شىمكەنتتىك ارۋ ايسۇلۋ مۇحيت بوكستان الەم چەمپيونى اتاندى. وسى سپورت تۇرىنەن ارمەنيا استاناسى ەرەۆاندا ۇيىمداستىرىلعان جاسوسپىرىمدەر اراسىنداعى چەمپيوناتتا قازاق قىزى التىن مەدال يەلەندى. 66 كگ سالماق دارەجەسىندە باق سىناعان سپورتشىمىز اقتىق ايقاستا رۋمىنيالىق اماليا تۋگۋيانى 3:2 ەسەبىمەن جەڭىپ شىقتى.
بوكسشى قىز شىمكەنتتەگى №52 مەكتەپ-ليتسەيىندەگى 9-سىنىپتا ءبىلىم الادى. ۇستازدارىنىڭ ايتۋىنشا, ونىڭ مەكتەپتەگى وقۋى ۇزدىك ءارى قوعامدىق ءىس-شارالار مەن بوكس, جۇگىرۋ, جەڭىل اتلەتيكا سىندى ءارتۇرلى سپورتتىق ۇيىرمەلەرگە بەلسەنە قاتىسادى. ايسۇلۋ مۇحيتتىڭ بۇعان دەيىن جەتكەن جەتىستىكتەرى دە از ەمەس. ول – قازاقستان چەمپيونى, حالىقارالىق جارىستاردىڭ جەڭىمپازى, قاراشا ايىندا استانا قالاسىندا وتكەن ازيا چەمپيوناتىنىڭ قولا جۇلدەگەرى.
بۇل – ءجاسوسپىرىم قىزدار اراسىنداعى الەم بىرىنشىلىگىندە قازاقستان ۇلتتىق قۇراماسىنىڭ ءۇشىنشى التىن جۇلدەسى. وسىعان دەيىن اياجان سادىق (54 كگ) پەن تولعاناي قاسىمحان (60 كگ) جۇلدەلى ورىنعا يە بولدى.
جالپى, ەرەۆانداعى سپورتشى قىزداردىڭ چەمپيون اتانۋى ەلىمىزدىڭ بوكس تاريحىنداعى ەلەۋلى وقيعا دەۋگە نەگىز بار. سونداي-اق ارمەنيا تورىندە وتكەن الەم بىرىنشىلىگىندە تاعى شىمكەنتتىك ورەن نۇراسىل تولەبەكتىڭ دە باعى جاندى. ول دا بايراقتى باسەكەدە التىن مەدال ەنشىلەدى. جەرلەسىمىز 52 كگ سالماقتا جۇدىرىقتاسىپ, تۇعىرى بيىك جەڭىس جولىندا 4 قارسىلاسىن ايقىن باسىمدىقپەن جەڭدى. جاڭا الەم چەمپيونى نۇراسىل تولەبەك شىمكەنت قالاسىنىڭ بوكس كلۋبىندا دايىندالادى. جاتتىقتىرۋشى دۋمان بايتەليەۆتىڭ شاكىرتى.
قىسقاسى, 58 مەملەكەتتەن 357 بىلعارى قولعاپ شەبەرى جۇلدەگە تالاسقان ءدۇبىرلى دودادا ەل نامىسىن قورعاۋعا شىمكەنت قالاسىنان 3 سپورتشى قاتىستى.
شىمكەنت