باكۋدە قازاقستاننىڭ ازەربايجانداعى مادەنيەت كۇندەرى ءوتتى. قازاقستان-ازەربايجان قارىم-قاتىناسىن نىعايتۋ ماقساتىندا ءوزارا مادەني كۇندەردى وتكىزۋ تۋرالى بيىل مەملەكەت باسشىلارى قاسىم-جومارت توقاەۆ پەن يلحام اليەۆ كەلىسىم جاساسقان ەدى, دەپ جازادى Egemen.kz.
قازاقستاننىڭ ازەربايجانداعى مادەنيەت كۇندەرى اياسىندا مادەنيەت جانە اقپارات ءمينيسترى ايدا بالاەۆا كاۆكاز مۇسىلماندارى باسقارماسىنىڭ توراعاسى شەيح ۋل-يسلام اللاشۇكىر پاشازادەمەن كەزدەستى.
ايدا بالاەۆا ا. پاشازادەنى «دوستىق» وردەنىمەن قۇتتىقتاپ, الەمدىك جانە ءداستۇرلى دىندەر ليدەرلەرى سەزىنىڭ حاتشىلىعىنا قاتىسىپ, بەلسەندىلىك تانىتقانى ءۇشىن جانە وسى ماڭىزدى ءىس-شاراعا تۇراقتى قولداۋ كورسەتكەنى ءۇشىن العىس ايتتى.
مينيستر شەيحتىڭ ايماقتىق جانە جاھاندىق جالپى الەمدىك اۋقىمدى بەيبىتشىلىك پەن كونفەسسياارالىق كەلىسىمدى نىعايتۋداعى ءرولىن ەرەكشە اتاپ ءوتتى.
كاۆكاز مۇسىلماندارى باسقارماسىنىڭ توراعاسى اللاشۇكىر پاشازادەمەن كەزدەسۋدە رۋحاني ىنتىماقتاستىق ماسەلەلەرى, سونداي-اق كونفەسسياارالىق كەلىسىمدى قامتاماسىز ەتۋ ماسەلەلەرى تالقىلاندى.
جيىنعا ازەربايجان رەسپۋبليكاسىنىڭ ءدىني ۇيىمدارىمەن جۇمىس جونىندەگى مەملەكەتتىك كوميتەتتىڭ توراعاسى مۋباريز گۋربانلى, ازەربايجان پارلامەنتىنىڭ ۆيتسە-سپيكەرى فازايل يبراحيملي, سونداي-اق دەپۋتاتتار, زيالى قاۋىم مەن ءتۇرلى ءدىني كونفەسسيا وكىلدەرى قاتىستى.
ايدا بالاەۆا جينالعاندارعا پرەزيدەنت ق.توقاەۆتىڭ باسشىلىعىمەن قازاقستاندا بولىپ جاتقان وزگەرىستەر تۋرالى ايتىپ, باۋىرلاس حالىقتاردىڭ دوستىعى مەن ىنتىماقتاستىق بايلانىستارىن بارلىق سالادا نىعايتا بەرەتىنىنە سەنىم ءبىلدىردى.
ءوز كەزەگىندە شەيح ۋل-يسلام اللاشۇكىر پاشازادە الەمدىك جانە ءداستۇرلى دىندەر كوشباسشىلارى سەزىنىڭ ماڭىزدىلىعىنا توقتالىپ, استانانىڭ ءدىن, مەملەكەت جانە قوعام قايراتكەرلەرىن بىرىكتىرەتىن ەرەكشە ديالوگ الاڭىنا اينالعانىن اتاپ ءوتتى.