الماتىدا ايەلىن 18 جەرىنەن پىشاقتاپ ولتىرگەن بۇرىنعى كۇيەۋى جازاسىن تولىق وتەيتىن بولدى. سوت تالعات نۇرتاەۆتى 11 جىلعا باس بوستاندىعىنان ايىرعان بولاتىن. بىراق ادۆوكاتى نۇرتاەۆ جۇبايىن قاساقانا ەمەس, ابايسىزدا جازىم قىلدى دەپ اپەللياتسيالىق شاعىم تۇسىرگەن ەدى. بۇگىن وتكەن پروتسەستە سۋديا بۇل ءۋاجى نەگىزسىز دەپ, ۇكىمدى وزگەرتپەدى, دەپ جازادى Egemen.kz كتك ارناسىنا سىلتەمە جاساپ.
ەسكە سالساق, زاڭگەر ايمان اسانوۆا مەن تالعات نۇرتاەۆ 2019 جىلى وتباسىن قۇرعان. ءۇش جىل عانا نەكەدە تۇرىپ, جيىلەگەن ۇرىس-كەرىستىڭ كەسىرىنەن ەكەۋى اقىرى اجىراسادى. الايدا جانجال مۇنىمەن بىتپەگەن. ەندى ورتاق م ۇلىكتى ءبولۋ ماسەلەسىنە كەلگەندە كيكىلجىڭ ودان بەتەر ۋشىعا تۇسكەن. وسىلايشا اڭگىمەنىڭ توق ەتەرىن قويۋ ءۇشىن تالعات نۇرتاەۆ بۇرىنعى ايەلىن ءدال ءۇيىنىڭ الدىنان ۇستاپ الادى.
سول كۇنى, تەرگەۋ مالىمەتىنشە, ول 42 جاستاعى ايمان اسانوۆاعا 18 جەرىنەن پىشاق سۇققان. ايەل اۋرۋحانادا ءجانتاسىلىم ەتتى. ءاۋ باستا قىلمىس اشۋ ۇستىندە جاسالدى دەپ, سوت قاسكويدى ءبىر جارىم جىلعا عانا باس بوستاندىعىنان ايىرعان ەدى. بىراق بۇل شەشىم قوعامدا ۇلكەن داۋ تۋعىزدى. جازانىڭ تىم جەڭىل ەكەنىن ايتىپ مارقۇمنىڭ جاقىندارى دا قارسى شىققان. اقىرى نۇرتاەۆ ەكس-ايەلىن قاساقانا ولتىرگەنى دالەلدەنىپ, ءبىر جارىم جىل جازاسى 11 جىلعا ۇزارتىلدى.