بيىل ەلىمىزدىڭ سپورتشىلارى حالىقارالىق سايىستاردان 586 مەدال ولجالادى. سان جاعىنان سارالاعاندا از تابىس ەمەس. وليمپيادالىق سپورت ءتۇرى بويىنشا 121 التىن, 111 كۇمىس, 141 قولا مەدال يەلەندى. وليمپيادالىق سپورت ساناتىنا ەنبەيتىن سايىستاردان 118 مەدال بۇيىردى. پارا سپورتشىلار بيىلعى جىلى ايتۋلى سايىستاردان 33 التىن, 33 كۇمىس, 27 قولا مەدال الدى.
بيىل بوكسشىلارىمىز وزبەكستاندا وتكەن الەم چەمپيوناتىندا 4 التىن, 1 كۇمىس مەدالعا قول جەتكىزىپ, جالپىكوماندالىق ەسەپتە 2-ساتىعا تۇراقتادى. دەسە دە تاشكەنت شارىندە وتكەن الەم چەمپيوناتىنا كەيبىر ەل الەمدىك ساياساتتىڭ سالقىنى تيەتىندىكتەن بوكسشىلارىن جىبەرگەن جوق. كوكتەمدە وسىنداي تولايىم تابىسقا جەتكەن جۋان جۇدىرىق جىگىتتەر قوڭىر كۇزدە جازعى ازيا ويىندارىندا ويسىراي ۇتىلعانى ەڭسەمىزدى ەڭكەيتتى.
سەمسەرلەسۋدەن يتاليادا وتكەن الەم چەمپيوناتىندا رۋسلان قۇربانوۆ قازاق سپورتىنىڭ تاريحىندا تۇڭعىش رەت قولا مەدال يەلەندى.
تۇركيادا وتكەن الەم كۋبوگىندە كوماندالىق سايىستا قازاقستان قۇراماسى تۇڭعىش رەت جەڭىسكە جەتتى. رۋسلان قۇربانوۆ, ەلمير ءالىمجانوۆ, ەرلىك سەرتاي, ۆاديم شارلايموۆ باستاعان سەمسەرلەسۋشىلەر الەم كۋبوگىندە بارلىق قارسىلاستى ايقىن ۇتتى. سەمسەرلەسۋشىلەر قىتايدىڭ حانچجوۋ قالاسىندا وتكەن جازعى ازيا ويىندارىنان كۇمىس مەدالمەن ورالدى.
كاراتەشىلەر ازيا چەمپيوناتىندا جالپىكوماندالىق ەسەپتە كوش باستادى, ستەند اتۋ مەن نىسانا كوزدەۋدە مەرگەندەرىمىز الەم كۋبوگىندە ولجالاعان مەدال سانى بويىنشا توپ باستادى.
جەكەلەي سىندا اسەم ورىنباي قاتاردىڭ دوحا قالاسىندا وتكەن الەم كۋبوگىنىڭ فينالدىق كەزەڭىندە التىن مەدال يەلەندى. حانچجوۋداعى جازعى ازيا ويىندارىندارىندا قولا جۇلدەگە قول جەتكىزدى.
نىسانا كوزدەپ اتۋدان ازەربايجاندا وتكەن الەم چەمپيوناتىندا فاتيما ەرنازاروۆا مەن الەكساندرا سادۋاقاسوۆا جەڭىسكە جەتتى. مەرگەندەرىمىز باكۋدەگى الەم چەمپيوناتىنان 2 التىن, 2 كۇمىس, 1 قولا مەدال ەنشىلەپ قانا قويماي كوماندالىق سايىستا توپ جاردى.
گرەك-ريم, ەركىن ءھام ايەلدەر كۇرەسىنەن دە بالۋاندارىمىز جاستار مەن ەرەسەكتەر اراسىندا وتكەن ازيا چەمپيوناتى, الەم بىرىنشىلىگى سىندى ايتۋلى دودالار مەن حالىقارالىق تۋرنيرلەردە ولجا سالدى.
كۇرەستەگى جەتىستىكتى ايتقاندا 92 كەلى سالماقتا الەم چەمپيونى اتانعان ريزابەك ايتمۇحاننىڭ ابادان ەڭبەگىن ايىرىقشا اتاۋ كەرەك. ەركىن كۇرەستەن قازاق ەلىنىڭ تۇڭعىش الەم چەمپيونى. كۇرەستىڭ وسى ءتۇرى قازاق دالاسىنا قازىعىن قاققانىنا 70 جىلدىڭ ءجۇزى دەسەك, الەم چەمپيوناتىنىڭ التىنى بۇيىرماي كەلدى. وسى كەتىكتى بۇتىندەگەن تۇڭعىش بالۋان ريزابەك ايتمۇقاننىڭ ەڭبەگى «جىلدىڭ ۇزدىك سپورتشىسى» اتالىمىنا تاتىماپتى-مىس, سودان كەيىن «سپورتتاعى ۇزدىك سەرپىن» اتاندى. سەربيانىڭ بەلگراد قالاسىندا وتكەن الەم چەمپيوناتىندا ەركىن كۇرەستەن ازامات داۋلەتبەكوۆ پەن ايەدەر كۇرەسىنەن ءجاميلا باقبەرگەنوۆا قولا مەدال يەلەندى. گرەك-ريم كۇرەسىنىڭ بالۋاندارى جاپپاي جەڭىلىپ الەم چەمپيوناتىنان مەدالسىز قايتتى.
دزيۋدو كۇرەسىنەن ايەلدەر اراسىندا ءابيبا ابۋجاقىنوۆا تۇڭعىش رەت گران-پري دوداسىندا توپ جاردى. قازاقتىڭ قوس قىزى الەمدىك دودانىڭ فينالىندا كۇرەسىپ, عاليا تىنباەۆاعا كۇمىس مەدال بۇيىردى.
استانا قالاسىندا العاش رەت عالامدىق Grand Slam ءتۋرنيرى ءوتتى. بالۋاندارىمىز 1 التىن, 1 كۇمىس, 5 قولا مەدال يەلەندى. 60 كەلىدە ماعجان شامشادين جەڭىسكە جەتتى, 66 كەلى سالماقتا عۇسمان قىرعىزباەۆ كۇمىس مەدال الدى. دزيۋدوشىلارىمىز بيىلعى جىلى 27 مەدال يەلەندى. ونىڭ ىشىندە 2 التىن, 8 كۇمىس, 17 قولا جۇلدە بار.
فۋتبولدان قازاقستان ۇلتتىق قۇراماسى كەلەسى جىلى گەرمانيا ەلى وتكىزەتىن ەۋروپا چەمپيوناتىنىڭ ىرىكتەۋ تۋرى اياسىندا تولايىم تابىسقا جەتتى. ءجۇز جىلدان اسا تاريحى بار قازاق فۋتبولى ەۋروپا چەمپيوناتى, الەم بىرىنشىلىگىنە ىرىكتەۋ بولسىن ءدال بيىلعى دەڭگەيگە جەتە العان ەمەس. رەسەيلىك مامان ماگومەد اديەۆ باپتايتىن ۇلتتىق قۇراما ىرىكتەۋ تۋرى اياسىندا وتكىزگەن 6 ماتچتا جەڭىسكە جەتتى, 4 ويىندا جەڭىلىس تاپتى. دەسە دە ءالى دە ەۋروپا چەمپيوناتىنا قاتىسۋ مۇمكىندىگى بار. ول ءۇشىن كەلەر جىلدىڭ كوكتەمىندە الدىمەن 2004 جىلعى ەۋروپا چەمپيونى گرەكيا قۇراماسىن ۇتۋى ءتيىس.
سپورتشىلارىمىز كۇشىن كەلەر جىلدىڭ باستى دوداسى – پاريج جازعى وليمپيادا ويىندارى مەن پاراليمپياداسىندا سىنايدى.