ەرەۆاندا ءوتىپ جاتقان جاسوسپىرىمدەر اراسىنداعى الەم بىرىنشىلىگىنىڭ فينالىنا ەلىمىزدىڭ ءتورت بوكسشىسى جولداما العانى جايىندا ءبىز بۇعان دەيىن دە جازعانبىز. كەشە سولاردىڭ ۇشەۋى شارشى الاڭعا شىعىپ, وزدەرىنىڭ ورەلى ونەرلەرىمەن بارشا جانكۇيەردى قۋانتتى.
جەرلەستەرىمىزدىڭ جەڭىستى جولىن اياجان سىدىق باستادى. 54 كگ سالماقتا سايىسقا تۇسكەن ول اقتىق سىنعا دەيىن القىنباي جەتتى. شەشۋشى تۇستا ۇندىستاندىق اميشا كەركەتتانى قاپى قالدىرعان اياجان التىننان القا تاقتى. بارلىق بەس تورەشى دە ونىڭ مىقتىلىعىن ءبىراۋىزدان مويىندادى. كوپ كەشىكپەي 60 كگ سالماق دارەجەسىندەگى تولعاناي قاسىمحاننىڭ ونەرىن تاماشالادىق. ول رەسەيلىك كيرا لەونوۆامەن كۇش سىناستى. ەكەۋى ايانباي ايقاسىپ, ءبىر-ءبىرىن ابدەن سوققىلادى. دەسەك تە تولعاناي الىمدى ءارى قارىمدى كورىندى. ونىڭ سوققىلارى قارسىلاسىنا كوبىرەك ءتيدى. بۇل جاعداي قازىلاردىڭ نازارىنان تىس قالعان جوق. ەسەپ – 3:2. ءۇشىنشى التىن مەدالدى كوماندا قورجىنىنا 66 كگ سالماقتاعى ايسۇلۋ مۇحيت سالدى. اسا شيەلەنىستى باسەكەدە ول رۋمىنيالىق اماليا تۋگۋيدى تىزە بۇكتىردى – 3:2.
وسى كۇنگە دەيىن ەلىمىزدىڭ قىزدار قۇراماسى ارمەنيانىڭ استاناسىندا بەس قولا مەدالعا قول جەتكىزگەن ەدى. ول جۇلدەلەردىڭ يەگەرلەرى – سيلا بيبولسىنقىزى (48 كگ), گاۋھار زاردەن (50 كگ), ايشا ساريەۆا (52 كگ), الينا قۇدايبەرگەنوۆا (63 كگ) جانە قۇرالاي ەگىمبايقىزى (80 كگ). ءسويتىپ, ءبىزدىڭ بوكسشى قىزدار بيىلعى الەم چەمپيوناتىن 3 التىن جانە 5 قولامەن قورىتىندىلادى. بارلىعى – 8 جۇلدە. ارينە, بۇل – وتە تاماشا كورسەتكىش!