وبلىستىق دراما تەاتردا ۋيليام شەكسپيردىڭ «اساۋعا تۇساۋ» مۇڭدى كومەدياسى كورەرمەن نازارىنا ۇسىنىلدى. اۋەلى قويىلىم جابىق تۇردە كورسەتىلىپ, كاسىبي مامانداردىڭ پىكىرى تىڭدالدى.
كورەرمەن زالىنا كىرگەن بەتتە بەينە ءبىر شەكسپير ءومىر سۇرگەن XV-XVI عاسىرعا تاپ بولعانداي كۇي كەشتىك. ساحنا سۋرەتشىلەرى سول زاماننىڭ كلاسسيتسيزم ستيلىندەگى ساۋلەت ونەرىن ابدەن زەرتتەپ بارىپ ىسكە كىرىسكەنگە ۇقسايدى. تاريحتى پاراقتاساق, «اساۋعا تۇساۋ» كومەدياسى تەاتر ساحناسىنا 1948 جىلى شىققان ەكەن. سودان بەرى بۇل قويىلىم بارلىق بۋىنداعى اكتەرلەردىڭ شەبەرلىكتەرىن شىڭداپ كەلەدى. سپەكتاكلدىڭ قويۋشى-رەجيسسەرى بارزۋ ابدۋراززاكوۆ 500 جىل بۇرىن جازىلعان پەسانىڭ ءالى دە وزەكتى ەكەنىن ايتادى.
– بۇل قويىلىمعا اسا جاۋاپكەرشىلىكپەن دايىندالدىق. اكتەرلەر دايىندىق كەزىندە بارىن سالدى. كورەرمەننىڭ كوڭىلىنەن شىعادى دەپ ويلايمىن. ايتا كەتەيىن, ۋ.شەكسپير بۇل شىعارماسىن 28 جاسىندا عانا جازىپ, ماڭگىلىك دۇنيە قالدىردى, – دەيدى تاجىكستاننىڭ ەڭبەك سىڭىرگەن قايراتكەرى بارزۋ ابدۋرااززاكوۆ.
يتاليانىڭ پادۋيا قالاسىندا وربىگەن وقيعاعا توقتالىپ وتەيىك: اپالى-ءسىڭىلى قىزداردىڭ ءبىرى بيانكا بيازى, مەيىرىمدى, كىشىپەيىل بولسا, كاتەرينانىڭ مىنەزىن ادام ءتۇسىنىپ بولمايدى. شاپپا-شاپ كەتۋگە ءازىر تۇرادى. اكەلەرى باپتيستا بولسا, بيانكاعا عاشىق بولعان جىگىت ليۋچەنتسيوعا الدىمەن كاتەرينانى كۇيەۋگە بەرۋىم كەرەك دەپ شارت قويادى. قىزۋقاندى قىزعا قايبىر جىگىت قىزىقسىن. اقىرى امالىن تاپقان ليۋچەنتسيو تاكاپپار, وركوكىرەك پەترۋچيوعا بارىپ, اۋقاتتى وتباسىندا مىنەزى شايپاۋ قىز بارىن ايتادى. العان بەتتەن قايتپايتىن پەترۋچيو بيانكاعا ءسوز سالىپ قانا قويماي, ءوز دەگەنىنە كوندىرىپ, «بەتەگەدەن بيىك, جۋساننان الاسا» ەتىپ تاربيەلەيدى. كەرىسىنشە, ساليقالى دەگەن كاتەرينا كۇيەۋىنىڭ شاقىرتۋىنا كەلمەي ىڭعايسىز جاعدايعا قالدىرادى...
جۋىقتا عانا كورەرمەنگە جول تارتقان سپەكتاكل كوپشىلىككە وي سالىپ, ساناداعى سان سۇراققا جاۋاپ بەرۋى مۇمكىن.
وسكەمەن