پرەمەر-مينيستر ءاليحان سمايىلوۆ ورتالىق مەملەكەتتىك ورگاندار باسشىلارى جانە ديپلوماتيالىق كورپۋس پەن جەكە بيزنەس وكىلدەرىنىڭ قاتىسۋىمەن ينۆەستيتسيالىق احۋالدى جاقسارتۋ جونىندەگى كەڭەستىڭ كەزەكتى وتىرىسىن وتكىزدى. كەڭەستە نەگىزىنەن سالىق ساياساتى سالاسىندا جۇرگىزىلىپ جاتقان رەفورمالار, ينۆەستيتسيالىق ىنتىماقتاستىق, زياتكەرلىك مەنشىك قۇقىقتارىن قورعاۋ, اۋىل شارۋاشىلىعى تاۋارىن وندىرۋشىلەردى سۋبسيديالاۋ جانە ت. ب. ماسەلەلەرگە نازار اۋدارىلدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
پرەمەر-مينيستر ينۆەستيتسيالار تارتۋ – ەكونوميكالىق ءوسۋدىڭ نەگىزگى فاكتورلارىنىڭ جانە ۇكىمەت جۇمىسىنىڭ باسىمدىقتارىنىڭ ءبىرى بولىپ قالا بەرەتىنىن اتاپ ءوتتى.
اتاپ ايتقاندا, ەلىمىزدە جەكە شارتتاردا كەلىسىمدەر جاساۋعا مۇمكىندىك بەرەتىن ينۆەستيتسيالىق شارتتاردىڭ جاڭا تەتىكتەرى ەنگىزىلدى. بۇدان بولەك, ينۆەستيتسيالىق مىندەتتەمەلەر تۋرالى كەلىسىمدى جاساسقاندا سالىق زاڭناماسىنىڭ تۇراقتىلىعىنا 10 جىلعا كەپىلدىك بەرىلەدى جانە كۇردەلى جوبالار ءۇشىن جەتىلدىرىلگەن مودەلدىك كەلىسىمشارتتى جاساسقاندا فيسكالدىق ىنتالاندىرۋلار ەنگىزىلەدى.
«رەزيدەنت ەمەس تۇلعالاردان الىنعان ماتەريالدىق ەمەس قىزمەتتەر ءۇشىن شەگەرىم سوماسىن شەكتەۋگە قاتىستى ينۆەستورلار ءجيى كوتەرەتىن ماسەلە شەشىلدى. ەندى بۇل شەكتەۋ تەك وففشورلىق يۋريسديكتسيالارداعى كومپانيالارمەن جۇرگىزىلگەن وپەراتسيالارعا قاتىستى بولادى», دەدى ءاليحان سمايىلوۆ.
ۇكىمەت باسشىسى ينۆەستيتسيالىق تارتىمدىلىقتى ارتتىرۋدىڭ ماڭىزدى اسپەكتىلەرىنىڭ ءبىرى بولجامدى جانە اشىق سالىق ساياساتى ەكەنىن اتاپ ءوتتى. وسىعان بايلانىستى قازاقستاندا فيسكالدىق رەتتەۋدى جەتىلدىرۋ ءۇشىن جاڭا سالىق كودەكسى ازىرلەندى.
قازىرگى ۋاقىتتا ول بيزنەس-قوعامداستىق جانە حالىقارالىق ۇيىمدار وكىلدەرىمەن ءارتۇرلى الاڭداردا قىزۋ تالقىلانىپ جاتىر. جىل باسىنان بەرى 250-دەن استام جۇمىس كەزدەسۋى وتكىزىلىپ, مىڭنان استام ۇسىنىس تۇسكەن. بارلىق ماسەلە اپتا سايىن تۇراقتى جۇمىس توبىنىڭ قاراۋىنا ۇسىنىلادى.
«قولدانىستاعى ىنتالاندىرۋلاردى ساقتاي وتىرىپ, جاڭا سالىق كودەكسى شەڭبەرىندە سالىق تولەۋشىگە باعىتتالعان سەرۆيستىك اكىمشىلەندىرۋ مودەلى ەنگىزىلەدى. سالىق ەسەپتىلىگى 30%-عا, ال سالىق تولەمدەرىنىڭ سانى 20%-عا قىسقارادى», دەدى ۇكىمەت باسشىسى.
ول بولشەك سالىق رەجيمىن قولدانۋ بويىنشا قىزمەت تۇرلەرى ەكى ەسەگە كەڭەيتىلىپ, 1 ملن-نان استام سالىق تولەۋشىنى قامتيتىنىن ايتتى. بۇدان بولەك, وڭدەۋ ونەركاسىبىندەگى جاڭا جوبالار 3 جىلعا سالىقتان بوساتىلادى.
سونداي-اق قابىلدانعان شارالار ناتيجەسىندە قازاقستان IMD الەمدىك باسەكەگە قابىلەتتىلىك رەيتينگىندە ءبىر جىل ىشىندە 6 ساتىعا كوتەرىلىپ, 37-ورىنعا تابان تىرەگەنى اتاپ ءوتىلدى.
تالقىلاۋ قورىتىندىسى بويىنشا ۇكىمەت باسشىسى قۇزىرلى مەملەكەتتىك ورگاندارعا ايتىلعان بارلىق ۇسىنىستاردى پىسىقتاۋدى تاپسىردى.