استاناداعى ۇلتتىق اكادەميالىق كىتاپحانادا قازاقستاننىڭ ەڭبەك سىڭىرگەن قايراتكەرى, اقىن, جازۋشى بايانعالي ءالىمجانوۆتىڭ «الاش پەن ماناس» اتتى شىعارماشىلىق كەشى ءوتتى. ءىس-شاراعا سەنات توراعاسى ماۋلەن اشىمباەۆ قاتىستى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
پالاتا سپيكەرى اتالعان ادەبي كەش ەرەكشە مادەني-رۋحاني سيپاتقا يە ەكەنىن ايتتى. سونداي-اق ول ءىس-شارا عاسىرلارعا جالعاسقان قازاق-قىرعىز باۋىرلاستىعىنىڭ جارقىن كورىنىسى ەكەنىن تىلگە تيەك ەتتى.
«مەملەكەت باسشىسى قاسىم-جومارت كەمەل ۇلى توقاەۆ قىرعىزستان – ەلىمىز ءۇشىن باۋىرلاس مەملەكەت ەكەنىن ۇنەمى ايتىپ كەلەدى. سوڭعى جىلدارى ەلدەرىمىزدىڭ ءوزارا قارىم-قاتىناسى جاڭا بيىككە كوتەرىلىپ, جان-جاقتى دامۋدا. ونىڭ ىشىندە پارلامەنتارالىق ىنتىماقتاستىقتىڭ قارقىنىن ەرەكشە اتاپ وتكەن ءجون. ءوزارا مادەني بايلانىستارىمىزدىڭ دا ءجونى بولەك. بۇل رەتتە ءسۇيىنباي مەن ارىستانبەك, جامبىل مەن توقتاعۇل, كەنەن مەن وسمانقۇلدىڭ قارىم-قاتىناستارى ورتاق مادەني مۇرامىزدىڭ جارقىن سيمۆولى ەكەنى انىق. الاش قايراتكەرلەرىنىڭ قاتارىندا قىرعىز زيالىلارىنىڭ دا بولعانى تاريحتان ءمالىم. ال, ادەبيەتتىڭ قوس الىبى – مۇحتار اۋەزوۆ پەن شىڭعىس ايتماتوۆتىڭ قارىم-قاتىناسى بارشامىز ءۇشىن زور ماقتانىش. وسى ورايدا «ماناس» جىرى دا ادامزاتقا ورتاق مادەني مۇرا, تۇركى حالىقتارىنىڭ رۋحاني قۋاتىن كورسەتەتىن ۇزدىك تۋىندى ەكەنى ءسوزسىز», دەدى ماۋلەن اشىمباەۆ.
سونداي-اق سەنات توراعاسى ايگىلى جىردىڭ تارالۋىنا, تانىلۋىنا جانە قازاقستان مەن قىرعىزستاننىڭ مادەني ىنتىماقتاستىعىنىڭ نىعايۋىنا بايانعالي ءالىمجانوۆ ۇلكەن ۇلەس قوسىپ كەلە جاتقانىن اتاپ ءوتتى. ماۋلەن اشىمباەۆ قالامگەردىڭ قازاقتىڭ ۇلتتىق قۇندىلىقتارى مەن جىر ونەرىن دامىتۋداعى رولىنە دە نازار اۋداردى.
«بايانعالي ءالىمجانوۆتىڭ جىرشىلىق تالانتى ەرەكشە. ول قازاقتىڭ «قوبىلاندى باتىر», «ەر تارعىن» سەكىلدى جىرلارىن دا كەڭىنەن ناسيحاتتاۋعا زور ۇلەس قوستى. اعامىز – قازىرگى تاڭدا قازاقتان شىققان بىردەن-ءبىر ماناسشى دەپ اۋىز تولتىرىپ ايتا الامىز. سوندىقتان ول – قازاق پەن قىرعىزعا بىردەي سىيلى ازامات. وسىنداي شىعارماشىلىق كەشتەر مادەني قۇندىلىقتاردى ساقتاۋعا جانە باۋىرلاس حالىقتاردىڭ مادەني بايلانىستارىن ودان ءارى نىعايتۋعا ۇلكەن ۇلەس قوسادى», دەپ ماۋلەن اشىمباەۆ جازۋشىعا شىعارماشىلىق تابىس تىلەدى.
ءوز سوزىندە بايانعالي ءالىمجانوۆ «ماناس» جىرىنىڭ ۇلتتىق مادەنيەتكە تيگىزگەن زور ىقپالىنا توقتالىپ, ونىڭ جازىلۋ تاريحى جانە قازاق تىلىنە اۋدارىلۋى تۋرالى ايتتى.
ءىس-شاراعا پارلامەنت دەپۋتاتتارى مادەنيەت جانە اقپارات مينيسترلىگىنىڭ باسشىلىعى, قىرعىز رەسپۋبليكاسىنىڭ قازاقستانداعى ەلشىسىنىڭ كەڭەسشىسى زاراۆشان كۋراماەۆ, پۋبليتسيست, مەملەكەت جانە قوعام قايراتكەرى ساۋىتبەك ابدراحمانوۆ, قازاقستاننىڭ حالىق جازۋشىسى تولەن ابدىك, مەملەكەت جانە قوعام قايراتكەرلەرى قۋانىش سۇلتانوۆ پەن دارحان مىڭباي, فيلولوگيا عىلىمدارىنىڭ دوكتورى, پروفەسسور سەرىك نەگيموۆ, سونداي-اق, زيالى قاۋىم, قىرعىز ەتنومادەني بىرلەستىگىنىڭ مۇشەلەرى, قوعامدىق ۇيىمداردىڭ وكىلدەرى جانە تاعى باسقالارى قاتىستى.