بۇگىن سەناتتا «ازاماتتىق قورعاۋ جۇيەسىن جەتىلدىرۋ» تاقىرىبىنا ارنالعان پارلامەنتتىك تىڭداۋ ءوتتى. ءىس-شارا كەزىندە قاتىسۋشىلار ءتيىستى زاڭعا ەنگىزىلەتىن تۇزەتۋلەردى تالقىلاپ, ۇسىنىستارىن ءبىلدىردى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
سەنات توراعاسى ماۋلەن اشىمباەۆ ازاماتتىق قورعاۋ جۇيەسىن جەتىلدىرۋ ەلىمىز ءۇشىن ستراتەگيالىق مانگە يە ەكەنىن جانە پالاتا بۇل ماسەلەنى ەرەكشە باقىلاۋدا ۇستاپ وتىرعانىن ايتتى. سونداي-اق ول سوڭعى كەزدەرى جيىلەپ كەتكەن تابيعي جانە تەحنوگەندىك اپاتتار توتەنشە جاعدايلارعا قاتىستى زاڭنامالىق اكتىلەردى قايتا قاراۋ قاجەتتىگىن كورسەتىپ بەرگەنىن اتاپ ءوتتى.
«قوستاناي, اباي وبلىستارىندا بولعان ءىرى ورمان ورتتەرى ءورتتى سوندىرۋگە جاۋاپتى مەملەكەتتىك ورگانداردىڭ جۇمىسىنداعى تۇيتكىلدەردى جانە بۇل باعىتتا ءتيىمدى جۇيەنىڭ جوق ەكەنىن ايقىن كورسەتىپ بەردى. وسىعان بايلانىستى مەملەكەت باسشىسى قاسىم-جومارت كەمەل ۇلى توقاەۆ ازاماتتىق قورعاۋ جۇيەسىن جاڭعىرتۋ جونىندە ناقتى مىندەتتەر جۇكتەدى. سوندىقتان ءتيىستى مەملەكەتتىك ورگاندار بۇل باعىتتا اۋقىمدى جۇمىس اتقارۋعا ءتيىس», دەدى ماۋلەن اشىمباەۆ.
پالاتا سپيكەرى توتەنشە جاعدايلارعا قارسى ءىس-قيمىلدى جوسپارلاۋ جونىندەگى قىزمەتتى جەتىلدىرۋدىڭ دە ماڭىزدى ەكەنىن تىلگە تيەك ەتتى. بۇل رەتتە جاڭا تاسىلدەردى, ونىڭ ىشىندە شەت ەلدەردىڭ وزىق تاجىريبەلەرىن ەنگىزۋ جانە عىلىمي الەۋەتتى كەڭىنەن پايدالانۋ ەرەكشە مانگە يە.
سونىمەن قاتار ماۋلەن اشىمباەۆ ونەركاسىپتىك قاۋىپسىزدىك ماسەلەسىندە دە ولقىلىقتار از ەمەس ەكەنىن ايتتى. قاراعاندى وبلىسىنداعى شاحتالاردا بولعان اپاتتار سونىڭ سالدارى ەكەنى ءسوزسىز. بۇل باعىتتا الدىن الۋ جۇمىستارىنىڭ جۇزەگە اسىرىلماۋى, ءتيىستى باقىلاۋدىڭ السىرەۋى, ساپاسىز نەمەسە ۋاقتىلى جۇرگىزىلمەگەن كۇردەلى جوندەۋ, جۇيەسىز جوبالىق جانە تەحنيكالىق شەشىمدەر قايعىلى وقيعالارعا اكەپ سوقتىراتىنى نازارعا الىندى.
قازىرگى تاڭدا الەم بويىنشا سەيسميكالىق اپاتتاردىڭ جيىلەپ كەتكەنى بەلگىلى. سەنات توراعاسى ەلىمىزدىڭ گەوگرافيالىق ورنالاسۋىنا بايلانىستى بۇل ماسەلەنى دە نازاردان تىس قالدىرۋعا بولمايتىنىن اتاپ ءوتتى. الدىن الۋ جۇمىستارىن كۇشەيتىپ قانا قويماي, ۇلتتىق زاڭناماعا ءتيىستى وزگەرىستەر ەنگىزۋ جانە ۇكىمەت پەن اكىمدىكتەر اراسىنداعى ءىس-قيمىلدى كەشەندى تۇردە جۇيەلەۋدىڭ دە وزەكتى ەكەنى ايتىلدى.
«ازاماتتىق قورعاۋ سياقتى ماڭىزدى سالا ءتيىستى دەڭگەيدەگى قارجىلاندىرۋدى قاجەت ەتەتىنى بەلگىلى. بۇگىنگى تالقىلاۋ اتالعان پروبلەمالاردى ءتيىمدى شەشۋگە مۇمكىندىك بەرەدى دەپ ۇمىتتەنەمىز. الداعى ۋاقىتتا پرەزيدەنتىمىزدىڭ وسى باعىتتاعى تاپسىرمالارىن ىسكە اسىرۋ ءۇشىن ءبارىمىز بىرگە ناتيجەلى جۇمىس ىستەيمىز دەپ سەنەمىن», دەدى ماۋلەن اشىمباەۆ.
سونداي-اق پالاتا سپيكەرى پارلامەنتتىك تىڭداۋدىڭ قورىتىندىسى بويىنشا ۇسىنىمدار ازىرلەنىپ, ۇكىمەتكە جولداناتىنىن جانە سەنات ولاردىڭ ورىندالۋىن باقىلاۋدا ۇستايتىنىن ايتتى.
تىڭداۋ بارىسىندا حالىقتى, وبەكتىلەردى, سونداي-اق, قورشاعان ورتانى توتەنشە جاعدايلاردان قورعاۋ جۇيەسىنىڭ تيىمدىلىگىن ارتتىرۋعا جانە جەتىلدىرۋگە ارنالعان بىرقاتار ۇسىنىم ايتىلدى. سەناتورلار بولىمشەلەردى ارنايى تەحنيكامەن جانە جابدىقتارمەن جاراقتاندىرۋمەن قاتار, توتەنشە جاعدايلار مينيسترلىگىن اكىمدىكتەرمەن جانە قوعامدىق ۇيىمدارمەن بىرلەسىپ, حالىقتىڭ الەۋمەتتىك وسال توپتارىنىڭ, جەتىم بالالاردىڭ, كوپ بالالى وتباسىلاردان شىققان بالالاردىڭ, مۇگەدەك ادامداردىڭ تۇرعىن ۇيلەردى تيىسىنشە پايدالانۋىن قاداعالاۋ ماسەلەلەرىن پىسىقتاۋعا شاقىردى. اتاپ ايتقاندا, جىلىتۋ جانە ەلەكترمەن جابدىقتاۋ جۇيەلەرىن جوندەۋ, سونداي-اق, جەكە تۇرعىن ۇيلەردە ءورت دەتەكتورلارىن, كومىرتەگى توتىعى مەن تابيعي گاز داتچيكتەرىن ورناتۋ قاجەتتىلىگى تۋرالى ءسوز بولدى.
پارلامەنتتىك تىڭداۋ كەزىندە توتەنشە جاعدايلار ءمينيسترى سىرىم ءشارىپحانوۆ, ەكولوگيا جانە تابيعي رەسۋرستار ءمينيسترى ەرلان نىسانباەۆ, باتىس قازاقستان وبلىسىنىڭ اكىمى ناريمان تورەعاليەۆ, توتەنشە جاعدايلار جانە تابيعي اپاتتار قاۋپىن ازايتۋ ورتالىعىنىڭ ديرەكتورى سەرىك اۋباكىروۆ جانە تاعى باسقا ازاماتتار ءسوز سويلەدى.