بۇگىن اباي وبلىستىق مادەنيەت, تىلدەردى دامىتۋ جانە ارحيۆ ىستەرى باسقارماسىنىڭ جانە امىرە قاشاۋباەۆ اتىنداعى وبلىستىق فيلارمونيانىڭ ۇيىمداستىرۋىمەن «جالعىز ارشا» اتتى ءداستۇرلى ءان بايقاۋى باستالدى, دەپ جازادى Egemen.kz.
بايقاۋعا استانا, الماتى, پاۆلودار, جەتىسۋ, بقو, شقو جانە اباي وبلىسىنىڭ اۋداندارىنان ءداستۇرلى ءان ونەرىندە باق سىناپ جۇرگەن تالانتتار قاتىسىپ جاتىر. قازىلار القاسىنىڭ توراعاسى — قازاقستاننىڭ حالىق ءارتىسى رامازان ستامعازيەۆ. اباي جۇرتىنىڭ اتىن اسقاقتاتىپ, امىرەنىڭ ەسىمىن اۋەلەتكەن ءان بايقاۋىنا ىرىكتەلگەن 38 ءانشى كەلگەنى بەلگىلى بولدى. اۋقىمدى ۇلتتىق ونەر باسەكەسىنىڭ قورىتىندىسى ەرتەڭ, 18 جەلتوقسان كۇنى اباي تەاترىندا جاريالاناتىن بولادى. «مىڭنان تۇلپار, جۇزدەن جۇيرىك» بولىپ باس جۇلدەنى ەنشىلەگەن انشىگە 1 000 000 تەڭگە تابىس ەتىلەتىن بولادى.