ادىلەتتى قازاقستاندى قۇرۋ ماقساتىندا باس پروكۋراتۋراعا بيزنەس سالاسىنداعى زاڭسىزدىقتاردىڭ جولىن كەسۋ مىندەتى جۇكتەلگەن. سونىڭ ءبىر باعىتى – ماڭىزدى ينۆەستيتسيالىق جوبالارعا قولداۋ كورسەتۋ.
وسى ماقساتتا اقتوبە وبلىستىق پروكۋراتۋراسىنىڭ بازاسىندا فرونت-كەڭسە قۇرىلىپ, پروبلەمالىق ماسەلەلەردى ءتيىمدى شەشۋ, ينۆەستورلاردىڭ قۇقىقتارى مەن زاڭدى مۇددەلەرىن قالپىنا كەلتىرۋ باعىتىندا جۇمىس جۇرگىزىپ جاتىر. تاياۋ كۇندەرى وبلىس پروكۋراتۋراسى فرونت-كەڭسە ارقىلى كەلىپ تۇسكەن «قازگەورۋد» جشس-عا قاتىستى پروبلەمالىق كەيستى قارادى.
بۇل ينۆەستور حرومتاۋ اۋدانىندا 45 ملرد تەڭگە ينۆەستيتسيانى قۇرايتىن مىس جانە مىرىش ءوندىرۋ بويىنشا «ليماننوە» كەن ورنىن يگەرۋ ءىرى جوباسىن ىسكە اسىرىپ كەلەدى. ءبىر جارىم جىل بويى ينۆەستوردىڭ جول قۇرىلىسىنا جەر ۋچاسكەسى بولىنبەگەندىكتەن, جوبانى دامىتۋعا مۇمكىندىگى بولماعان. جول سالۋ قاجەت بولعان اۋماق 18 شارۋا قوجالىعىنىڭ جەر ۋچاسكەلەرى ارقىلى وتكەندىكتەن, ولار قۇرىلىس جۇمىستارىن جۇرگىزۋگە كەلىسپەيتىنىن بىلدىرگەن.
پروكۋراتۋرانىڭ ارالاسۋىمەن اۋدان اكىمدىگى جانە باسقا دا مۇددەلى مەملەكەتتىك ورگاندار شارۋا قوجالىقتارىنىڭ باسشىلارىمەن اتالعان جەر ۋچاسكەلەرىن ساتىپ الۋ بويىنشا كەلىسسوزدەر جۇرگىزدى. ناتيجەسىندە, ينۆەستور مەن قوجالىق يەلەرى اراسىندا كەلىسىمگە قول جەتكىزىلىپ, قاجەتتى جەر ۋچاسكەلەرى مەملەكەتتىڭ جەر قورىنا قايتارىلدى. بۇگىنگى تاڭدا جەر كوميسسياسىنىڭ وڭ قورىتىندىسىمەن اۆتوجول سالۋ ءۇشىن جەر ۋچاسكەلەرىن بەرۋ تۋرالى شەشىم قابىلداندى.
وسى ورايدا پروكۋراتۋرادا بيزنەستى قورعاۋ ماقساتىندا ينۆەستورلار مەن كاسىپكەرلەردىڭ قۇقىقتارىن قورعاۋ جونىندەگى ءموبيلدى توپ جانە CALL-ورتالىق جۇمىس ىستەيتىنىن ەسكە سالامىز. بيزنەس سۋبەكتىلەرى (ينۆەستورلار, كاسىپكەرلەر) قيىندىقتارعا تاپ بولعان جاعدايدا, وزدەرىنىڭ بۇزىلعان قۇقىقتارى مەن مۇددەلەرىن قورعاۋ جانە قالپىنا كەلتىرۋ ءۇشىن پروكۋراتۋرا ورگاندارىنا جۇگىنە الادى.