جەلتوقساننىڭ ىزعارلى كۇندەرى ادام بىلاي تۇرسىن, اڭدى دا ابىگەرگە تۇسىرگەن سىڭايلى. انشەيىندە قاراسىن كورسەتپەيتىن ەلىك ەكەش ەلىك تە ەلدى پانا تۇتىپ, قوتانعا كىرىپ كەتتى.
اۋەلى الەۋمەتتىك جەلىدە جاريالانعان بەينەباياننان كورگەنبىز. جاقسى اۋلىنان شىققان جولاۋشى ءتۇسىرىپتى. اتباسارعا تاياعاندا جولدىڭ قوس قاپتالىندا جۇزدەگەن ەلىك جوسىپ ءجۇر. قاراسى سونداي كوپ. ارينە, كوكشەتاۋ دالاسى ەلىكسىز ەمەس, بۇرىن دا بولعان, قازىر دە بار. بىراق ءدال مۇنداي ءۇيىر-ۇيىرىمەن جوسىپ جۇرگەنىن ەشكىم كوزىنە ىلىكتىرگەن جوق شىعار. تازا اۋاعا تابەتىڭ اۋىپ, ورمان-توعايدى ارالاي قالساڭ, ءبىرلى-جارىمى جانارىڭا ىلىگەتىن. ادەمى, تۇڭعيىق كوزدەرىمەن جاسقانا قاراپ, يت تۇمسىعى وتپەيتىن قالىڭ ورماننىڭ قويناۋىنا ءسىڭىپ كەتەر ەدى. بۇل جولعىسى, ءتىپتى, عالامات. استىعى جينالىپ الىنعان القاپتا, اعاش باۋرىندا جوسىپ ءجۇر. قارا جولدىڭ بويىندا تىنىمسىز اعىلىپ جاتقان كولىكتەن دە سەسكەنىپ, بوي تاسالامايدى. مۇنشالىقتى كوپ ەلىك قايدان كەلدى ەكەن؟ اڭ جايىن بىلەمىن دەيتىندەردىڭ ايتۋىنا قاراعاندا, ىرگەدەگى سىبىردەن اۋعان سىڭايلى. وسى پىكىر قيسىنعا كەلەدى. ءدال قازىر يەن دالادا ەلىكتىڭ اۋزىنا ىلىگە قوياتىن ازىق تا جوق. ساباندى شەتەلدىك كومبايندار ۋاقتاپ ۇگىپ, شاشىپ تاستاعان. دالانىڭ ەركە اڭى بىلاي تۇرسىن, جىلقى جارىقتىقتىڭ دا نەسىبەسى ازايعان.
اق قار جامىلىپ, توماعا-تۇيىق كۇي كەشكەن جالپاق جوندا جان باعاتىن ىرىزدىق تاپپادى ما ەكەن, ەلىك بايعۇس ەل ىشىنە ەنىپ كەتتى. الدىمەن كوكشەتاۋ قالاسى مەن زەرەندى جاق بەتتەگى ساياجايلاردىڭ ىشىنەن كوزگە ىلىككەن. كەلەسى كۇنى قالانىڭ قاق ورتاسىنداعى دەمالىس پاركىنىڭ ماڭىنان تابىلدى. قوپا كولىن جاعالاي سىرەسكەن مۇز ۇستىندە الدەنەشەۋى ءجۇر. قالاي بولعان كۇندە دە تاعى ەمەس پە, ۇركەدى, ارينە. اۋىل-اۋىلدىڭ ىشىنە كىرگەن ەلىك اتاۋلى يتكە جەم بولماسىنا كىم كەپىل؟ تابيعاتقا, ونىڭ ءتول بالاسى ەلىككە جانى اشيتىن اعايىن ءشوپ شاشىپ, جەم توكسە ەكەن دەيسىڭ دە. ءسويتىپ, قولىنداعى بارىمەن بولىسسە, ءتۇز تاعىسى تۋلاقتاي توزباي, تۇياعىن ساقتاپ قالار ما ەدى, كىم ءبىلسىن؟ ء«بىر قىسقا قويان تەرىسى دە شىدايدى» دەگەندەي, ەلىكتىڭ ەركەلىگىن كوتەرۋگە ەلدىڭ ەلدىگى دە جەتىپ قالار. شىبىن جانىن ساقتايمىن دەپ شىرىلداپ اۋىل ارالاعان كەربەز كەسكىندى, جاۋتاڭداعان جانارلى جان يەسىنىڭ وبالىن ارقالاعاندا نە تابامىز؟ قاندى اۋىزىن قامداعان اشكوزدەرگە ەلدەگى اقساقال ءتايت دەپ تىيىم سالسا, تاماشا بولار ەدى.
كوكشەتاۋ