پرەمەر-مينيستر ءاليحان سمايىلوۆ قاتار مەملەكەتىنىڭ قازاقستانداعى ەلشىسى ابدۋلازيز بەن سۇلتان ءال-رۋمەيحيمەن كەزدەسۋ وتكىزدى.
ۇكىمەت باسشىسى قاتار قازاقستاننىڭ اراب الەمىندەگى ماڭىزدى ساياسي جانە ەكونوميكالىق سەرىكتەسى ەكەنىن اتاپ ءوتتى. 30 جىل بۇرىن ديپلوماتيالىق بايلانىس ورناتىلعان. ال كەيىنگى جىلدارى ەكىجاقتى قارىم-قاتىناستار ورنىقتى دامىپ كەلەدى, وعان ەكى ەل باسشىلارىنىڭ بەلسەندى بايلانىستارى ىقپال ەتتى.
ءاليحان سمايىلوۆ قازان ايىندا دوحادا وتكەن جوعارى دەڭگەيدەگى قازاقستان-قاتار بىرلەسكەن كوميسسياسىنىڭ 6-وتىرىسىنىڭ تابىستى بولعانىن اتاپ ءوتتى. سونىمەن قاتار وتىرىس اياسىندا ەكى ەلدىڭ 150-دەن استام كاسىپكەرىنىڭ قاتىسۋىمەن بيزنەس فورۋم ۇيىمداستىرىلدى.
«اتالعان ءىس-شارالار ءبىزدىڭ ساۋدا-ەكونوميكالىق بايلانىستارىمىزدىڭ كەڭەيۋىنە ايتارلىقتاي سەرپىن بەرەدى. ايتا كەتۋ كەرەك, بىلتىر ءبىزدىڭ ەكونوميكاعا تارتىلعان قاتار ينۆەستيتسياسىنىڭ كولەمى ءۇش ەسە ءوستى. سونداي-اق 10 ايدا تاۋار اينالىمىنىڭ كولەمى شامامەن ءۇش ەسەگە ءوستى. دەسە دە, ساۋدا جانە ينۆەستيتسيالىق ارىپتەستىكتى ارتتىرۋعا ءالى دە الەۋەت بار ەكەنى انىق. ءبىز قولدا بار مۇمكىندىكتەردى كەڭەيتۋگە مۇددەلىمىز. قازىرگى تاڭدا اگروونەركاسىپتىك كەشەندە بىرقاتار جوبانى بىرلەسىپ جۇزەگە اسىرۋ پەرسپەكتيۆالارى بار ەكەنىن ەرەكشە ىقىلاسپەن اتاپ وتكىم كەلەدى», دەدى پرەمەر-مينيستر.
اڭگىمە اقمولا وبلىسىندا بيداي وڭدەۋ زاۋىتىنىڭ قۇرىلىسى تۋرالى بولىپ وتىر. جوبا قۇنى شامامەن – 200 ملن دوللار. قازىرگى ۋاقىتتا ونىڭ تۇجىرىمداماسى مەن سەرىكتەستىك شارتتارى پىسىقتالىپ جاتىر.
«قازاقستاندا بيزنەستى دامىتۋعا قولايلى بارلىق جاعداي بار. ءبىز ءوز تاراپىمىزدان قاجەتتى قولداۋ كورسەتۋگە دايىنبىز», دەدى ءاليحان سمايىلوۆ.
ابدۋلازيز بەن سۇلتان ءال-رۋمەيحي مىرزا ۇكىمەت پەن ەل باسشىلىعىنىڭ جىلى قابىلداۋى مەن قولداۋى ءۇشىن ريزاشىلىعىن ءبىلدىردى. ەلشى قاتاردىڭ ەكىجاقتى قارىم-قاتىناستاردى دامىتۋعا, بيزنەس جوبالاردى جۇزەگە اسىرۋعا جانە ينۆەستيتسيالىق ارىپتەستىكتى نىعايتۋعا ۇلكەن قىزىعۋشىلىق تانىتىپ وتىرعانىن اتاپ ءوتتى.