كاسىپ جىنىسقا بولىنبەيدى, قازىر ەرىمەن قاتار ايەلدىڭ دە جەكە شارۋامەن اينالىسۋعا مۇمكىندىگى مول. ونىڭ ۇستىنە بۇل تاراپتا مەملەكەتتەن بەرىلەتىن كومەك تە وراسان. ماسەلەن, جەتىسۋدا شاعىن جانە ورتا كاسىپورىنداردىڭ جارتىسىنا جۋىعىن ايەلدەر باسقارادى. ءۇي شارۋاسىنان بولەك, قوعامعا پايداسى زور كاسىپتى تىزگىندەگەن قىز-كەلىنشەكتەر وبلىستىڭ الەۋمەتتىك دەڭگەيىن كوتەرۋدە ماڭىزدى رولگە يە. قازىر وڭىردە ەكى جۇزگە جۋىق كاسىپكەر قىز-كەلىنشەك بار.
ءوتىپ بارا جاتقان جىل جەتىسۋ ءۇشىن تابىستى بولدى. قاي سالانى الىپ قاراساڭىز دا ىلگەرىلەۋ بار. وتكەن 11 ايدا ەكونوميكالىق ءوسۋ قارقىنى 113,9 پايىزعا جەتىپ, ءوڭىر رەسپۋبليكادا ءبىرىنشى ورىنعا يە بولدى. سونىڭ ىشىندە شاعىن جانە ورتا بيزنەس سالاسى قارقىندى دامىپ كەلەدى. بۇل رەتتە ايەل كاسىپكەرلەردىڭ ەڭبەگى ەلەۋلى. ونى جەتىسۋ ىسكەر ايەلدەر كەڭەسىنىڭ قولداۋىمەن وتكەن وبلىستىق ىسكەر ايەلدەر فورۋمىندا ءوڭىر باسشىسى بەيبىت يساباەۆ تا ايتتى.
«وبلىس حالقىنىڭ 50 پايىزدان استامى ايەلدەر بولسا, ونىڭ 42 پايىزى نەمەسە 148,2 مىڭى ەكونوميكالىق بەلسەندى حالىق قاتارىندا, سونىڭ 139 مىڭعا جۋىعى جۇمىسپەن قامتىلعان. ايەلدەر كاسىپكەرلىكتى دامىتۋدىڭ ۇلتتىق جوباسىنىڭ بارلىق باعىتىنا بەلسەندى قاتىساتىنى قۋانتادى. ماسەلەن, بيىلدىڭ وزىندە حالىقتىڭ الەۋمەتتىك وسال توپتارىنىڭ ىشىنەن 139 ايەل كاسىپكەرلىك باستامالارىنا شامامەن 192 ملن تەڭگە كولەمىندە گرانت الدى. جاستار اراسىنان تاعى 123 قىز-كەلىنشەككە 563,4 ملن تەڭگە مولشەرىندە 2,5 پايىز جەڭىلدىكتى سىياقى مولشەرلەمەسىمەن شاعىن نەسيە بەرىلدى. ءبىز ايەلدەر كاسىپكەرلىگىن قولداۋدى جالعاستىرا بەرەمىز. سىزدەر تاراپىنان تەك جۇمىس ىستەۋگە دەگەن ۇمتىلىس بولسا, جاقسى بيزنەس-جوسپارلارىڭىزدى قارجىلاندىرۋ, گرانتتار بەرىپ, نەسيەلەۋ – ءبىزدىڭ مىندەتىمىز», دەدى ب.يساباەۆ.
ونىڭ ايتۋىنشا, ايەلدەر ءبىلىم بەرۋ, دەنساۋلىق ساقتاۋ, الەۋمەتتىك قورعاۋ سالالارىندا بەلسەندى. مىسالى, پانفيلوۆ اۋدانىنىڭ تۇرعىنى تۇرسىن كونچيباەۆا اۋداندا 5 بالاباقشا اشىپ, 700-دەن استام اۋىل بالالارىن مەكتەپكە دەيىنگى بىلىممەن قامتاماسىز ەتكەن. سونداي-اق 100-دەن استام جەرگىلىكتى تۇرعىندى جۇمىسقا ورنالاستىرعان. گولوۆاتسكي اۋىلىندا ارداگەر پەداگوگ 210 ورىندىق بالاباقشا اشقان. كاسىپكەر 10 جىلدان بەرى قوعامعا پايدالى بيزنەسپەن اينالىسىپ كەلەدى.
اتالعان فورۋمعا 140-قا جۋىق كاسىپكەر ايەل كەلدى. وسى ورايدا وبلىس اكىمى بىرقاتار كاسىپكەر ايەلدى قۇتتىقتاپ, ىسكەر حانىمدارعا ماراپاتتار تاپسىردى. اتاپ ايتساق, «اتامەكەن» قازاقستان رەسپۋبليكاسى ۇلتتىق كاسىپكەرلەر پالاتاسىنىڭ ءىىى دارەجەلى «ىسىنە ادالدىعى ءۇشىن» مەدالى بىرنەشە جىل بويى كونديتەرلىك جانە نان-توقاش ونىمدەرى مەن ەتتى جارتىلاي فابريكاتتار وندىرۋمەن اينالىسىپ كەلە جاتقان «لاد» جك باسشىسى اگافيا ليگە بەرىلدى. وسىنداي مەدالمەن جاڭا ساۋىلعان تۇيە سۇتىنەن ءونىم وندىرۋگە ماماندانعان «UNI FORES» جشس-نىڭ ديرەكتورى ءلاززات چايگاراەۆا ماراپاتتالدى.
وبلىستىق ىسكەر ايەلدەر كەڭەسى وتكىزگەن كونكۋرس قورىتىندىسىنا سايكەس اتالىمدار بويىنشا 20-عا جۋىق جەڭىمپاز ايەلگە اقشالاي سەرتيفيكاتتار تابىستالدى. تاعى بىرنەشە ادامعا وبلىستىق باسقارمالار مەن كاسىپكەرلەر پالاتاسى وبلىستىق فيليالىنىڭ العىس حاتتارى تابىس ەتىلدى.
بيزنەس-فورۋم اياسىنداعى كورمەدە ءسۇت, كونديتەرلىك جانە نان-توقاش ونىمدەرى, دجەمدەر, قاقتار, سابىن جانە شوپتەن ت.ب. تابيعي ينگرەديەنتتەردەن جاسالعان كوسمەتيكالىق سپرەيلەر, كيىزدەن, سازدان جاسالعان بۇيىمدار, ءتۇرلى قولدانبالى ونەر بۇيىمدارى, اياق كيىم جانە باسقا دا كاسىپكەر ايەلدەردىڭ وندىرگەن ونىمدەرى ۇسىنىلدى. وبلىستىڭ ءار تۇكپىرىندە شىعارىلىپ جاتقان بۇل ونىمدەردى جاساۋعا مەملەكەتتىك قولداۋ شارالارى كوپ ىقپالىن تيگىزىپ وتىر.
جاسىراتىنى جوق, اۋىل-ايماقتاردا دا كاسىپكەرلىكتى دامىتۋعا بارىنشا كوڭىل بولىنۋدە. وسى رەتتە كوكسۋ اۋدانىنىڭ ورتالىعى بالپىق بي كەنتىنىڭ تۇرعىنى ديانا دوستىباي ەڭبەگىنە توقتالا كەتسەك. بۇگىندە كونديتەرلىك ونىمدەرگە تاپسىرىس قابىلداپ, يگىلىگىن كورۋدە. مەملەكەتتىك قولداۋدىڭ ناتيجەسىندە ەكى بالالى انانىڭ باستاماسى كوپكە قۋانىش سىيلاۋدا. ءوزىنىڭ ايتۋىنشا, ءتاتتى ونىمدەرىن شىعارۋعا قىزىعۋشىلىعى مەن قابىلەتى بالا كەزىنەن باستالعان. سول سەبەپتەن وسى باعىتتا بيزنەس اشۋدى ءجون كورىپتى. قازىر ءبالىش, بوياۋسىز ترايفل, پيروگ, باۋىرساق جانە تاتتىلەردىڭ ءتۇر-ءتۇرىن ىرگەدەگى اۋىل تۇرعىندارىنا جەتكىزەدى.
ء«تاتتى توقاش ءپىسىرۋدى بالا كەزدەن ۇناتاتىن ەدىم. ءوز ءىسىمدى ۋنيۆەرسيتەت اياقتاعاننان كەيىن باستادىم. باسىندا قىزىعۋشىلىعىم ارتىپ, تاتتىلەرگە ءتۇرلى ءدام قوسىپ, جاسادىم. كەيىن كورشى-قولاڭعا تاتتىلەرىم ۇناپ, ولار مەنەن وسى ونىمدەردى ساتىپ الا باستادى. سول كەزدە ماعان ءوز ءىسىمدى اشۋ تۋرالى وي كەلدى. قازىر كاسىبىم جىل ساناپ ىلگەرىلىپ كەلەدى», دەيدى جاس كاسىپكەر.
ەڭ قىزىعى, ديانا بۇعان دەيىن ەش جەردە جۇمىس ىستەمەگەن. وقۋىن ءتامامداپ, بىردەن جەكە ءىسىن باستاۋدى ءجون كورىپتى. «باستاۋ بيزنەس» جوباسى بويىنشا كاسىپكەرلىك نەگىزدەرىنەن ءوتىپ, مەملەكەتتەن 1 ملن 380 مىڭ تەڭگە كولەمىندە قاراجات الۋ ءۇشىن قۇجات تاپسىرادى. كوميسسيانىڭ وڭ شەشىمىمەن گرانت يەگەرى اتاندى. مەملەكەت بەرگەن قارجىعا گاز, نان يلەگىش, ۆيترينا, ميكسەر جانە ت.ب. كەرەك قۇرال-جابدىقتار ساتىپ الىپ, ءوز ىسىنە باتىل كىرىسكەن. جاس كاسىپكەردىڭ العا قويعان ماقساتتارىنىڭ ءبىرى – ۇلكەن كونديتەرلىك تسەح اشۋ. الداعى ۋاقىتتا ءوز كاسىبىن جۇرگىزۋگە جەكە جالدامالى ورىن الىپ, كەڭەيتۋدى جوسپارلاپ وتىر.
ءوڭىر اكىمىنىڭ ءباسپاسوز قىزمەتىنىڭ مالىمەتىنشە, وڭىردە 59 مىڭ شاعىن جانە ورتا بيزنەس سۋبەكتىسى تىركەلگەن. وندا 110 مىڭ ادام جۇمىسپەن قامتىلعان, بۇل وتكەن جىلمەن سالىستىرعاندا 14,1 پايىزعا ارتىق. بۇگىندە بارلىعى 219 گرانت بەرىلگەن.
جەتىسۋ وبلىسى