قازاقتىڭ تۇڭعىش كاسىبي بىلعارى قولعاپ شەبەرى كوز جۇمدى

قارالى حاباردى ع.مۇسىرەپوۆ اتىنداعى قوعامدىق قوردىڭ جەتەكشىسى عابيدەن جاكەي Facebook-تەگى پاراقشاسىندا جازدى.

«سۋىت حابار.... بوكسشى ەسبولات نۇرمانوۆ ماڭگىلىك مەكەنىنە اتتانىپتى. ەگەمەن ەلدىڭ تۇڭعىش كاسىپقوي بوكسشىسى, 17 جاسىندا بوكستان سسسر قۇراما كومانداسىنىڭ مۇشەسى بولعان, حالىقارالىق دارەجەدەگى سپورت شەبەرى ەدى. ول ارال ءوڭىرىنىڭ تۋماسى. ەكەۋمىز سوناۋ 1987 جىلى لەنين اتىنداعى قازپتي-نىڭ گيدروگەولوگيا, بارلاۋ تەحنيكاسى فاكۋلتەتىندە ءبىر توپتا وقىدىق. 1990 جىلداردىڭ ورتاسىنان كەدەن قىزمەتىندە جۇمىس ىستەدى. يمانىڭ سالامات بولسىن», - دەلىنگەن اۆتوردىڭ جازباسىندا.

ەسبولات نۇرمانوۆ - توقسانىنشى جىلداردىڭ باسىندا وتاندىق بىلعارى قولعاپ شەبەرلەرى اراسىندا كاسىپقوي بوكسقا العاش بولىپ قادام باسقان سپورتشى.

ول (29.02.1970 ج. - 4.12.2023 ج) كاسىپقوي بوكستا 7 رەت شارشى الاڭعا شىققان. 1993 جىلدىڭ 27 ناۋرىزىندا ۋكراينانىڭ ماريۋپول قالاسىندا يزرايلدىك بوكسشىعا قارسى العاشقى كەزدەسۋىن وتكىزگەن. 1995 جىلدىڭ 9 جەلتوقسانىندا بولعان سوڭعى جەكپە-جەگىندە ليتۆالىق بوكسشىمەن جۇدىرىقتاسقان.