قارجى ورتالىعىنىڭ سەنىمدى جۇمىسى

«قازىردىڭ وزىندە ءبىزدىڭ ورتالىق ارقىلى ەل ەكونوميكاسىنا 10,9 ملرد دوللاردان استام قاراجات, ونىڭ ىشىندە AIX بيرجاسى ارقىلى – 4,6 ملرد جانە قاتىسۋشىلاردان 6,3 ملرد ينۆەستيتسيا تارتىلدى. وسىلايشا, ورتالىقتىڭ 2025 جىلعا دەيىنگى دامۋ ستراتەگياسىندا قويىلعان مىندەت ورىندالدى. ورتا­مەرزىمدى كەلەشەكتە ءبىز ينفراقۇرىلىمدى دامىتۋدى جالعاستىرامىز جانە نارىققا كومىرتەگى كۆوتاسى مەن تۇراقتى قارجى­لاندىرۋ سياقتى سۇرانىسقا يە قۇرالداردى ۇسىناتىن بولامىز», دەيدى «استانا» حالىقارالىق قارجى ورتالىعىنىڭ باسشىسى رەنات بەكتۇروۆ.

بيىل احقو-دا 600-دەن استام جاڭا قاتىسۋشى كومپانيالار تىركەلگەن. ولار­دىڭ جالپى سانى الەمنىڭ 78 ەلىنەن 2 300-دەن استام كومپانيانى قۇرايدى. قارجى ورتالىعى قىزمەتىنىڭ بارلىق كەزەڭىندە احقو قاتىسۋشىلارى ەل بيۋدجەتىنە 68,5 ملرد تەڭگە كولەمىندە سالىق تولەپ ۇلگەرىپتى. اسىرەسە كولىك, لوگيستيكا, اگروونەركاسىپتىك جانە ءوندىرۋشى كەشەندەر, جاڭارتىلاتىن ەنەرگيا كوزدەرى (جەك), IT سياقتى باعىتتار ەداۋىر جاقسى دامىعان. ورتا ءدالىز جوباسى بويىنشا «قازمۇنايگاز» ەنشىلەس قۇرىلىمى اbu Dhabi Ports Group-پەن بىرلەسىپ احقو-دا Caspian Integrated Maritime Solutions بىرلەسكەن كاسىپورنىن تىركەدى. ەكى ءىرى تانكەر اقتاۋ پورتىنا كەلدى. قتج گرۋزيا مەن ازەربايجاننىڭ ۇلتتىق كومپانيالارىمەن بىرلەسىپ ورتا ءدالىزدىڭ قۇرلىقتاعى جوبالارىنا ينۆەستيتسيا سالۋ ءۇشىن ورتاق كاسىپورىن قۇردى. AIX-تە قارىز قۇرالدارى نارىعى ونىڭ 56 ليستينگى ارقىلى رەكوردتىق ءوسۋدى كورسەتەدى.

تارتىلعان كاپيتالى بيىل 1,95 ملرد دول­لاردان اساتىن 7 ۇلەستىك قۇرال ورنا­لاس­­تىرىلعان. ونىڭ اراسىندا AIX رەسمي تى­زى­مىنە «KEGOC» اق اكتسيالارى ەنگى­زىل­دى.­ وسى جىلى وتاندىق جانە ەۋروپالىق 14 برو­كەر مەن كاستوديان AIX مۇشەلەرى اتان­عان.

«Aستانا» حالىقارالىق بيرجاسىندا ساۋدا-ساتتىق كولەمى وتكەن جىلى 173 ميلليون دوللاردى قۇراسا, وسى جىلى 510 ميلليون دوللاردى كورسەتىپ وتىر. AIX ورتالىق دەپوزيتاريىندەگى جەكە شوت­تار­دىڭ سانى 1,5 ملن-نان اسىپ, قاراشا ايىن­دا بيرجاداعى ساۋدا-ساتتىقتىڭ 61 پا­­يىزى شەتەلدىك ينۆەستورلار تاراپى­نان جاسالعان. سوڭعى كەزدەرى اكتيۆتەر مەن قورلاردى باسقارۋ سەكتورىنا قىزى­عۋ­شىلىق ارتۋىنا بايلانىستى احقو باس­قارۋىنداعى اكتيۆتەر كولەمى 82%-عا ءوسىپ, بۇگىندە 1 ميلليارد دوللاردى قۇراپ وتىر.

قازىرگى كەزدە تىركەلگەن قورلاردىڭ سانى جىل ىشىندە 20-دان 37-گە دەيىن ۇلعايدى. ال باسقارۋداعى ينۆەستيتسيالىق قورلار اكتيۆتەرىنىڭ كولەمى 616 ملن دوللارعا جەتتى.

ينۆەستيتسيالاردى تارتۋعا جاردەم­دەسۋ ءۇشىن احقو ەلىمىزدىڭ قارجى نارى­عىندا بۇرىن بولماعان جاڭا ونىمدەر مەن قىزمەتتەردى دامىتۋدى جالعاستىرۋدا. ماسەلەن, بىلتىرعى جىلدان بەرگى دەرەكتەر بويىنشا احقو كريپتوبيرجالارىنىڭ وتاندىق بانكتەرمەن ءوزارا ارەكەتى جونىن­دەگى قانات­قاقتى جوبا اياسىنداعى ترانزاكتسيالار كولەمى شامامەن 220 ميل­ليون دوللاردى قۇرايدى. تەك ساۋدا-سات­تىق وتكەن جىلمەن سالىستىرعاندا 104 ەسە ءوسىپ, 217 ملن دوللاردان اسىپتى. كليەنتتەر سانى 6,7 ەسە ۇلعايىپ, تۇتىنۋشى سانى 41 384 جەتتى.

احقو كراۋدفاندينگتىك پلاتفورمالارى جالپى سوماسى 35 ملن دوللار بولاتىن 300-دەن استام جوبا­نى قارجىلاندىرعان. بيىلدىڭ وزىندە 14,3 ملن دوللارعا 150 جوبا قارجىلاندىرىپتى. ونىڭ اراسىندا IT, قۇرىلىس, ساۋدا, اۋىل شارۋاشىلىعى, قىزمەتتەر, ءوندىرىس جانە ماشينا جاساۋ سياقتى سالالار بار. قارجى قىزمەتتەرىن رەتتەۋ جونىندەگى كوميتەتى احقو-دا قارجىلىق قىزمەتتەر كورسەتەتىن 20 كومپانياعا رۇقسات بەرىپ, 7 ASP كەڭەسشىسى (كومەكشى قىزمەتتەردى جەتكىزۋشىلەر) تىركەلدى. مۇنداي كومپانيالاردىڭ جالپى سانى 116-عا جەتىپ وتىر.