قازىرگى كەزدە اقتوبە وبلىسىندا قىزىلشامەن ناۋقاستانعان 207 ادام اۋرۋحانالارعا جاتقىزىلدى. وبلىستىق دەنساۋلىق ساقتاۋ باسقارماسىنىڭ سوڭعى دەرەگى بويىنشا جۇقپالى دەرتتىڭ وسى تۇرىنە شالدىققانداردىڭ 36-سى – ەرەسەك ادامدار, 189-ى – نەگىزىنەن 3 جاسقا دەيىنگى سابيلەر.
وڭىردە قىزىلشانىڭ ءورشۋى قاراشانىڭ ورتاسىنان باستالدى. قىزىلشا كوبىنەسە اۋا تامشىلارى ارقىلى جۇعىپ, اسقىنعان جاعدايدا وكپەنىڭ قابىنۋىنا اكەلىپ سوقتىرادى. دارىگەرلەر اۋرۋحاناعا تۇسكەن ناۋقاستاردىڭ 87%-ى ەكپە الماعاندار دەپ مالىمدەدى.
«جانساقتاۋ بولىمىندە جاتقان ءتورت ايلىق ءسابي ءالى قىزىلشا مەن جەلشەشەككە قارسى ەكپە الىپ ۇلگەرمەگەن. كۇز ايىندا تارالۋى قاتتى كۇشەيگەن جۇقپالى دەرتتىڭ ءورشۋىن بولدىرماس ءۇشىن 6-12 ايلىق سابيلەردى قايتادان يممۋنداۋ قاجەتتىگى كۇن تارتىبىنە قويىلدى. ويتكەنى قىزىلشامەن ناۋقاستانعان بالالاردىڭ ىشىندە ءبىر جاسقا دەيىنگى سابيلەردىڭ ۇلەسى 35-40% -عا جەتىپ وتىر. وعان قوسا 2-5 جاس اراسىنداعى بارلىق ءسابي قايتادان قىزىلشا, جەلشەشەك, پاروتيتكە قارسى ەگىلمەكشى. سونداي-اق 30 جاسقا دەيىنگى ازاماتتار مەن 55 جاسقا دەيىنگى مەديتسينا قىزمەتكەرلەرى دە قىزىلشاعا قارسى ەكپە الادى. جۇقپالى دەرتكە شالدىققان ادامنىڭ دەنە قىزۋى كوبىنەسە ءۇش كۇنگە دەيىن تۇسپەيدى دە, ءتورتىنشى كۇنى ادامنىڭ موينى مەن بەتى, قولى مەن اياعىندا قىزىل بورتپەلەر پايدا بولىپ, ول بارلىق دەنەگە جايىلادى. وسى كەزەڭدە اۋا تامشىلارى ارقىلى باسقالارعا جۇعۋ قاۋپى جوعارىلايدى», دەيدى وبلىستىڭ باس ينفەكتسيونيست دارىگەرى مەيرامبەك قۇرمانعازين.
ەلىمىزدە قىزىلشانىڭ قاتتى ورشۋىنە ازاماتتارىمىزدىڭ كوروناۆيرۋستان كەيىن يممۋندىق جۇيەسىنىڭ السىرەۋى سەبەپ بولعان سياقتى. ەگەر ۇيدە ءبىر بالانىڭ مۇرنى بىتەلىپ, دەنە قىزۋى 3-4 كۇن بويى تۇسپەي قويسا, وندا سول وتباسىنىڭ بارلىق مۇشەسى 72 ساعات ىشىندە قىزىلشاعا قارسى ەكپە الۋعا ءتيىس. ويتپەگەن جاعدايدا ناۋقاسپەن بايلانىستا بولعان سول ءۇيدىڭ بارلىق ادامىنىڭ اۋىرىپ قالۋ ىقتيمالدىعى جوعارىلايدى.
قاراشانىڭ ورتاسىندا جەدەل جاردەم قىزمەتىنە دەنە قىزۋى كوتەرىلگەن 30-40 ادام حابارلاسسا, جەلتوقساننىڭ باس كۇندەرى تاۋلىگىنە 25 ادامنان شاقىرتۋ ءتۇسىپ جاتىر.
قازىرگى كەزدە اقتوبە وبلىسىنا 30 مىڭ دانا ەكپە جەتكىزىلىپ بارلىق ەمحاناعا تاراتىلدى. ناۋقاستار كوبەيگەن جاعدايدا ولاردى ەمدەۋ مەكەمەلەرىنە جاتقىزۋ ءۇشىن الدىن الا شارالار قابىلدانىپ جاتىر. ماسەلەن, وبلىستىق جۇقپالى اۋرۋلار اۋرۋحاناسىندا ەرەسەكتەرگە – 219, بالالارعا – 248, جۇكتى ايەلدەرگە 11 ورىن ازىرلەندى. سونداي-اق قالانىڭ ىرگەسىندەگى «شاعالا» شيپاجايىندا قوسىمشا 200 ورىن اشىلدى.
اقتوبە وبلىسى