وتكەن اپتادا ەلوردامىزداعى جاقسىلىق ۇشكەمپىروۆ اتىنداعى جەكپە-جەك سارايىندا تمد-عا مۇشە مەملەكەتتەر اسكەريلەرى اراسىندا ارميالىق قويان-قولتىق ۇرىستان چەمپيونات جانە ەلىمىزدىڭ قورعانىس ءمينيسترىنىڭ كۋبوگى ءۇشىن قويان-قولتىق ۇرىستان رەسپۋبليكالىق تۋرنير ءوتتى.
اشىلۋ سالتاناتىندا قورعانىس ءمينيسترىنىڭ ورىنباسارى, گەنەرال-لەيتەنانت سۇلتان كامالەتدينوۆ پەن كەڭەس وداعىنىڭ باتىرى, حالىق قاھارمانى, اۆياتسيا گەنەرال-مايورى توقتار اۋباكىروۆ سپورتشىلارعا اق جول تىلەدى. «دوستاستىق ەلدەرى اسكەري قىزمەتشىلەرىنىڭ قاتىسۋىمەن وتەتىن جارىستار ولارعا وزدەرىن بارىنشا سىناۋعا جانە جاۋىنگەرلىك قابىلەتتەرىن كورسەتۋگە مولىنان مۇمكىندىك بەرەدى. اسكەريلەر وزدەرىنىڭ كۇشتىلىگىن تەك وسىنداي جارىستاردا عانا كورسەتسىن. ەشبىر ەلدە قارۋلى قاقتىعىس, سوعىس بولماسىن», دەدى حالىق قاھارمانى.
قورعانىس مينيسترلىگىنىڭ سپورت كوميتەتى – ورتالىق سپورت كلۋبى ۇيىمداستىرعان جارىسقا بەلارۋس, قازاقستان, رەسەي جانە وزبەكستاننان كەلگەن 180-نەن اسا سپورتشى قاتىستى. ەرلەر سەگىز سالماق دارەجەسىندە, ايەلدەر ءۇش سالماق دارەجەسىندە كۇش سىناستى.
ەكى كۇنگە سوزىلعان ءتۋرنيردىڭ جەڭىمپازدارى مەن جۇلدەگەرلەرىن ماراپاتتاۋ ءىس-شاراسىنا قورعانىس ءمينيسترى, گەنەرال-پولكوۆنيك رۋسلان جاقسىلىقوۆ قاتىسىپ, ءوز سوزىندە مەملەكەت باسشىسى قاسىم-جومارت توقاەۆ ۇلت دەنساۋلىعىن نىعايتۋ مەن حالىق اراسىندا بۇقارالىق سپورتتى دامىتۋ ماسەلەلەرىنە كوپ كوڭىل بولەتىنىن اتاپ ءوتتى. ول حالىقارالىق قويان-قولتىق جەكپە-جەك فەدەراتسياسىنىڭ پرەزيدەنتى سەرگەي استاحوۆقا سپورتتىڭ وسى ءتۇرىن ناسيحاتتاعانى ءۇشىن العىسىن ءبىلدىرىپ, سپورتشىلاردى بايراقتى باسەكەنىڭ اياقتالۋىمەن قۇتتىقتادى.
– قويان-قولتىق ۇرىس – ەلىمىزدەگى بارلىق كۇشتىك قۇرىلىم ءۇشىن ماڭىزعا يە سپورت ءتۇرى. قارۋلى كۇشتەردە اسكەري قىزمەتشىلەردىڭ دەنە شىنىقتىرۋ باعدارلاماسى پاندەرىنىڭ ءبىرى. بۇل اسكەري قىزمەتشىلەردى شىنىقتىرىپ, مىقتى ءارى ءتوزىمدى ەتەتىن جەكپە-جەك ءتۇرى, – دەپ اتاپ ءوتتى مينيستر.
حالىقارالىق قويان-قولتىق ۇرىس فەدەراتسياسىنىڭ پرەزيدەنتى سەرگەي استاحوۆ مينيسترلىك باسشىلىعىنا ءىس-شارانى جاقسى ۇيىمداستىرعانى ءۇشىن العىسىن ءبىلدىردى.
تمد-عا مۇشە مەملەكەتتەر دوستىق ارميالارى چەمپيوناتىنىڭ قورىتىندىسى بويىنشا كوماندالىق ەسەپتە قازاقستان قۇراماسى جەڭىسكە جەتتى. ەكىنشى ورىندى رەسەي كومانداسى ەنشىلەسە, وزبەكستاندىق سپورتشىلار ءۇشىنشى ورىنعا يە بولدى. جەكە بىرىنشىلىكتە 55 كەلىگە دەيىنگى سالماقتا سەرجانت ايدىن نۇريدينوۆ (قازاقستان), 60 كەلىگە دەيىنگى سالماقتا مايور امان شاكىرتوۆ (قازاقستان), 65 كەلىگە دەيىنگى سالماقتا اعا لەيتەنانت جانىبەك ءسابيت (قازاقستان), 70 كەلىگە دەيىنگى سالماقتا سەرجانت اندرەي لياشەنكو (رەسەي), 75 كەلىگە دەيىنگى سالماقتا سەرجانت وليمجون نومۋرودوۆ (وزبەكستان), 80 كەلىگە دەيىنگى سالماقتا كۋرسانت تەمىرحان حاسانوۆ (رەسەي), 85 كەلىگە دەيىنگى سالماقتا سەرجانت ازامات اسىلبەك ۇلى (قازاقستان), 85 كەلىدەن جوعارى سالماقتا لەيتەنانت رۋسلان گاباراەۆ (رەسەي) چەمپيون اتاندى.
سونىمەن بىرگە رەسەيلىك سپورتشى رۋسلان گاباراەۆقا «ۇزدىك تەحنيكا» اتالىمى بەرىلدى. ال «جەڭىسكە دەگەن جىگەرى ءۇشىن» اتالىمىنا وزبەك سپورتشىسى سەرجانت شوحرۋز شاريفوۆ يە بولدى. ءادىل تورەلىك جاساعانى جانە سپورتتىق قاعيداتتاردى مۇلتىكسىز ورىنداعانى ءۇشىن جارىس تورەشىسى, قورعانىس مينيسترلىگى ورتالىق سپورت كلۋبى سپورتتىق ءىس-شارالاردى ۇيىمداستىرۋ ءبولىمىنىڭ وفيتسەرى, اعا لەيتەنانت نۇربول ساياباەۆ گراموتامەن ماراپاتتالدى.