنىمەن, نوكىستە قايتىس بولعان. مەرەيتويعا ارناپ نوكىستەگى مۇراجايدان تۋىندىلارىن اكەلمەك نيەتپەن جولعا شىققان. وكىنىشكە قاراي, سول جاقتا جۇرەگىنىڭ تالماسى ۇستاپ, ومىردەن وزعان. مارقۇم تاشكەنتتەگى ايگىلى شاعاتاي زيراتىنا جەرلەنگەن. بۇل جەردە ايگىلى سۋرەتشىدەن بولەك, وزبەكتىڭ شاراف راشيدوۆ, ايبەك, عافۋر گۋليام, وسمان يۋسۋپوۆ سىندى بەلگىلى تۇلعالارى دا تىنىستاپ جاتىر. ورال تاڭسىقباەۆتىڭ تۋىستارىنىڭ ءبارى قازاقستانعا كوشىپ كەتكەن. بۇل جاقتا تۇراتىن ءبىر عانا جاقىنىن بىلەمىز. اراگىدىك مۋزەيگە كەلىپ تۇرادى. جالپى, سۋرەتشى سەگىز اعايىندى بولعان. تاشكەنتكە كەلگەن شەتەلدىك تۋريستەر بۇل جەرگە ءجيى ايالدايدى. اراسىندا نيدەرلاند, گەرمانيا, انگليا, فرانتسيا سەكىلدى ەۋروپا ەلدەرىنەن كەلەتىن عالىمدار دا بار. ولار مۋزەي-ءۇيدىڭ ءاۋ باستاعى قالپىندا ساقتالعانىنا ءتانتى بولادى ءارى ونىڭ ءدال وسىلاي قالا بەرگەنى دۇرىس ەكەنىن العا تارتادى. سونداي-اق مۋزەيدە عىلىمي جۇمىستار قولعا الىنۋى كەرەك ەكەنىن دە ەسكە سالادى», دەدى كامالا.
قىزمەتكەرلەرمەن قوشتاسىپ, كەتكەلى تۇرعانىمىزدا مۋزەيدىڭ قازىرگى ديرەكتورى فارحود دجاليلوۆپەن دە از-كەم تىلدەسۋدىڭ ءساتى ءتۇستى. قازاقستانداعى باس گازەتتىڭ وكىلدەرى ەكەنىمىزدى ۇققان ول, ۇسىنىس-تىلەكتەرىن دە ىرىكپەي ايتتى.
– مۋزەيدە جۇمىس ىستەپ جاتقانىما جەتى جىلدان استى. قازاقستاننان قوناقتار ءجيى كەلەدى دەپ ايتا المايمىن. نەگىزىنەن ايالدايتىنداردىڭ دەنى وزدەرىڭىز سەكىلدى جۋرناليستەر, زيالى قاۋىم وكىلدەرى. ماسەلەن, بيىل الماتى مەن شىمكەنتتەن شىعارماشىلىق وكىلدەرى كەلىپ كەتتى. ەسىمە تۇسىرە الماي تۇرمىن, الماتىداعى ءبىر مۋزەيدىڭ ماماندارى مەموراندۋم جاساپ, شىعارماشىلىق بايلانىس ورناتۋدى ۇسىندى. ءبىز مۇنداي بايلانىستاردىڭ بارىنە اشىقپىز. الماتىدا ساندىك-قولدانبالى ونەر كوللەدجى ورال تاڭسىقباەۆ اتىندا ەكەنىن, وندا سۋرەتشىنىڭ كىشىگىرىم مۋزەيى بارىن بىلەمىز. جالپى, قازاقستان تاراپىمەن بىرلەسكەن جوبالاردى جۇزەگە اسىرۋعا دايىنبىز. ايتالىق, قاراقالپاقستانداعى ي.ۆ.ساۆيتسكي اتىنداعى مەملەكەتتىك ونەر مۋزەيى الىس-جاقىن شەت مەملەكەتتەرمەن ۇكىمەتتىك دەڭگەيدە بايلانىس ورناتقان. سونىڭ ناتيجەسىندە جەر-جەردە ۇلكەن كورمەلەر وتكىزىپ تۇرادى. ءدال وسى تاجىريبەنى ءبىز دە قولعا الساق دەيمىز. ول ءۇشىن قازاقستان ۇكىمەتى تاراپىنان قولداۋ كەرەك. ويتكەنى مۇنداعى دۇنيەلەردىڭ ءبارى قۇندى جادىگەرلەر. سوندىقتان كورمە ۇيىمداستىرۋ, كارتينالاردى تاسىمالداۋ, ساقتاندىرۋ, قارجىلاندىرۋ سەكىلدى جاۋاپتى جۇمىستار ۇكىمەتتىك دەڭگەيدە كەلىسىلىپ, شەشىلگەنى ابزال. بىرلەسكەن كاتالوگ شىعارۋعا بولادى. مۇنىڭ ءبارى بۇگىن ايتىپ, ەرتەڭ اتقارا سالاتىن وڭاي شارۋا ەمەس. بۇل وتە ۇزاق ۇدەرىس. جەكە ادامدار كەلىپ-كەتە بەرەدى عوي. بىزگە مۋزەيلەر اراسىنداعى بايلانىستىڭ قالىپتاسقانى, تەرەڭدەي تۇسكەنى ماڭىزدى. سەبەبى ورال تاڭسىقباەۆتىڭ شىعارماشىلىعىنا قىزىعاتىن قازاقستاندىقتاردىڭ كوپ ەكەنىن بىلەمىز, – دەدى فارحود دجاليلوۆ.
راس, ۇكىمەتتىك دەڭگەيدەگى بايلانىستىڭ ماڭىزى زور. ونىڭ ۇستىنە بيىل ورال تاڭسىقباەۆتىڭ تۋعانىنا 120 جىل تولادى. 14 قاڭتار – تۋعان كۇنى. مۇنداي مەرەيلى داتانى ەلەۋسىز قالدىرۋعا بولمايدى. اۋقىمدى ءىس-شارالار ارقىلى اتاقتى سۋرەتشىنىڭ شىعارماشىلىعىن قايتا جاڭعىرتىپ, جۇرتشىلىقپەن قاۋىشتىرعان ابزال. بۇعان ەلىمىزدىڭ مادەنيەت جانە اقپارات مينيسترلىگى دە ماڭىز بەرەدى دەپ سەنەمىز. وكىنىشتىسى, داڭقتى قىلقالام شەبەرىن قازىرگى جاستاردىڭ دەنى بىلە بەرمەيدى. سوندىقتان ناسيحات جۇمىستارىن بارىنشا جانداندىرعان ءجون. قازاقتا ورال تاڭسىقباەۆتاي اتاعى التى قۇرلىققا جايىلعان ساڭلاق سۋرەتشى ساۋساقپەن سانالارلىق. ۇلى ونەر يەسىن ۇلىقتاۋ الدىمەن ۇلتىمىزعا, ۇرپاعىمىزعا كەرەك.
مۋزەيگە كەلىپ ورال تاڭسىقباەۆتىڭ وزىمەن جۇزدەسكەندەي بولدىق. ءيا, جۇزدەسكەندەي بولدىق. ويتكەنى مۇنداعى ءار زاتتىڭ جانى بار, ءتىلى بار. كەتە-كەتكەنشە ەتەنە جاقىن ەكى ەلگە ورتاق تەلتۇلعا انە-مىنە ەسىكتەن كىرىپ كەلەردەي ەلەگىزي بەرگەنىمىز دە سول.
استانا – تاشكەنت – استانا