مەملەكەت باسشىسى قاسىم-جومارت توقاەۆ قازاق ءتىلىن قولداۋ ماقساتىندا قۇرىلعان «Qazaq tili» Endowment Qory-نا العاشقى جارنانى اۋداردى. پرەزيدەنتتىڭ ءوز قاراجاتىنان قوسقان جەكە جارنا كولەمى – 7 ميلليون تەڭگە. مەملەكەت باسشىسىنىڭ جاڭادان قۇرىلعان قوردىڭ قىزمەتىن قولداۋعا جەكە قاتىسۋى ەل باسشىلىعىنىڭ مەملەكەتتىك ءتىلدىڭ مارتەبەسىن دامىتۋ جانە نىعايتۋ ماسەلەسىنە ەرەكشە كوزقاراسىن كورسەتەدى. بۇل – وتە جاقسى ءۇردىس جانە باسقا ۇكىمەت وكىلدەرى ءۇشىن ۇلگى.
«Qazaq tili» – حالىقارالىق «قازاق ءتىلى» قوعامدىق ۇيىمىنىڭ باستاماسىمەن قۇرىلعان قور. نەگىزگى مىندەتى – مەملەكەتتىك ءتىلدى قولداۋ جانە دامىتۋمەن اينالىساتىن ەلىمىزدەگى ەڭ ءىرى ۇيىم «قازاق ءتىلى» قوعامىنىڭ تۇراقتى ءارى ۇزاقمەرزىمدى دامۋىن قامتاماسىز ەتۋ.
بيىل 12 قازاندا قاسىم-جومارت توقاەۆ «قازاق ءتىلى» قوعامىنىڭ باسشىسىمەن كەزدەسۋىندە مەملەكەتتىك ءتىلدى دامىتۋ ماقساتىمەن ارنايى ەنداۋمەنت قورىن قۇرۋ باستاماسىنا قولداۋ بىلدىرگەن بولاتىن.
ەنداۋمەنت – كوممەرتسيالىق ەمەس ماقساتتاردا, نەگىزىنەن ءبىلىم, مەديتسينا, مادەنيەت, عىلىم سالاسىندا جۇمىس ىستەيتىن ۇيىمداردى قارجىلاندىرۋعا ارنالعان ماقساتتى كاپيتال.
مۇنداي قوردىڭ ەرەكشەلىگى – قورعا اۋدارىلعان قاراجاتتىڭ ءوزى يگەرىلمەيدى: قولدا بار قاراجات باعالى قاعازدار مەن اكتيۆتەردى ساتىپ الۋعا, ال ينۆەستيتسيالىق كىرىس ماقساتتى جوبالاردى قولداۋعا, بەنەفيتسيار ۇيىمنىڭ جارعىلىق مىندەتتەرىن ورىنداۋعا جۇمسالادى. ەنداۋمەنت قورلارى الەمدە الەۋمەتتىك ماڭىزدى ميسسيالاردى جۇزەگە اسىرۋ ءۇشىن جۇمىس ىستەيتىن ءبىلىم بەرۋ جانە قوعامدىق ۇيىمداردىڭ تۇراقتى جانە ۇزاقمەرزىمدى قىزمەتىن قامتاماسىز ەتۋ ءۇشىن كەڭىنەن قولدانىلادى.
الەم ەلدەرىندە ءبىلىم بەرۋ مەن الەۋمەتتىك باعىتتا جۇمىس ىستەيتىن قوعامدىق ۇيىمداردىڭ تۇراقتى ءارى ۇزاقمەرزىمدى قىزمەتىن قامتاماسىز ەتۋ ءۇشىن ەنداۋمەنت قورىن قۇرۋ تاجىريبەسى كەڭ تارالعان. قازىرگى تاڭدا جاپونياداعى عىلىم مەن تەحنولوگيا قورى, سونىمەن قاتار ستەنفورد, گارۆارد ۋنيۆەرسيتەتتەرىنىڭ قورلارى دۇنيە جۇزىندەگى ەڭ ءىرى ەنداۋمەنت قورلارىنىڭ قاتارىنا كىرەدى. ەلىمىزدە ءىرى ۋنيۆەرسيتەتتەر, مەكتەپتەر مەن كوممەرتسيالىق ەمەس ۇيىمداردىڭ ەنداۋمەنت قورلارى ءساتتى جۇمىس ىستەپ جاتىر.
«Qazaq tili» قورىنا جينالعان قاراجاتتى بەدەلدى قوعام قايراتكەرلەرى, لينگۆيست عالىمدار مەن مەملەكەت وكىلدەرىنەن قۇرالعان تاۋەلسىز قامقورشىلار كەڭەسى باقىلاپ, قاداعالايدى.
پرەزيدەنت «قازاق ءتىلى» قوعامىنا مەملەكەتتىك تىلدەگى مەديا جانە باسپا كونتەنتىن كوبەيتۋ ءۇشىن ناقتى جوبالار مەن شارالار كەشەنىن جۇزەگە اسىرۋ, ءتىلدى وقىتۋ مەن ۇيرەتۋ ادىستەمەسىن جەتىلدىرۋ, وقۋ ساۋاتتىلىعى مەن جازۋ مادەنيەتىن دامىتۋ, سونىمەن قاتار قازاق ءتىلىن قولداۋ مەن ءتىلدى قولداناتىن قاۋىمداستىق اياسىن كەڭەيتۋ ءۇشىن زاماناۋي تەحنولوگيالىق شەشىمدەردى كەڭىنەن پايدالانۋدى تاپسىردى. قوردىڭ رەسۋرستارى ءدال وسى ماسەلەلەردى پىسىقتاۋعا باعىتتالاتىن بولادى.
جارقىن جاڭالىقتى ءتىل جاناشىرلارى, قازاق قاۋىمىمەن ءبىرىنشى بولىپ بولىسكەن حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحان ۇلى مەملەكەتتىك ءتىلدىڭ جاناشىرلارى اتىنان مەملەكەت باسشىسىنا باستاماعا بىلدىرگەن قولداۋى مەن وزگەلەرگە كورسەتكەن ۇلگىسى ءۇشىن العىس ايتا كەلىپ: «ەنداۋمەنت قورىنىڭ كىرىستەرى «قازاق ءتىلى» حالىقارالىق قوعامىنىڭ جۇمىسىن قامتاماسىز ەتۋ جانە مەملەكەتتىك ءتىلدى قولدانۋ اياسىن كەڭەيتۋگە, جاڭعىرتۋعا جانە ودان ءارى دامىتۋعا باعىتتالعان جوبالاردى ىسكە اسىرۋ ءۇشىن گرانتتار تۇرىندە بەرىلىپ وتىرادى», دەدى.
ايتا كەتەلىك, مەملەكەتتىك ءتىلدىڭ دامۋى مەن نىعايۋى ماسەلەسى مەملەكەت باسشىسىنىڭ قاشاندا نازارىندا, باقىلاۋىندا. پرەزيدەنت بالاباقشالاردا, مەكتەپتەردە مەملەكەتتىك ءتىلدىڭ مارتەبەسىن كوتەرۋدى نازاردا ۇستاۋ قاجەت ەكەنىن ايتا كەلىپ: «قازاقتىڭ ءتىلى – قازاقتىڭ جانى. حالقىمىزدىڭ تاريحى دا, تاعدىرى دا تىلىندە. مادەنيەتى مەن ادەبيەتى دە, ءدىلى مەن ءدىنى دە تىلىندە. قازاق ءتىلى – ەڭ تازا ءارى باي ءتىلدىڭ ءبىرى. ءتىل وتكەن تاريحپەن عانا ەمەس, بۇگىن مەن بولاشاقتى بايلانىستىراتىن قۇرال. مەنىڭشە, ءتىلدىڭ تۇعىرى دا, تاعدىرى دا بەسىكتەن, وتباسىنان باستالادى. وتباسىندا انا تىلىندە سويلەپ وسكەن ءبۇلدىرشىننىڭ تىلگە دەگەن ىقىلاسى تەرەڭ, قۇرمەتى بيىك بولادى. ءبىز مەملەكەتتىك ءتىلدىڭ مارتەبەسىن كوتەرۋ باعىتىنداعى جۇمىستاردى ۇزدىكسىز جالعاستىرا بەرەمىز», دەگەن ەدى.
سايىپ كەلگەندە, ءتىل – حالىقتىڭ جان دۇنيەسى, رۋحاني نەگىزى, ەلدىڭ ەركىندىگى مەن ۇلتتى تانىتاتىن باستى بەلگىسى. ونىڭ نەگىزگى قىزمەتى – ۇلتتى, حالىقتى بىرىكتىرۋ. مەملەكەتتىك ءتىلدى ءبىلۋ – ءومىر تالابى, زامان سۇرانىسى, قوعام قاجەتتىلىگى. ءتىلدى ءومىردىڭ بارلىق سالاسىندا قولدانىپ, اياسىن كەڭەيتۋ جولىندا تەك «قازاق ءتىلى» قوعامى ەمەس, ءاربىر وتانداسىمىز ءوز ازاماتتىق بورىشىن ادال اتقارۋعا ءتيىس. وعان جاڭادان قۇرىلعان «Qazaq tili» Endowment Qory ەسەلەپ ەكپىن بەرەدى دەپ سەنەمىز.