كەلەسى جىلدىڭ 19 قاڭتارى مەن 1 اقپان ارالىعىندا وڭتۇستىك كورەيادا وتەتىن جاسوسپىرىمدەردىڭ قىسقى وليمپياداسىنا قانشا جولداما بۇيىرعانى بەلگىلى بولدى, دەپ حابارلايدى Egemen.kz تۋريزم جانە سپورت مينيسترلىگىنىڭ ءباسپاسوز قىزمەتىنە سىلتەمە جاساپ.
وڭتۇستىك كورەيانىڭ كانۆوندو پروۆينتسياسىنداعى كاننىن قالاسىندا وتەتىن IV قىسقى جاسوسپىرىمدەر وليمپياداسىنا ازىرگە 30 جولداما ەنشىمىزدە.
«2012 جىلدان بەرى ۇيىمداستىرىلىپ كەلە جاتقان جاسوسپىرىمدەردىڭ ءدۇبىرلى دوداسىنا ەلىمىزدىڭ سپورتشىلارى بيىل ءتورتىنشى مارتە قاتىسپاق. قازىرگى تاڭدا قازاقستان جاسوسپىرىمدەر قۇراماسىنىڭ قورجىنىندا بياتلون, كونكيمەن جۇگىرۋ, شورت-ترەك, كەرلينگ, شايبالى حوككەي, شاڭعى جارىسى, شاڭعىمەن ترامپليننەن سەكىرۋ, شاڭعى قوسسايىسى, تاۋ شاڭعىسى, فريستايل پاراللەل موگۋل تۇرىنەن جولداما بار. دەسە دە, جولداما سانى ءالى دە تولىعا ءتۇسۋى مۇمكىن. ويتكەنى جاسوسپىرىمدەر وليمپياداسىنا ليتسەنزيا بەرەتىن جارىستار جالعاسىن تابادى», دەپ جازىلعان اقپاراتتا.
IV قىسقى جاسوسپىرىمدەر وليمپياداسىنىڭ اشىلۋ سالتاناتى 2024 جىلدىڭ 19 قاڭتارىندا كاننىنداعى Gangneuung Oval سپورت كەشەنىندە وتسە, ويىنداردىڭ جابىلۋ سالتاناتى 2024 جىلدىڭ 1 اقپانىندا Gangneung Olympic Park سپورت كەشەنىندە ۇيىمداستىرىلماق.