اقمولا وبلىسىنىڭ پروكۋراتۋراسى جەرگىلىكتى اكىمدىكتەردىڭ قىزمەتىندە تۇرعىن ءۇي زاڭناماسىنىڭ ساقتالۋىنا تەكسەرىس جۇرگىزىپ, بىرنەشە زاڭسىزدىقتىڭ ورىن العانىن اشكەرەلەدى, دەپ حابارلايدى Egemen.kz وبلىستىق پروكۋراتۋرانىڭ ءباسپاسوز قىزمەتىنە سىلتەمە جاساپ.
وسى كۇندە وبلىستا تۇرعىن ءۇي كەزەگىندە 23 مىڭنان استام ادام تۇر. كەيىنگى ءۇش جىل ىشىندە اكىمدىك 900-گە تارتا پاتەردى بولگەن. «تەكسەرىس بارىسىندا تۇرعىن ءۇيدى زاڭسىز بەرۋدىڭ, سونداي-اق تۇرعىن ءۇي بەرۋ نەگىزدەرى جويىلعاننان كەيىن ادامداردى شىعارماۋدىڭ 23 فاكتىسى انىقتالدى.
مىسالى, كوكشەتاۋ قالاسىندا تۇرعىن ءۇيدى بيۋدجەتتىك ۇيىمنىڭ بۇرىنعى قىزمەتكەرىنە ۇسىنىلدى, ول بۇعان دەيىن 2 جىل بۇرىن پارا العانى ءۇشىن سوتتالعان جانە بەرىلگەن كەزدە باس بوستاندىعىنان ايىرۋ تۇرىندە جازاسىن وتەۋدە. تۇرعىن ءۇيدى زاڭسىز جەكەشەلەندىرۋدىڭ 2 فاكتىسى انىقتالدى.
ماسەلەن, اۋدان ورتالىقتارىنىڭ بىرىندە ازامات جەكەشەلەندىرۋدەن جارتى جىل بۇرىن باسقا ايماقتا ورنالاسقان باسقا پاتەردى ساتتى. قاداعالاۋ اكتىسى بويىنشا جەكەشەلەندىرىلگەن پاتەر مەملەكەتكە قايتارىلدى. سونداي-اق كوممۋنالدىق تۇرعىن ءۇيدى زاڭسىز جالعا بەرۋ, بيۋدجەتكە 50 ملن تەڭگەگە جالداۋ تولەمدەرىن تولەمەۋ, تابىستارىن الدىن الا تەكسەرمەي, از قامتىلعان ازاماتتارعا تۇرعىن ءۇي بەرۋ فاكتىلەرى انىقتالدى», دەلىنگەن حابارلامادا.
زاڭسىز بەرىلگەن پاتەرلەردى اكىمدىككە قايتارۋ ماسەلەسى تالقىلانىپ, تۇرعىن ۇيگە ناقتى مۇقتاج ادامدارعا بەرۋ جايى قولعا الىندى.