كەنەسارى حاندى, ناۋرىزبايدى ماداقتايتىن «باتىر ناۋان» اتتى پوەما جازىپ, كەيىن وسى شىعارماسى ءۇشىن قۋعىن كورگەن اقىن قاليجان بەكحوجيننىڭ ءومىرى كۇرەسكە تولى.
قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى, اقىن-اۋدارماشى قاليجان بەكحوجيننىڭ 110 جىلدىعىنا وراي «ەرتىستىڭ قايراتتى قالامگەرى» اتتى ادەبي ەسكە الۋ كەشى ءوتتى. بۇقار جىراۋ اتىنداعى ادەبيەت جانە ونەر مۋزەيى مەن س.تورايعىروۆ اتىنداعى وبلىستىق كىتاپحانا مۇرىندىق بولعان ءىس-شارادا تۇلعانىڭ كىتاپتارى مەن جەكە زاتتارىنان كورمە ۇسىنىلدى.
اقىنعا «مەنىڭ زامانداستارىم» كىتابى ءۇشىن قازكسر-نىڭ اباي اتىنداعى مەملەكەتتىك سىيلىعى بەرىلدى. كەيىن ورەن ۇرپاقتى وتانشىلدىققا باۋلۋ ماقساتىندا «جۋسان» پوەماسىن جازدى. جازۋشى, ارداگەر جۋرناليست عالىمبەك جۇماتوۆ اتاپ وتكەندەي, كىرشىكسىز ماحابباتتىڭ رامىزىندەي بولعان «دۋدار-اي» ءانى نەگىزىندە «ماريام جاگورقىزى» اتتى پوەما جازعان قالامگەر اۋىز ادەبيەتىمىزدەگى ليروەپوستىق جىرلارىمىزدى جاڭا ءبىر قىرىنان ءساتتى جالعاستىرا ءبىلدى. ال «اپپاقنامەسى» ادال دا تازا سەزىمگە باۋليدى.
فيلولوگيا عىلىمدارىنىڭ دوكتورى, پروفەسسور سەيفيددين ءسۇتجانوۆ قاليجاننىڭ اكەسى نۇرعوجا زامانىندا ەلگە بەلگىلى اقىن اتانىپ, اتاقتى اقان سەرىمەن, اۋليە ءماشھۇر جۇسىپپەن, يسا بايزاقوۆپەن, ونەر قايراتكەرى نۇرلىبەك بايمۇراتوۆپەن ايتىسقا تۇسكەنىن اڭگىمەلەدى. نۇرعوجا ترويتسك قالاسىنداعى زەينوللا يشاننىڭ مەدرەسەسىن ۇزدىك بىتىرگەن. كەيبىر بولىستاردى شەنەپ سىن ايتقان. 1932 جىلى ساكەن سەيفۋللين اقان سەرىنىڭ ولەڭدەرىن باسىپ شىعارعاندا جيناقتا اقان سەرى مەن سۇيىندىك نۇرعوجانىڭ ايتىسى كەلتىرىلگەن.
ەرتىس-بايان وڭىرىندە تۋىپ-ءوسىپ, اق باستى الاتاۋعا قانات قاعىپ, قازاق ادەبيەتىنىڭ ايتۋلى سايىپقىرانىنا اينالعان ق.بەكحوجيننىڭ ەسىمى وتتى جىرلارى ارقىلى ەل ەسىندە ماڭگىلىككە ساقتالادى دەپ سەنەمىز. اقىننىڭ ارتىنداعى مول مۇراسى قازاق ادەبيەتىنىڭ جاۋھارلارىنا اينالىپ, جىل وتكەن سايىن جارقىراي بەرمەك.
بۇگىندە الماتى, پاۆلودار قالالارىنداعى كوشەلەر, پاۆلودار قالاسىنداعى ءبىر مەكتەپ اقىننىڭ ەسىمىمەن اتالادى.
پاۆلودار