كەرەكۋلىك ۋچاسكەلىك ينسپەكتور ماديار تۇرسىنباەۆ جۋىقتا ەرلى-زايىپتى قاريالارعا اراشا ءتۇسىپ, العىسقا بولەندى. ساپاسىز تاۋاردى بىلمەستىكپەن ساتىپ العان وتباسى پوليتسەيدىڭ پارمەنىمەن اقشالارىن كەرى قايتارىپ العان.
وڭىرلىك پوليتسيا دەپارتامەنتىنىڭ باسشىلىعى اتىنا پاۆلودار قالاسىنىڭ تۇرعىنى, زەينەتكەر قايىرتاس نۇرعاليەۆتەن جەرگىلىكتى №5 پوليتسيا پۋنكتىنىڭ ۋچاسكەلىك ينسپەكتورى م.تۇرسىنباەۆقا العىس ايتۋ حاتى ءتۇستى. حاتتا قاريا: «مەن ارداگەر ۇستازبىن, پاۆلودار قالاسىندا تۇرامىن. جاقىندا جۇبايىم ەكەۋمىز ينتەرنەت-ساۋدا جاسايمىز دەپ الاياقتاردىڭ ارباۋىنا تاپ بولدىق. كوپ ويلانباستان ءوزىمىزدىڭ ۋچاسكەلىك پوليتسەيىمىز, پوليتسيا مايورى ماديار تۇرسىنباەۆقا كومەك سۇراپ باردىق. ماديار بالامىز الگىلەردىڭ الماتى قالاسىنان ەكەنىن انىقتاپ, بىردەن قىلمىستى اشۋعا كىرىستى. ەكى كۇننىڭ ىشىندە الاياقتارعا ءبىزدىڭ اقشامىزدى قايتارتتى. ەكىنشى پاۆلودار شاعىن اۋدانىندا ماديارداي انتىنا ادال پوليتسەيلەردىڭ بارىنا ءبىز, زەينەتكەرلەر قۋانامىز, ۇيقىمىز دا تىنىش دەۋگە دە بولادى. ونىڭ ءوز قىزمەتىنە دەگەن ادالدىعى ارقىلى قۇقىق قورعاۋ ورگاندارىندا قاراپايىم ادامداردىڭ ماسەلەلەرىن شەشۋگە دايىن كاسىبي, جاناشىر ادامدار جۇمىس ىستەيتىنىنە كوز جەتكىزدىم», دەپ جازعان.
سولتۇستىك پوليتسيا بولىمىندە 2016 جىلدان بەرى قىزمەت ەتىپ كەلە جاتقان ۋچاسكەلىك ينسپەكتور كوبىنە پروفيلاكتيكالىق ءىس-شارالارمەن, ارنايى ەسەپتە تۇرعان جاندارمەن, وتباسىلىق ۇرىس-كەرىسكە جاقىن تۇراتىن ەر-ازاماتتارمەن جۇمىس ىستەيدى.
– ۋچاسكەمىزگە ءار كۇنى جەكە ماسەلەسىمەن ءتۇرلى ازاماتتار كەلىپ جاتادى. بارلىعىن نازارعا الىپ, ءتيىستى پروتسەدۋرالاردى جۇزەگە اسىرامىز. جۋىقتا قايىرتاس نۇرعاليەۆ ەسىمدى قاريا كەلىپ, بايبىشەسى ەكەۋىنىڭ «تيك-توكتا» كورگەن جارناماعا سەنىپ, كوكونىس كەسكىش ماشينا ساتىپ العاندارىن جەتكىزدى. سوناۋ الماتىدان الدىرىپتى. سويتسە ونىسى اقاۋى بار زات ەكەن, دۇرىس بولماي شىققان. ساتقان كومپانيا اۋىستىرىپ بەرۋدەن باس تارتقان. باعاسى دا زەينەت جاسىنداعى ادامدار ءۇشىن ارزان ەمەس. ەڭ اۋەلى قالاداعى سەرۆيستىك قىزمەت كورسەتۋ ورنىنا اپارىپ, الگى قۇرالدىڭ شىن مانىندە اقاۋى بارى تۋرالى انىقتاما الدىرتتىق. سودان سوڭ الاياق فيرماعا حابارلاسىپ, پايدالانۋعا جارامسىز تاۋاردى قوياردا قويماي ءجۇرىپ كەرى جىبەرتكىزدىم. قاريالاردىڭ اقشاسىن قايتارىپ بەردى. اتانىڭ العىسىن ەستىپ, مەن دە قۋانىپ قالدىم, – دەيدى ماديار.
پوليتسەيدىڭ پاۆلودارلىق ازاماتتاردى الاياقتاردان قۇتقارۋى بۇل جالعىز ەمەس. جۋىقتا جەرگىلىكتى زەينەتكەر ماسساج جاسايتىن كرەسلو ساتىپ الماقشى بولىپ, 1,5 ملن تەڭگەگە نەسيە رەسىمدەگەن. سويتسە, ونىسى تۇپنۇسقا ەمەس, قىتايدا جاسالعان ارزانقول بۇيىم بولىپ شىقتى. الگى قاريانىڭ بالالارى شاعىم تۇسىرگەن سوڭ م.تۇرسىنباەۆ ساتۋشى ازاماتتى تەز ىزدەپ تاۋىپ, الاياق فيرمانى اشكەرەلەدى. ءبىر تاۋلىك ىشىندە قاريا رەسىمدەگەن نەسيە دە جويىلدى.
مادياردىڭ ىشكى ىستەر سالاسىنداعى ەڭبەك ءوتىلى بۇگىندە 10 جىلدان اسقان. كوپتىڭ العىسىن ارقالاپ, انتىنا ادالدىق تانىتىپ جۇرگەن پوليتسەي وتباسىندا جۇبايىمەن ەكى بالا تاربيەلەپ وتىرعان ارداقتى اكە.
پاۆلودار وبلىسى