ءماشھۇر ءجۇسىپ اتىنداعى ورتا مەكتەپتىڭ پەداگوگى دانا سەرىمباەۆانى بىلايعى جۇرت ەرىكتى رەتىندە جاقسى تانيدى. ەرىكتىلەر قوزعالىسىنىڭ كوشباسشىسى ءوز مەكتەبىندە «اشىق جۇرەك» جاساعىن قۇرىپ, وقۋشىلار مەن ۇستازداردى يگى ىسكە ۇنەمى جۇمىلدىرىپ جۇرگەنى.
دانا تولەۋبايقىزىنىڭ نەگىزگى ماماندىعى – اعىلشىن ءتىلىنىڭ مۇعالىمى. كەيىنگى 16 جىلدان بەرى قازاقستانداعى قىزىل جارتى اي قوزعالىسىنىڭ بەلسەندى مۇشەسى. كوروناۆيرۋس پاندەمياسى مەن ەكىباستۇزدىڭ جىلۋ جۇيەسىندەگى اپات ۋاقىتىندا تىنباي جۇمىس ىستەپ, قوعامعا زور ەڭبەگىن ءسىڭىردى. پاندەميا كەزىندە ول ءوزى سياقتى ەرىكتىلەرمەن بىرگە قازاقستاننىڭ بىرنەشە ءوڭىرىن ارالاپ, كارانتيننىڭ كەسىرىنەن ۇيلەرىنەن شىعا الماي قالعان وتباسىلارعا ءدارى-دارمەك پەن ازىق-ت ۇلىك, مۇمكىندىگى شەكتەۋلى جاندارعا قاجەتتى قۇرال-جابدىقتارىن جەتكىزدى.
– قىزىق بولعاندا, پاۆلودار قالاسىنا سول ۋاقىتتا يتاليادان ەرلى-زايىپتى تۋريستەر كەلگەن ەكەن. بۇل ۋاقىتتا اتالعان مەملەكەتتىڭ وزىندە قاۋىپتى ىندەت قاتتى تاراپ جاتقان. الگى ادامدار ءبىزدىڭ شاھاردا ۇزاق ايالداپ, مەن ولارعا ءبىراز ۋاقىت ازىق-ت ۇلىگىن جەتكىزىپ تۇردىم. ەرلى-زايىپتىلار وزدەرىنىڭ جۇپتاسقاندارىنا 50 جىل تولۋىن كارانتين ۋاقىتىندا كەرەكۋدە اتاپ ءوتتى. ودان سوڭ جەڭىس مەرەكەسىندە تىل ەڭبەككەرلەرىنىڭ ۇيلەرىنە مەملەكەتتىك ناگرادالارىن اپارىپ تاپسىردىق. قاۋىپتى ۆيرۋستىڭ الدىن الۋ تاقىرىبىندا ۇنەمى ساباقتار وتكىزىپ, ۇلكەن-كىشىنىڭ اراسىندا دارىستەر وقىدىق, – دەپ ەسكە الادى سول ءبىر قاۋىرت كۇندەردى دانا اپاي.
ونىڭ بۇل ەڭبەگى ەسكەرىلىپ, «حالىق العىسى» مەدالىمەن, ەرىكتىلەرگە بەرىلەتىن حالىقارالىق سىيلىقپەن ماراپاتتالدى. د.سەرىمباەۆانىڭ ودان سوڭعى ۆولونتەرلىك قىزمەتى بىلتىر ەكىباستۇزدا توتەنشە جاعداي رەجىمى جاريالانعاندا جارقىراي كورىندى. كوپتى جۇمىلدىرىپ, پاتەرلەرىندە ءبۇرىسىپ وتىرعان حالىققا جىلى كيىمدەر, جىلىتقىشتار مەن ازىق-ت ۇلىك تاراتتى. جۇرتشىلىقتىڭ بويىن جىلى سوزدەرىمەن جىلىتتى.
دانا اپايدىڭ ايتۋىنشا, ونى وتباسىنداعىلار ۇنەمى قولداپ جۇرەدى. كىشى جانە ورتانشى قىزدارى اناسىنىڭ جولىن قۋىپ, ەرىكتىلەر قوزعالىسىنىڭ بەلسەندى مۇشەسى اتانعان. ال ۇلكەن قىزى قوزعالىسقا قارجىلاي كومەك جاساپ تۇرادى. اپايدىڭ جولداسى جەكە كولىگىمەن ەرىكتىلەردى تاسىپ, بار قولعابىسىن جاساۋعا تىرىسادى. ونىڭ ۇستىنە پەداگوگ جىلىنا بىرنەشە مارتە دونورلىققا قان تاپسىرۋدى ادەتكە اينالدىرعان.
تاعى ءبىر ەرەكشەلىگى, ول رەسپۋبليكالىق «تالىمگەرلەر» جوباسىنا دا بەلسەنە اتسالىسىپ, پاۆلودارداعى بالالار اۋلىندا داشا ەسىمدى قىزدى ءوز قامقورلىعىنا العان. كەيىنگى 5 جىل بويى بويجەتكەندى قوعامعا بەيىمدەپ, تاربيەسىن بەرىپ كەلەدى. بۇگىندە داشا ءوزىنىڭ نەمەرەلەرىمەن تۇراقتى بايلانىسىپ, ويىندارى جاراسىپ جۇرگەنىن ماقتانىشپەن جەتكىزدى.
ايتىپ وتەيىك, ءماشھۇر ءجۇسىپ مەكتەبىندەگى قىزىل جارتى اي قوعامىنىڭ فيليالى – «اشىق جۇرەك» جاساعى ۆولونتەرلەر جىلىندا «پاۆلودار وبلىسىنداعى ۇزدىك ەرىكتىلەر جاساعى» اتاندى.
پاۆلودار