اسكەري قىزمەتشىلەر كاسىبي بىلىكتىلىگىن شىڭدادى. اتىراۋ گارنيزونى باسقارماسى اقتاۋداعى تەڭىز جاياۋ اسكەرلەرى بريگاداسى بازاسىنداعى وقۋ-ادىستەمەلىك جيىندارعا قاتىستى.
ەلدەگى قارۋلى كۇشتەردىڭ قۋاتى وتان الدىنداعى بورىشىن وتەگەن بارلىق ساناتتاعى اسكەري قىزمەتشىلەردىڭ قارىم-قابىلەتى, ءبىلىم-بىلىگىمەن ولشەنەدى. سوندىقتان ساپتا ىركىلمەۋ ءۇشىن جوسپارلى جاۋىنگەرلىك ازىرلىك ماڭىزدى. وسى ورايدا اقتاۋدا وتكەن كەزەكتى جاتتىعۋعا اسكەري بولىمدەر كومانديرلەرى مەن ورىنباسارلارى, باتالون كومانديرلەرى مەن بولىمشەلەردىڭ سەرجانتتارى تۇگەل قاتىستى.
«مۇنداي جيىنداردىڭ ماقساتى – اسكەري بولىمدەردىڭ باسقارما قۇرامىنىڭ جاۋىنگەرلىك جانە جەدەل دايارلىق ءىس-شارالارىن, اسكەرلەر قىزمەتىن ۇيىمداستىرۋداعى, قۇرامالار مەن بولىمدەردى جان-جاقتى قامتاماسىز ەتۋدەگى ادىستەمەلىك داعدىلارىن جەتىلدىرۋ. باعدارلاما جاڭا فورمالار مەن جۇمىس ادىستەرىن ۇيرەتۋگە باعىتتالعان ءارتۇرلى فورماتتاعى ءىس-شارالاردى قامتىدى. جيىن بارىسىندا اسكەري بولىمدەر كومانديرلەرىنىڭ باياندامالارى تىڭدالدى. بۇدان بولەك, سالاداعى وزەكتى ماسەلەلەر مەن ولاردى شەشۋ جولدارى جان-جاقتى تالقىلاندى», دەدى «باتىس» وڭىرلىك قولباسشىلىعى اسكەرلەرىنىڭ قولباسشىسى, گەنەرال-مايور داۋلەت وسپانوۆ.
بۇل باسقوسۋدىڭ ەرەكشەلىگى – ۇلتتىق ۇلان اسكەري قىزمەتشىلەرىنىڭ قاتىسۋى بولدى. ءىس-شارادا ەكى سالانىڭ وكىلدەرى جاۋىنگەرلىك جانە دەنەشىنىقتىرۋ دايىندىعىن ۇيىمداستىرۋ, اسكەري ءتارتىپتى ساقتاۋ, كەزەكشىلىك جانە قاراۋىل قىزمەتىن اتقارۋ ەرەجەلەرى بويىنشا ءوز تاجىريبەلەرىمەن ءبولىستى.
«كەزەكتى وقۋ-ادىستەمەلىك جيىن كوزدەگەن مەجە ۇدەسىنەن شىقتى. ۇلتتىق ۇلاننىڭ اسكەري قىزمەتشىلەرىمەن تاجىريبە الماسۋ ەرەكشە اسەر ەتتى. ولاردىڭ قىزمەتى – ماڭىزدى نىسانداردى ۇنەمى قىراعى كۇزەتۋ ءارى كەزەكشىلىكتە بولۋ. ال ءبىز – جاۋىنگەرلىك جانە دەنەشىنىقتىرۋ دايىندىعىن قاداعالايمىز. ەگەر مۇنداي ءىس-شارالاردى ۇيىمداستىرۋدا باسقا كۇش قۇرىلىمدارىمەن ءوزارا ءىس-قيمىل جاساساق, وتاندىق قارۋلى كۇشتەر جاساعى بارلىق قىزمەتتىك باعىت بويىنشا دەڭگەيدى كوتەرەتىنىنە سەنىمدىمىن», دەدى 25744 اسكەري ءبولىم شتابىنىڭ باسشىسى, مايور ساپارالى قازاقباەۆ.
جيىن سوڭىندا «باتىس» وڭىرلىك قولباسشىلىعى قىسقى وقۋ كەزەڭىنىڭ قورىتىندىسىندا قارۋلى كۇشتەردىڭ قۇرلىق اسكەرلەرى اراسىندا ۇزدىك دەپ تانىلدى. جاۋىنگەرلەرگە ماڭعىستاۋ وبلىسىنىڭ اكىمى نۇرلان نوعاەۆ ەرەكشە ءىلتيپات ءبىلدىردى.