كەشە شىمكەنت قالاسىنىڭ اكىمى عابيت سىزدىقبەكوۆ ورتالىق كوممۋنيكاتسيالار قىزمەتىندە قالانىڭ الەۋمەتتىك-ەكونوميكالىق دامۋى جونىندە ءباسپاسوز كونفەرەنتسياسىن وتكىزدى. ول شاھاردى دامىتۋداعى نەگىزگى جۇمىستار مەن الداعى جوسپارلارى تۋرالى بايانداپ, جۋرناليستەردى قىزىقتىرعان سۇراقتارعا جاۋاپ بەردى.
شىمكەنتتە بيىلعى 10 ايدا تارتىلعان ينۆەستيتسيا – 22, پايدالانۋعا بەرىلگەن تۇرعىن ءۇي الاڭى – 15, بولشەك ساۋدا كولەمى – 19, كولىك قىزمەتى – 21, ونەركاسىپ ءوندىرىسىنىڭ كولەمى 1,7 پايىزعا ارتقان. جىل قورىتىندىسى بويىنشا ەكونوميكانىڭ ءوسۋ قارقىنىن 4,2 پايىزعا جەتكىزۋ جوسپارلانىپ وتىر. «شىمكەنتتىڭ ەڭ باستى بايلىعى – حالقى, ونىڭ قوناقجاي كەڭ پەيىلى مەن ەڭبەكقورلىعى. سونىڭ ارقاسىندا قالامىز وركەندەپ, دامىپ وتىر. مەملەكەت باسشىسى قاسىم-جومارت كەمەل ۇلى ءوڭىردىڭ الەۋمەتتىك-ەكونوميكالىق جاعدايىن جاقسارتىپ, قالا تۇرعىندارىنا قولايلى ورتا قالىپتاستىرۋدى تاپسىردى. ەندى تاپسىرمانىڭ ورىندالۋ بارىسى تۋرالى باياندايىن. قالاعا ينۆەستيتسيا تارتىپ, حالىقتى تۇراقتى جۇمىس ورىندارىمەن قامتۋ – نەگىزگى مىندەتتەردىڭ ءبىرى. قازىرگى تاڭدا شاھاردا 5 وندىرىستىك ايماق بار. وندا جالپى سوماسى 216 ملرد تەڭگەنى قۇرايتىن 273 ينۆەستيتسيالىق جوبا ىسكە اسىرىلىپ, 8 مىڭنان اسا جاڭا جۇمىس ورىندارى اشىلعان. يندۋستريالىق ايماقتار ءوزىنىڭ ەكونوميكالىق تيىمدىلىگىن كورسەتىپ وتىر. قازىناعا تۇسكەن سالىقتىق تۇسىمدەر 59 ملرد تەڭگەنى قۇرادى. وڭىرگە تارتىلعان ينۆەستيتسيا بارلىق سالالارعا وڭ اسەرىن تيگىزۋدە. قازىر يندۋستريالىق ايماقتاردى ءتيىمدى پايدالانۋ ماقساتىندا رەۆيزيا جۇرگىزىپ جاتىرمىز», دەدى قالا اكىمى.
ونىڭ ايتۋىنا قاراعاندا, باستى ماقسات يندۋستريالىق ايماقتاردى جانداندىرىپ, ءونىم كولەمىن ارتتىرۋ. قازىردىڭ وزىندە يگەرىلمەي جاتقان 52 گەكتاردى قۇرايتىن جەر تەلىمى انىقتالىپتى. بۇل جەرلەرگە جاڭا ينۆەستورلار تارتىلاتىن بولادى. ءوندىرىس الاڭدارىن ارتتىرۋ ماقساتىندا جاڭادان كولەمى 867 گەكتار قۇرايتىن 5 ءوندىرىس ايماعىن قۇرۋ قولعا الىنادى ەكەن. «الداعى ۋاقىتتا 372 ملرد تەڭگەنى قۇرايتىن 289 جوبانى ىسكە اسىرىپ, 12 مىڭعا جۋىق جۇمىس ورنىن اشۋدى جوسپارلاپ وتىرمىز. «جۇلدىز», «بوزارىق» يندۋستريالىق ايماقتارىنا ينجەنەرلىك جۇيەلەر تارتىلىپ, كەلەر جىلى قولدانىسقا بەرىلەتىن بولادى. ودان بولەك, ساۋدا-لوگيستيكالىق ورتالىقتى كەڭەيتۋ ارقىلى «وڭىرلىك حاب» قۇرۋ جۇمىستارى باستالدى. قازىر جوبالاۋ-سمەتالىق قۇجاتتاماسى ازىرلەنىپ جاتىر. اتالعان يندۋستريالىق ايماقتاردى ىسكە قوسۋ ارقىلى, سالىقتىق تۇسىمدەردى ارتتىرۋ كوزدەلگەن. وڭدەۋ ونەركاسىبىندە دە وڭ ديناميكا بار. بيىل 14 جوبانى ىسكە اسىرۋ جوسپارلانعان. ەسەپتى كەزەڭدە جالپى سوماسى 11 ملرد تەڭگەنى قۇرايتىن 6 جوبا ىسكە قوسىلىپ, 373 جۇمىس ورنى اشىلدى. شىمقالا ەكونوميكاسىنىڭ ءوسۋ درايۆەرى ينۆەستيتسيالىق تارتىمدىلىعى ەكەنى ءسوزسىز. سوڭعى 4 جىلدا 1,5 ترلن تەڭگە قاراجات تارتىلىپ, كولەمى 3 ەسەگە ارتتى. الداعى 5 جىلدا 6 ترلن تەڭگە ينۆەستيتسيا تارتۋدى كوزدەپ وتىرمىز. بۇل باعىتتا ناقتى جوسپارىمىز بار», دەدى ع.سىزدىقبەكوۆ.
قازىردىڭ وزىندە جالپى سوماسى 1,7 ترلن تەڭگەنى قۇرايتىن 229 ينۆەستيتسيالىق جوبانىڭ پۋلى جاساقتالعان. باسىم باعىتتارى وڭدەۋ ونەركاسىبى سالاسىندا – 405,8 ملرد تەڭگە, تۇرعىن ۇيگە – 594,4 ملرد تەڭگە, دەنساۋلىق ساقتاۋعا – 128 ملرد تەڭگە, اۋىل شارۋاشىلىعىنا 363,9 ملرد تەڭگە جوسپارلانىپتى. «ناتيجەسىندە, 34 مىڭنان اسا جاڭا جۇمىس ورنى اشىلاتىن بولادى. باستى ماقسات – ينۆەستورلارعا قولايلى جاعداي جاساپ, ەكونوميكانى ءارتاراپتاندىرۋ. بۇل باعىتتا يمپورت الماستىرۋشى جانە ەكسپورتقا باعىتتالعان جوبالاردى جۇزەگە اسىراتىن ينۆەستورلارمەن تىعىز جۇمىس ءجۇرىپ جاتىر. بۇلارمەن بىرگە شاعىن جانە ورتا بيزنەستىڭ وركەندەۋىنە ەرەكشە دەن قويىپ كەلەمىز. قازىر شىمكەنتتە بيزنەستىڭ جالپى وڭىرلىك ونىمدەگى ۇلەسى 50 پايىزعا جەتتى. كاسىپكەرلىكتى قولداۋ شارالارىنا سۇرانىس وتە جوعارى. بيىل كاسىپكەرلىكتى دامىتۋ جونىندەگى ۇلتتىق جوبا اياسىندا 20 ملرد تەڭگە ءبولىنىپ, ەسەپتى كەزەڭدە 16 ملرد تەڭگەگە 3 351 جوباعا قولداۋ كورسەتىلدى. سوڭعى 5 جىلدا بەلسەندى جۇمىس ىستەيتىن كاسىپكەرلەر 2 ەسەگە ءوسىپ, سانى 131 مىڭنان استى. بۇل ازاماتتاردىڭ ىسكەرلىك مادەنيەتىن كوتەرۋگە ىنتالاندىرسا, ەكىنشىدەن, قالا تۇرعىندارىنىڭ 30 پايىزدان استامىن جۇمىسپەن قامتىپ وتىر», دەدى ول.
جەرگىلىكتى دەڭگەيدە بيىلعى جىلى ەڭبەكاقىسى تومەن 16 مىڭنان استام بيۋدجەتتىك قىزمەتشىلەرگە ۇستەماقى قارالىپ, جالاقىسى 100 مىڭ تەڭگەدەن اسىپتى. «وڭىردەگى ورتاشا جالاقى كولەمى 17 پايىزعا ءوسىپ, 270 355 تەڭگەنى قۇرادى. بيىل حالىقتى جۇمىسپەن قامتۋ شارالارىمەن 61 مىڭنان استام ادام قامتىلدى. 36 مىڭعا جۋىق ازامات تۇراقتى جۇمىسقا ورنالاستى. حالىق تابىسىنىڭ ارتۋىنا بايلانىستى, وتكەن جىلمەن سالىستىرعاندا الەۋمەتتىك كومەك الۋشىلار سانى 22,4 پايىزعا ازايدى. ال ءبىلىم بەرۋ سالاسى – باسىم باعىتتارىمىزدىڭ ءبىرى. سوڭعى 4 جىلدا 66 مىڭ ورىندىق 101 مەكتەپ پايدالانۋعا بەرىلدى. ونىڭ 80 پايىزى جەكە ينۆەستورلار ەسەبىنەن سالىنعان. ناتيجەسىندە 3 اۋىسىمدى مەكتەپتەر ماسەلەسى تولىعىمەن شەشىلدى.
قالاداعى 134 مىڭنان استام باستاۋىش سىنىپ وقۋشىسى تەگىن ىستىق تاماقپەن قامتاماسىز ەتىلدى», دەدى شاھار باسشىسى.
ەڭبەك نارىعىنا تالداۋ جۇرگىزىلىپ, قاجەتتى مامان دايىنداۋ ءۇشىن كوللەدجدەرگە جاڭا 11 250 گرانت ءبولىنىپتى. بيىل 500 ورىندىق وقۋشىلار سارايى پايدالانۋعا بەرىلگەن. «جايلى مەكتەپ» اياسىندا 28 مىڭ وقۋشىعا ارنالعان 18 مەكتەپ سالۋ جوسپارلانعان. بۇگىنگى تاڭدا 12 مەكتەپتىڭ قۇرىلىسى باستالدى. قازىر «تۇران» شاعىن اۋدانىندا دا 500 ورىندىق وقۋشىلار سارايى سالىنىپ جاتىر. «مادەنيەت سالاسىندا حالىقارالىق دەڭگەيدە ءىس-شارالار وتكىزەتىن زاماناۋي كونگرەسس حوللدىڭ قۇرىلىسى اياقتالۋعا تاياۋ. كەلەر جىلى قالادان شالعاي ورنالاسقان 4 ەلدى مەكەندە جاڭا مادەنيەت ۇيلەرىن سالاتىن بولامىز. مەملەكەت باسشىسىنىڭ تاپسىرماسىمەن «وپەرا جانە بالەت» تەاترىنىڭ جاڭا عيماراتىن سالۋ قاراستىرىلۋدا. اتالعان ۇيىمعا اتى الەمگە ايگىلى وپەرا ءانشىسى مايرا مۇحامەدقىزى باسشىلىق جاساپ وتىر. بۇل سالانىڭ دامۋىنا تىڭ سەرپىن بەرەدى دەگەن ويدامىز. قازىر قالاداعى بۇقارالىق سپورتپەن شۇعىلدانۋشىلار سانى 42 پايىزعا جەتتى. سپورت ينفراقۇرىلىمىن دامىتۋ ماقساتىندا «ۇستەل تەننيسى سپورت كەشەنى» جانە «جاڭا يپپودروم» پايدالانۋعا بەرىلدى. «مەتاللۋرگ» ستاديونى قايتا قۇرىلىپ, 1 سپورت مەكتەبى ىسكە قوسىلدى. بيىل قالا سپورتشىلارى قازاقستان, ازيا جانە الەم چەمپيوناتتارىنا قاتىسىپ, جالپى 728 التىن, 593 كۇمىس, 654 قولا مەدال جەڭىپ الدى. سونداي-اق «ورداباسى» فۋتبول كلۋبى ءوز تاريحىندا تۇڭعىش رەت قازاقستان چەمپيونى اتاندى. ەندىگى كەزەكتە ەۋروپانىڭ چەمپيوندار ليگاسىندا ويىن كورسەتەتىن بولادى», دەدى ع.سىزدىقبەكوۆ.
اكىمنىڭ ايتۋىنشا, دەنساۋلىق ساقتاۋ سالاسىنداعى باستى ماقسات – تۇرعىندارعا ساپالى قىزمەت كورسەتۋ مەن قولجەتىمدىلىكتى ارتتىرۋ. سالاداعى جان باسىنا قارجىلاندىرۋ جۇيەسى وڭ ناتيجە بەرىپتى. سوڭعى جىلدارى جەكەمەنشىك ەمحانالار اشىلىپ, مەملەكەتتىك ۇيىمداردىڭ جۇكتەمەسى تومەندەگەن. «جەكە ينۆەستور ەسەبىنەن قاتەرلى ىسىك اۋرۋىنىڭ باستاپقى ساتىسىن انىقتايتىن, ساۋلەلى تەراپيا ورتالىعى اشىلدى. بيىل ورتالىقتا 553 ادامعا قىزمەت كورسەتىلدى. ناتيجەسىندە ءولىم-ءجىتىم ازايدى. جىل سوڭىنا دەيىن العاش رەت بالالار كارديوحيرۋرگيا بولىمشەسىن اشۋدى كوزدەپ وتىرمىز. تاعى 6 جەكە مەديتسينا ورتالىعىن, 200 ورىندىق جاڭا زاماناۋي پەرزەنتحانا, 800 ورىندىق ۋنيۆەرسيتەتتىك كلينيكا سالۋ جوسپارىمىزدا بار.
حالىق سانىنىڭ قارقىندى وسۋىنە بايلانىستى باسپاناعا دەگەن قاجەتتىلىك ارتۋدا. قالادا 51 مىڭنان استام حالىق الەۋمەتتىك, 175 مىڭعا جۋىق ازامات كرەديتتىك تۇرعىن ءۇي كەزەگىندە تۇر. وسى ماسەلەنى شەشۋ ءۇشىن 4 مىڭ پاتەرلى 100 الەۋمەتتىك تۇرعىن ءۇيدىڭ قۇرىلىسى جۇرگىزىلىپ جاتىر. جۇمىسشى جاستارعا جانە حالىقتىڭ الەۋمەتتىك وسال توپتارىنا 1 مىڭنان استام پاتەر بەرەمىز. 201 ازاماتقا قايتارىمسىز نەگىزدە تۇرعىن ءۇي سەرتيفيكاتتارى تابىستالدى. الەۋمەتتىك تۇرعىن ءۇي الۋشىلار ساناتىنا ەنبەيتىن ازاماتتار دا نازاردان تىس قالمايدى. جەرگىلىكتى «قامقور» تۇرعىن ءۇي باعدارلاماسى اياسىندا 150 وتباسىعا جەڭىلدەتىلگەن نەسيەلەر بەرىلدى. بۇل باعدارلاما ءوز جالعاسىن تاباتىن بولادى. جىل سوڭىنا دەيىن 1 ملن 75 مىڭ شارشى مەتر تۇرعىن ءۇي پايدالانۋعا بەرىلەدى», دەدى قالا اكىمى.
بيىل قالادا ءبىرتالاي ەلدى مەكەندەردە اۋىز سۋ, ەلەكتر جۇيەسى, تابيعي گاز بەن كارىز جۇيەلەرىنىڭ قۇرىلىسى اياقتالىپتى. ناتيجەسىندە, تۇرعىندارى 65% كارىز جۇيەسىمەن, 96% تابيعي گازبەن, 99% اۋىز سۋمەن, سونداي-اق 100% ەلەكتر جۇيەسىمەن قامتىلاتىن بولادى. «بيىل 210 شاقىرىم جول پايدالانۋعا بەرىلدى. قازىر تاشكەنت-الماتى-تۇركىستان باعىتتارىن قالا ورتالىعىمەن بايلانىستىراتىن قوناەۆ داڭعىلىنىڭ جالعاسى, ا-2 اۆتوموبيل جولىن قايتا قۇرۋ, وڭتۇستىك جانە شىعىس اينالما جولدارىنىڭ قۇرىلىستارى جۇرگىزىلىپ جاتىر. قوعامدىق قاۋىپسىزدىكتى قامتاماسىز ەتۋ ماقساتىندا كەلەسى جىلى قوسىمشا 3 000 بەينەباقىلاۋ كامەراسى ورناتىلادى. «حالىق قاتىساتىن بيۋدجەت» جوباسى اياسىندا بيىل 5,8 ملرد تەڭگەگە 194 جوبا جۇزەگە اسىرىلسا, كەلەر جىلى قارجىلاندىرۋ كولەمى 10 ملرد تەڭگەگە جەتكىزىلەتىن بولادى», دەدى ع.سىزدىقبەكوۆ.