كەيىنگى جىلدارى ەلىمىزدە قىتايدىڭ كولىكتەرى كوبەيە باستادى. جانار-جاعارمايمەن جىلجيتىن كولىكتەن باسقا, ەلەكترموبيلدەردىڭ دە قاتارى كۇن ساناپ ارتىپ كەلەدى. ال ولارعا قىزمەت كورسەتەتىن بىزدە مامان بار ما؟ سوندىقتان دا وسكەمەندەگى د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتى بازاسىندا قازاقستان مەن قىتاي اراسىنداعى ىنتىماقتاستىق ناتيجەسىندە لۋ بان شەبەرحاناسى اشىلدى.
شەبەرحانانىڭ اشىلۋ سالتاناتىنا قىتايدان كەلگەن دەلەگاتسيامەن بىرگە شىعىس قازاقستان وبلىسىنىڭ اكىمى ەرمەك كوشەرباەۆ, قىتايدىڭ قازاقستانداعى توتەنشە جانە وكىلەتتى ەلشىسى چجان سياو, عىلىم جانە جوعارى ءبىلىم ءمينيسترى ساياسات نۇربەك قاتىستى. ايتا كەتەيىك, بۇل شەبەرحانانى قۇرۋ تۋرالى كەلىسىمگە پرەزيدەنت قاسىم-جومارت توقاەۆتىڭ قىتاي حالىق رەسپۋبليكاسىنا كوكتەمدەگى ساپارى كەزىندە قول قويىلعان بولاتىن. كوپ ۇزاماي كەلىسىم شىعىس قازاقستان تەحنيكالىق ۋنيۆەرسيتەتى مەن تيانتسزين كاسىپتىك ينستيتۋتى اراسىنداعى ىنتىماقتاستىق اياسىندا جۇزەگە اسىرىلدى. ايتا كەتەيىك, لۋ بان شەبەرحاناسى قولدانبالى تەحنولوگيا جانە جوعارى تەحنيكالىق ءبىلىم باعىتىنداعى مامانداردى ازىرلەيدى.
– ەلىمىزدە تۇڭعىش رەت لۋ بان شەبەرحاناسى اشىلىپ جاتىر. مۇنى ەكى ەل اراسىنداعى دوستىقتىڭ نىشانى دەپ ايتۋعا بولادى. بۇل – تىكەلەي مەملەكەت باسشىسىنىڭ باقىلاۋىندا ىسكە اسىرىلعان جوبا. عىلىم جانە جوعارى ءبىلىم مينيسترلىگى قۇرىلعاندا ەل اۋماعىندا وسىنداي زەرتحانالار اشۋ تۋرالى تاپسىرما بەرگەن ەدى. بۇگىندە شەتەلدىڭ ەڭ مىقتى وقۋ ورىندارىن ەلىمىزگە شاقىرىپ, فيليالدارىن اشىپ جاتىرمىز. الداعى 5 جىلدا ەلىمىزدىڭ تاعى ءۇش-ءتورت قالاسىندا وسىنداي شەبەرحانا اشۋ جوسپارىمىزدا بار, – دەدى ساياسات نۇربەك.
ءمينيستردىڭ ايتۋىنشا, لۋ بان شەبەرحاناسى ءوڭىردىڭ دامۋىنا ۇلكەن سەرپىن بەرەدى. تەحنولوگيا قارىشتاپ دامىعان زاماندا ماشينا جاساۋ سالاسىندا دا ۇلكەن رەۆوليۋتسيا بولىپ جاتىر. ونىڭ ىشىندە ەلەكترموبيل كوش باسىنا شىعىپ كەلەدى. ماسەلەن, قىتايدا ماشينا جاساۋ سالاسىندا ەلۋدەن استام زاۋىت قۇرىلعان ەكەن. ولاردىڭ بولىمشەلەرى قازاقستانعا دا جوعارى كولەمدە ەنىپ جاتىر. تىڭ ادىسپەن شىعىپ جاتقان كولىكتەرگە قىزمەت كورسەتەتىن ينجەنەرلەر قاجەت. شەبەرحانا ماقساتى دا سول, مامان تاپشىلىعىن بولدىرماۋ. لۋ بان شەبەرحاناسىندا ودان بولەك روبوتتەحنيكا, جاساندى ينتەللەكتكە دە كوڭىل بولىنەدى. ونىڭ ءبارىن ويداعىداي جۇزەگە اسىرىلۋى ءۇشىن قوسىمشا قاراجات قاراستىرىلاتىنى دا ايتىلدى. قازىرگى ۋاقىتتا وقۋ ورنىنا 2 ملرد تەڭگەگە جۋىق قارجى بولىنگەن.
جاڭا جوبا جوسپارداعىداي جۇزەگە اسىپ جاتسا, ەكى ەل اراسىنداعى قارىم-قاتىناس نىعايىپ قانا قويماي, بىلىكتى مامانداردىڭ دايىندالاتىنى دا ءسوزسىز. «ەكى ەل باسشىسى بىرنەشە رەت كەزدەستى. ءار كەزدەسكەن سايىن وسى تاقىرىپتى ۇنەمى كوتەرىپ وتىردى. ەكى ەل ءۇشىن ماڭىزدى جوبا – لۋ بان شەبەرحاناسى ەڭ اۋەلى كادر تاپشىلىعىن جويادى. ەكىنشىدەن, وزگە دە وبلىستارمەن قارىم-قاتىناس نىعايادى», دەدى چجان سياو مىرزا.
ال دەلەگاتسيا وكىلدەرى قىتايدىڭ بىلىكتى ماماندارى تيانتسزين كاسىپتىك ينستيتۋتىنان تۇلەپ شىعاتىنىن تىلگە تيەك ەتتى. ايتۋلارىنا قاراساق, بەيجىڭنەن ءجۇز-اق شاقىرىم جەردەگى تيانتسزين – بىلىمىمەن بەلگىلى قالا. لۋ بان دەپ وتىرعانىمىز – ەجەلگى قىتايدىڭ ونەرتاپقىشى. كەيدە ونى قىتايدىڭ لەوناردو دا ءۆينچيى دەيدى ەكەن.
ەل ەكونوميكاسىنا ۇلەس قوساتىن تۇڭعىش شەبەرحانادا تەحنيكالىق ۋنيۆەرسيتەت ستۋدەنتتەرى قىتايدىڭ زاماناۋي جابدىقتارىن پايدالانا وتىرىپ, اۆتوموبيل تەحنولوگيالارىن مەڭگەرۋگە مۇمكىندىك الادى. وسىلايشا, بولاشاق ينجەنەرلەر دايىندالادى. بۇگىنگى تاڭدا الەمنىڭ 19 ەلىندە 20 لۋ بان شەبەرحاناسى جۇمىس ىستەيدى. بۇل شەبەرحانا ەلەكترموبيلدەرگە قىزمەت كورسەتەتىن ينجەنەرلەردى دايارلاۋ ورتالىعى بولماق. مۇنداعى ستۋدەنتتەر ەلەكتر ستانسالارى مەن اككۋمۋلياتورلىق باتارەيالاردى جوندەۋگە ماشىقتانادى.
وسكەمەن