تاۋەلسىزدىك مەرەكەسى قارساڭىندا باتىس قازاقستان وبلىسىندا پاترۋلدىك پوليتسيا قىزمەتكەرلەرىنە سۋ جاڭا 96 كولىكتىڭ كىلتى تابىس ەتىلدى. وسىمەن جىل باسىنان بەرى وڭىردە پوليتسياعا بەرىلگەن قىزمەتتىك اۆتو سانى 148-گە جەتتى.
«قۇقىق قورعاۋ ورگاندارىنىڭ باستى قىزمەتى – ەلىمىزدەگى, سونىڭ ىشىندە وبلىس اۋماعىنداعى تىنىشتىقتى قورعاۋ. وسى ماقساتتا پوليتسيا قىزمەتكەرلەرىنىڭ اتقارىپ جاتقان جۇمىسى وتە بەلسەندى دە سالماقتى. وڭىردە وتكەن جىلمەن سالىستىرعاندا قىلمىس سانى 25 پايىزعا ازايدى. وكىنىشكە قاراي جول-كولىك وقيعالارى ازايماي تۇر. ءتىپتى بىلتىرمەن سالىستىرعاندا سانى ارتا تۇسكەن. سوندىقتان پوليتسيا قىزمەتكەرلەرىنە وسى جەڭىل اۆتوكولىكتى ساتىپ الىپ بەرۋگە تۋرا كەلدى. بيىل ءبىز وبلىس بيۋدجەتىنەن بىلتىرمەن سالىستىرعاندا پوليتسيا قىزمەتكەرلەرىنىڭ جۇمىسىن قامتاماسىز ەتۋگە قاراجاتتى 20 پايىزعا كوبىرەك بولدىك. ەندى الداعى ۋاقىتتا پوليتسيا بۇرىنعىدان دا ناتيجەلى قىزمەت كورسەتەدى دەپ سەنەمىز. قۇقىق قورعاۋ ورگاندارىنىڭ ماتەريالدىق-تەحنيكالىق بازاسىن ۇنەمى جاقسارتىپ وتىرۋ – پرەزيدەنتتىڭ تاپسىرماسى. بيىل ورال جانە اقساي قالالارىنداعى قوعامدىق ءتارتىپتى قاداعالاۋ ءۇشىن بەينەباقىلاۋ كامەرالارىن ساتىپ الىپ بەردىك. مۇنداي قولداۋ الداعى ۋاقىتتا دا جالعاسادى», دەدى سالتاناتتى ءىس-شارادا سويلەگەن باتىس قازاقستان وبلىسىنىڭ اكىمى ناريمان تورەعاليەۆ.
پوليتسيانىڭ ماتەريالدىق-تەحنيكالىق بازاسىن جاقسارتۋ ءۇشىن وبلىستىق بيۋدجەتتەن بولىنگەن قارجى 5,7 ملرد تەڭگە بولىپتى. جاڭا كولىكتەردىڭ 45-ءى قالالىق, 45-ءى وبلىستىق پاترۋلدىك پوليتسيا باتالونىنا تاپسىرىلعان. ءدال وسى پاترۋلدىك پوليتسيا قىزمەتكەرلەرى جىل باسىنان بەرى وبلىس اۋماعىندا توناۋ, قاراقشىلىق, ۇرلىق بويىنشا 200-دەن استام قىلمىستى اشقان ەكەن. جالپى وڭىردە بيىل 190 مىڭنان اسا جول ەرەجەسى بۇزىلعان. بۇل – تىركەلگەن قىلمىس.
بقو پوليتسيا دەپارتامەنتىنىڭ باستىعى ارمان ورازاليەۆ جاڭا كولىكتەردىڭ وڭىردەگى جول-كولىك وقيعالارىنىڭ سانىن ازايتۋعا سەپتىگىن تيگىزەتىنىنە سەنىمدى. وسى كولىكتەردىڭ ىشىندە ۇشەۋى ەرەكشە – «كيبەر-شەريف» دەپ اتالادى. ويتكەنى بۇل كولىككە ورناتىلعان اقىلدى كامەرا جىلدامدىق اسىرعان, ايىپپۇل تولەمەگەن, ىزدەۋدە جۇرگەن, تەحنيكالىق بايقاۋدان وتپەگەن, ساقتاندىرىلماعان كولىكتەردى بىردەن انىقتايدى. ينتەرنەتتى قاجەت ەتپەيدى. ءوزى انىقتاعان مالىمەتتى ارنايى ورتالىققا اۆتوماتتى تۇردە جولداي بەرەدى ەكەن.
«بۇگىن ءبىزدىڭ قوس پاترۋلدىك پوليتسيا باتالونىنىڭ جەكە قۇرامى قىزمەتتىك كولىكپەن تولىق جابدىقتالدى. بيىل 3 دانا «كيبەر-شەريف» جابدىعىن ىسكە قوسساق, الداعى جىلى تاعى 17 داناسىن ساتىپ الۋ جوسپاردا تۇر. بيىلدىڭ وزىندە جىل باسىنان بەرى 1 ملرد تەڭگەدەن استام ايىپپۇل بيۋدجەتكە ءوندىرىلدى», دەيدى ا.ورازاليەۆ.
«كيبەر-شەريفتەر» نەگىزىنەن رەسپۋبليكالىق جانە وبلىستىق ماڭىزى بار تاسجول بويىندا جۇرمەك.
وتكەن قاراشا ايىندا اقساي قالاسىنداعى بەينەباقىلاۋ كامەرالارى ىسكە قوسىلعان بولاتىن. سودان بەرى از ۋاقىت ىشىندە 1 700 قۇقىق بۇزۋشىلىق وقيعاسى انىقتالىپ, 43 ملن تەڭگە ايىپپۇل سالىنعان.
باتىس قازاقستان وبلىسى