ۇلتتىق ۇلاننىڭ اۆياتەحنيكا پاركى جاڭا ۇشاقپەن تولىقتى

ۇشاقتى جەتكىزۋدى قىتاي حالىق رەسپۋبليكاسىنىڭ قازاقستان  رەسپۋبليكاسىنداعى ەلشىلىگى جانىنداعى اسكەري اتتاشە اپپاراتى جانە قىتايدىڭ اۆياتسيا ونەركاسىبى كورپوراتسياسىنىڭ «CATIC» كومپانياسى جۇزەگە اسىردى.

ايتا كەتەيىك, «CATIC» كومپانياسى 1979 جىلدان قازىرگى ۋاقىتقا دەيىن الەمنىڭ 60-تان استام ەلىنە قارۋ-جاراق پەن اسكەري تەحنيكانىڭ 2600-دەن استام ءتۇرىن, ونىڭ ىشىندە اۋە كەمەلەرىنىڭ 35 ءتۇرىن جەتكىزدى.

قازاقستان رەسپۋبليكاسىنىڭ ۇلتتىق ۇلانى مەن قىتاي اۆياتسيا ونەركاسىبى اراسىنداعى ىنتىماقتاستىق 2016 جىلدارى باستالعان بولاتىن. ناتيجەسىندە ەلىمىزدىڭ قۇقىقتىق ءتارتىپ اسكەرلەرىنە 2018 جىلى العاشقى Y8F200W ۇشاعى جەتكىزىلدى. ۇلتتىق ۇلاننىڭ الدىنا قويىلعان بارلىق قىزمەتتىك-جاۋىنگەرلىك مىندەتتەردى ورىنداۋ بارىسىندا بۇل ۇشاق قازاقستاننىڭ ءارتۇرلى كليماتتىق جاعدايلارىندا پايدالانۋعا قابىلەتتى.

Y8F200Wا ۇشاعى (كەڭەستىك ان-12 كولىك ۇشاعىنىڭ ەڭ جاقسى انالوگى) - بۇل ماكسيمالدى قاشىقتىعى 4100 كم بولاتىن تولىق قىسىمدى, كوپ ماقساتتى ورتاشا كولىك ۇشاعى جانە سالماعى 20 تونناعا دەيىنگى ءىرى جۇكتەردى دە, 86 اسكەري قىزمەتشىگە دەيىنگى قىزمەتتىك جولاۋشىلاردى دا تاسىمالداۋعا ارنالعان. ۇشاقتىڭ كرۋيزدىك جىلدامدىعى 550 كم/ساع, سونداي-اق تاجىريبەلىك جاعدايدا 10050 م بيىكتىكتە ۇشا الاتىنى بەلگىلى.

ۇشاقتا كۇندىز-ءتۇنى قولايسىز اۋا رايىندا جۇمىس ىستەۋگە قاجەتتى جابدىقتار بار, سونىمەن قاتار جابدىقتالماعان جانە دالالىق اەرودرومدارعا قونا الادى.

ءبىرىنشى ۇشاقتى پايدالانۋ ۇلتتىق ۇلانعا ەلدىڭ قوعامدىق قاۋىپسىزدىگىن قورعاۋ جانە شەت ەلدەرگە كومەك كورسەتۋ جونىندەگى مىندەتتەردى شەشۋدە اۆياتسيانى قولدانۋدىڭ مۇمكىندىگىن بىرنەشە ەسەگە ۇلعايتتى.

تەك 2023 جىلى سيريا اراب رەسپۋبليكاسىنا, تۇركيا رەسپۋبليكاسىنا جانە اۋعانستان يسلام امىرلىگىنە توتەنشە جاعدايلار كەزىندە گۋمانيتارلىق كومەك كورسەتۋ كەزىندە 120 توننادان استام گۋمانيتارلىق جۇك جەتكىزىلدى, 80-نەن استام ادام ەۆاكۋاتسيالاندى.

بارلىعى 2025 جىلعا دەيىن ء«بىر بەلدەۋ – ءبىر جول» جوباسى شەڭبەرىندە وتاندىق اۆياتسيا ونەركاسىبىن دامىتۋ ءۇشىن ۇلكەن ماڭىزى بار وسى ۇلگىدەگى تاعى 4 ۇشاقتى جەتكىزۋ جوسپارلانعان, بۇل ءوز كەزەگىندە قىتاي حالىق رەسپۋبليكاسى مەن قازاقستان رەسپۋبليكاسى اراسىنداعى دوستىق كوپىردى نىعايتادى, سونداي-اق ەكى ەل اراسىندا جان-جاقتى ستراتەگيالىق ارىپتەستىكتى دامىتۋعا جاڭا ۇلەس قوسادى.

– ۇلتتىق ۇلان تەك ورتالىق ازيا وڭىرىندە عانا ەمەس, تمد ەلدەرى اراسىندا دا وسى ۇلگىدەگى ۇشاقتاردى ساتىپ الۋدا ءىزاشار بولىپ تابىلادى. Y8F200Wا ۇشاعىن تاڭداۋ «باعا-ساپا» سياقتى كريتەريلەردى ءساتتى بىرىكتىردى. اۋە كەمەسىن قىتايدان قازاقستانعا ءساتتى جەتكىزگەنى ءۇشىن كومانديرگە جانە ەكيپاجدىڭ بارلىق قۇرامىنا ەرەكشە العىسىمدى بىلدىرگىم كەلەدى. ۇلتتىق ۇلاننىڭ اۆياتسيالىق بازاسىنىڭ ۇشۋ جانە ينجەنەرلىك-تەحنيكالىق قۇرامدارىن قىتاي حالىق رەسپۋبليكاسىنىڭ اۋماعىندا وقىتىپ, دايىنداعان زاۋىت وكىلدەرىنە ەرەكشە راحمەت, - دەپ اتاپ ءوتتى جۇمىس كەڭەسى بارىسىندا ۇلتتىق ۇلان باس قولباسشىسىنىڭ تەحنيكا جانە قارۋ-جاراق جونىندەگى ورىنباسارى گەنەرال-مايور كونستانتين ۆورونكين.

- بۇگىن قازاق ەلىندەگى دوستارىمىزبەن بىرگە وسىندا جينالۋ مەن ءۇشىن ۇلكەن مارتەبە. قىتاي مەن قازاقستاندى ورتاق تاۋلار مەن وزەندەر بايلانىستىرادى. بىزدەر تاتۋ كورشى, ادال دوس, سەنىمدى سەرىكتەستەر جانە باۋىرلاس حالىقپىز. قازاقستان رەسپۋبليكاسىنىڭ ۇلتتىق ۇلانى مەن قحر-نىڭ قازاقستان رەسپۋبليكاسىنداعى ەلشىلىگى جانىنداعى اسكەري اتتاشە اپپاراتىنىڭ قولداۋىمەن ۇشاقتى بەرۋ جانە جەتكىزۋ جوسپار بويىنشا ءساتتى اياقتالدى.

ىنتىماقتاستىق جىلدارىندا ءبىز ۇلتتىق ۇلاننىڭ اۆياتسيا ماماندارى ءوز ءىسىنىڭ كاسىپقويلارى ەكەنىنە كوز جەتكىزدىك. سىزدەرمەن ءوزارا بايلانىس ورناتۋ قىتاي قىزمەتكەرلەرىنە جاعىمدى اسەر قالدىرادى. ءبىز الدىڭعى قابىلدانعان ۇشاقتىڭ ساپالى جۇمىس كورسەتكەنىنە وتە قۋانىشتىمىز جانە ۇلتتىق ۇلان وسى ۇشاقتاردى ءتيىستى تۇردە پايدالانادى جانە قىزمەت كورسەتەدى, ال كەيىننەن – اۋە فلوتى جوعارى دارەجەدە جۇمىس ىستەي الادى دەگەن ۇمىتتەمىز. سونىمەن قاتار قازاقستاننىڭ ۇلتتىق قورعانىس ىسىنە ەلەۋلى ۇلەس قوسۋدى جالعاستىرا بەرەدى دەگەن ويدامىز. ءبىز ۇشاق وندىرۋشىلەرى رەتىندە اۋە كەمەسىنىڭ وسى ءتۇرىن پايدالانۋ مەن قىزمەت كورسەتۋدە جان-جاقتى قولداۋ مەن تاجىريبە الماسۋدى قامتاماسىز ەتۋ ءۇشىن قولدان كەلگەننىڭ ءبارىن جاساۋعا دايىنبىز جانە قىزمەت ەتۋ مەرزىمى كەزىندە تەحنيكالىق قولداۋ كورسەتەمىز.

قىتاي حالقىندا «دوستىق – تاۋسىلماس بايلىق» دەگەن ماقال بار. وسىلايشا, قىتاي مەن قازاقستان ىنتىماقتاستىق جانە سەرىكتەستىك تاريحىنىڭ كەلەسى تاراۋىن اشادى, - دەپ اتاپ ءوتتى «CATIC» كومپانياسىنىڭ كليەنتتەرگە قىزمەت كورسەتۋ دەپارتامەنتى ديرەكتورىنىڭ ورىنباسارى يانگ دجينگجي.